TEAM INDIA: టీమిండియా ఆటగాళ్ల భావోద్వేగం
టీ 20 ప్రపంచకప్‌ గెలిచిన సందర్భంగా వాంఖడే స్టేడియంలో నిర్వహించిన సన్మాన కార్యక్రమంలో ఆటగాళ్లు చాలా ఎమోషనల్‌ అయ్యారు. అశేష అభిమాన గణాన్ని ఉద్దేశించి భావోద్వేగ ప్రసంగం చేశారు. ఆల్‌రౌండర్‌ హార్దిక్‌ పాండ్యాపై సారధి రోహిత్ శర్మ ప్రశంసల జల్లు కురిపించాడు. ఆఖరి ఓవర్‌లో అద్భుతంగా బౌలింగ్‌ చేసిన పాండ్యాను కెప్టెన్ రోహిత్ శర్మ ప్రసంగించాడు. ప్రపంచకప్‌ పైనల్లో ఆ ఓవర్ వేయడానికి చాలా ఒత్తిడి ఉంటుందని.. కానీ పాండ్యా దానిని సమర్థంగా నిర్వహించాడన్నాడు. రోహిత్ ప్రసంగం చేస్తున్నప్పుడు హార్దిక్‌ లేచి నిలబడి అభిమానులకు ధన్యవాదాలు తెలిపాడు. భారతే తనకు ప్రపంచమని... ఈ ప్రేమను అందించిన వారందరికీ ధన్యవాదాలని టీమిండియాకు ప్రపంచకప్‌ రావడంలో కీలకపాత్ర పోషించిన నెంబర్ వన్ ఆల్‌రౌండర్‌ హార్దిక్‌ పాండ్యా అన్నాడు. ఈ విజయోత్సవాన్ని తమతో జరుపుకోవడానికి వచ్చిన వారందరికీ పాండ్యా ధన్యవాదాలు తెలిపాడు.
ఇలాంటి ఘన స్వాగతం ఎప్పుడూ చూడలేదని.. ఈ జ్ఞాపకాలను ఎప్పటికీ మర్చిపోలేనని జస్ప్రీత్ బుమ్రా అన్నాడు. తన కెరీర్‌లో ఇదే అత్యంత మధురమైనదని విరాట్ కోహ్లీ అన్నాడు. విరాట్ కోహ్లీ బుమ్రాను ప్రశంసించాడు. జస్ప్రీత్ బుమ్రా లాంటి బౌలర్‌ తరానికి ఒకడే ఉంటాడని విరాట్ అన్నాడు. డెత్ ఓవర్లలో బుమ్రాను ఎదుర్కోవడం ఈ ప్రపంచంలో ఏ బ్యాటర్‌కు అయినా కష్టమేనని కింగ్‌ కోహ్లీ అన్నాడు. బుమ్రా ప్రపంచంలో ఎనిమిదో వింతని కోహ్లీ ఆకాశానికి ఎత్తేశాడు. టీ 20 ప్రపంచకప్‌ జారిపోతుందని అనుకున్నామని... కానీ చివరి ఐదు ఓవర్లలో అద్భుతం జరిగిందని కోహ్లీ అన్నాడు.ఈ మ్యాచ్‌తో టీ 20 క్రికెట్‌లో తన ప్రస్థానం ముగిసిందని.... కానీ ఈ విజయం తనకు చివరిదాకా గుర్తిండిపోతుందని కోహ్లీ అన్నాడు. చివరి ఐదు ఓవర్లలో బుమ్రా అద్భుతం చేశాడని.. బూమ్ బూమ్ బూమ్ రా అంటూ కోహ్లీ కామెంట్‌ చేశాడు. మైదానంలో రోహిత్ ఇంత భావోద్వేగాన్ని ప్రదర్శించడం తాను తొలిసారి చూశానని.. అదొక ప్రత్యేక క్షణమని కోహ్లీ అన్నాడు. విశ్వ విజేతలుగా నిలిచిన ఈ జట్టు ఒక కుటుంబం లాంటిదని...జట్టులోని ఆటగాళ్లు నమ్మశక్యం కానీ ఓ అద్భుతం చేశారని రాహుల్‌ ద్రావిడ్‌ అన్నాడు.
ఘన స్వాగతం
ముంబై జనసంద్రంలా మారింది. విజయోత్సవంతో తడిసి ముద్దయింది. లక్షలాది అభిమానుల కోలహలాల మధ్య... టీ 20 ప్రపంచకప్‌ గెలిచిన భారత జట్టును బీసీసీఐ ఘనంగా సన్మానించింది. గతంలో ఎన్నడూ చూడని విధంగా విశ్వ విజేతలుగా నిలిచిన రోహిత్ సేనకు భారత అభిమానులు కనీవినీ ఎరుగని స్వాగతం పలికారు. ముంబై వీధులు కిక్కిరిసిన వేళ... భారీగా క్రికెట్‌ అభిమానులు తరలివచ్చిన వేళ భారత క్రికెట్‌ జట్టుకు ఘన స్వాగతం లభించింది. టీమిండియా స్టార్లు ఇప్పటివరకూ ఎప్పుడూ చూడని విధంగా స్వాగతం అభిమానులు. తర్వాత వాంఖడే స్టేడియంలో క్రికెటర్లు, అభిమానుల సంబరాలు అంబరాన్నంటాయి. మైదానం చుట్టూ తిరిగిన ఆటగాళ్లు డాన్సులు చేస్తూ సందడి చేశారు. రోహిత్ శర్మ, కోహ్లీ సహా ఆటగాళ్లు అందరూ డ్యాన్స్‌లతో అదరగొట్టారు.
