ICC U19: 50 ఓవర్లలో 515 పరుగులు

ICC అండర్ 19 పురుషుల ప్రపంచకప్ క్వాలిఫైయర్ రౌండులో(ICC U19 Men’s Cricket World Cup Americas Qualifier match) పెను సంచలనం నమోదైంది. USA జట్టు సరికొత్త చరిత్ర సృష్టించింది. అండర్ 19 వన్డే క్రికెట్ చరిత్రలో అత్యధిక స్కోర్ నమోదు చేసిన జట్టుగా రికార్డు సృష్టించింది. టొరంటో(Toronto) వేదికగా అర్జెంటీనా అండర్ 19 జట్టుతో జరిగిన మ్యాచ్‌లో యూఎస్‌ఏ అండర్ 19 జట్టు ఏకంగా 515 పరుగులు చేసింది. అండర్ 19 వన్డే ఫార్మాట్‌లోనే కాదు, అన్ని రకాల వన్డే క్రికెట్‌లో ఇదే అత్యధిక స్కోర్ కావడం గమనార్హం. ఈ క్రమంలో 2002లో కెన్యాపై ఆస్ట్రేలియా అండర్ 19 టీం చేసిన 480 పరుగుల రికార్డును USA బద్దలు కొట్టింది. అన్ని రకాల వన్డే క్రికెట్‌లో 500 పరుగుల మార్కు అందుకున్న తొలి జట్టుగా కూడా చరిత్ర సృష్టించింది. అంతర్జాతీయ వన్డే క్రికెట్‌లోనూ ఇప్పటివరకు అత్యధిక స్కోర్ 498 పరుగులే. ఈ రికార్డును 2022లో నెదర్లాండ్స్‌పై ఇంగ్లండ్ సాధించింది. ఈ రికార్డును USA బద్దలు కొట్టింది.

ఈ మ్యాచ్‌లో మొదట బ్యాటింగ్ చేసిన USA అండర్ 19 జట్టు నిర్ణీత 50 ఓవర్లలో 8 వికెట్ల నష్టానికి 515 పరుగులు చేసింది. భవ్య మెహతా, కెప్టన్ రిషి రమేష్(Bhavya Mehta and captain Rishi Ramesh) సెంచరీలతో విశ్వరూపం చూపించారు. వీరిద్దరూ రెండో వికెట్‌కు ఏకంగా 211 పరుగుల భాగస్వామ్యం నెలకొల్పారు. 14 ఫోర్లు, 3 సిక్సులతో 91 బంతుల్లోనే 136 పరుగులు చేసిన భవ్య మెహతా రనౌట్ అయ్యాడు. కెప్టెన్ రిషి రమేష్ 13 ఫోర్లు, 2 సిక్సులతో 59 బంతుల్లోనే 100 పరుగులు చేశాడు. ఓపెనర్ ప్రన్నవ్ చెట్టిపాళయం 10 ఫోర్లతో 43 బంతుల్లో 61 పరుగులు, అర్జున్ మహేష్ 9 ఫోర్లతో 44 బంతుల్లో 67 పరుగులతో చెలరేగారు. అమోఘ్ ఆరెపల్లి 5 ఫోర్లు, ఒక సిక్సర్‌తో 30 బంతుల్లో 48 పరుగులు, ఉత్కర్ష్ శ్రీవాస్తవ 4 ఫోర్లు, ఓ సిక్సర్‌తో 22 బంతుల్లో 45 పరుగులతో రాణించాడు.

516 పరుగుల కొండంతో లక్ష్యంతో బరిలోకి దిగిన అర్జెంటీనా అండర్ 19 జట్టు 19.5 ఓవర్లు మాత్రమే బ్యాటింగ్ చేసి 65 పరుగులకే కుప్పకూలింది. అర్జెంటీనా జట్టులో ముగ్గురు మాత్రమే రెండంకెల స్కోర్ సాధించారు. దీంతో యూఎస్‌ఏ అండర్ 19 జట్టు రికార్డు స్థాయిలో 450 పరుగుల భారీ తేడాతో ఘనవిజయం సాధించింది. యూఎస్‌ఏ బౌలర్ ఆరిన్ నద్కర్ణి(Aarin Nadkarni) 21 పరుగులు మాత్రమే ఇచ్చి 6 వికెట్లు పడగొట్టాడు. అంతేకాకుండా ఈ మ్యాచ్‌లో అర్జెంటీనాపై యూఎస్‌ఏ ఏకంగా 450 పరుగుల భారీ తేడాతో గెలిచింది. అన్ని రకాల వన్డే క్రికెట్‌లో పరుగుల పరంగా ఇదే అతి పెద్ద విజయంగా చరిత్రకెక్కింది.

ఈ గెలుపుతో ఓవరాల్‌గా లిస్ట్‌-ఏ క్రికెట్‌లోనూ అత్యధిక స్కోర్‌ చేసిన జట్టుగా యూఎస్‌ఏ రికార్డుల్లోకెక్కింది. ఈ మ్యాచ్‌కు ముందు వరకు లిస్ట్‌-ఏ క్రికెట్‌లో అత్యధిక టీమ్‌ స్కోర్‌ రికార్డు తమిళనాడు పేరిట ఉంది. 2022లో అరుణాచల్‌ ప్రదేశ్‌తో జరిగిన మ్యాచ్‌లో తమిళనాడు 506 పరుగులు చేసింది.