AI ERA: నైపుణ్యాలకే పట్టం.. సర్టిఫికేట్ల కంటే స్కిల్స్కే ప్రాధాన్యం
కృత్రిమ మేధ (ఏఐ) ఆధారిత ఉద్యోగాల విపణిలో దేశీయ మెట్రో నగరాలు దూసుకెళ్తున్నాయి. ప్రముఖ స్థిరాస్తి కన్సల్టెంట్ సంస్థ సీబీఆర్ఈ విడుదల చేసిన తాజా నివేదిక ప్రకారం నౌకరీ డాట్ కామ్ పోర్టల్లో నమోదైన ఏఐ ఉద్యోగాల్లో దాదాపు 70 శాతం బెంగళూరు, దిల్లీ-ఎన్సీఆర్, ముంబయిల్లోనే కేంద్రీకృతమై ఉన్నాయి. 2025 డిసెంబరు నాటికి నౌకరీలో ఉన్న 64,500 క్రియాశీల ఏఐ ఉద్యోగ ప్రకటనలను విశ్లేషించి ఈ నివేదిక రూపొందించారు. అయితే, ఈ డేటా మొత్తం దేశంలోని ఏఐ ఉద్యోగ మార్కెట్ను పూర్తిగా ప్రతిబింబించదని సీబీఆర్ఈ స్పష్టం చేసింది. మొత్తం ఏఐ అనుబంధ ఉద్యోగాల్లో బెంగళూరు 25.4 శాతం వాటాతో అగ్రస్థానంలో నిలిచింది. ఐటీ కంపెనీలు, స్టార్టప్లు, గ్లోబల్ క్యాపబిలిటీ సెంటర్లు (జీసీసీలు) అధికంగా ఉండటం ఇందుకు కారణమని విశ్లేషకులు పేర్కొంటున్నారు. దిల్లీ-ఎన్సీఆర్ 24.8 శాతం, ముంబయి 19.2 శాతం వాటాలతో తర్వాతి స్థానాల్లో ఉన్నాయి. హైదరాబాద్ 12.5 శాతం, పుణె 9.6 శాతం, చెన్నై 6.4 శాతం, కోల్కతా 2.1 శాతం వాటాలను కలిగి ఉన్నాయి.
అంతా ఏఐ మయం
ప్రస్తుతం ఏఐ విభాగంలో సాఫ్ట్వేర్ ఇంజినీరింగ్, క్వాలిటీ అస్యూరెన్స్, డేటా సైన్స్, అనలిటిక్స్, సైబర్ సెక్యూరిటీ, క్లౌడ్ కంప్యూటింగ్, ఆటోమేషన్ రంగాల్లో నియామకాలు వేగంగా జరుగుతున్నాయి. బ్యాంకింగ్, ఆరోగ్య సంరక్షణ, ఈ-కామర్స్, తయారీ వంటి రంగాలు కూడా ఏఐ ఆధారిత పరిష్కారాలపై దృష్టి సారించడంతో నైపుణ్యం కలిగిన నిపుణులకు డిమాండ్ పెరిగింది. “ఏఐ అనేది ఇప్పుడు కేవలం చర్చాంశం కాదు; భారత ఆర్థిక వృద్ధిలో కీలక భాగంగా మారింది. అంతర్జాతీయ సంస్థలు భారతదేశాన్ని సేవా కేంద్రంగానే కాకుండా, ఆవిష్కరణల హబ్గా చూస్తున్నాయి” అని సీబీఆర్ఈ ఇండియా ఛైర్మన్ అన్షుమన్ మ్యాగజైన్ పేర్కొన్నారు. ఇదిలా ఉండగా, ఫ్రెషర్ల నియామకాల విషయంలో కూడా ఉత్సాహకర పరిస్థితి కనిపిస్తోంది. టీమ్ ఈజ్ ఎడ్ టెక్ విడుదల చేసిన ‘కెరీర్ ఔట్లుక్’ నివేదిక ప్రకారం, 2026 ప్రథమార్థంలో 73 శాతం కంపెనీలు ఫ్రెషర్లను నియమించుకోవడానికి సిద్ధంగా ఉన్నాయి. దేశవ్యాప్తంగా 1051 కంపెనీల సమాచారం ఆధారంగా ఈ విశ్లేషణ చేపట్టారు. గత ఆరు నెలలతో పోలిస్తే ఇది 3 శాతం అధికం కావడం గమనార్హం. కంపెనీలు కేవలం అకాడమిక్ సర్టిఫికేట్లకే పరిమితం కాకుండా, ఇంటర్న్షిప్లు, ప్రాజెక్టు అనుభవం, ప్రాక్టికల్ నైపుణ్యాలను ప్రాధాన్యంగా చూస్తున్నాయని నివేదిక వెల్లడించింది. రిటెయిల్ (91%), ఈ-కామర్స్, టెక్నాలజీ స్టార్టప్లు (90%), తయారీ (85%), పర్యాటకం, ఆతిథ్యం (77%) రంగాల్లో ఫ్రెషర్లకు అధిక అవకాశాలు ఉన్నాయి. బెంగళూరు 84 శాతం నియామకాలతో అగ్రస్థానంలో ఉండగా, ముంబయి 72 శాతంతో రెండో స్థానంలో ఉంది. అప్రెంటిస్షిప్ల ప్రాధాన్యం కూడా పెరుగుతోంది. ముఖ్యంగా బెంగళూరులో 45 శాతం కంపెనీలు డిగ్రీ అప్రెంటిస్షిప్ అభ్యర్థులపై ఆసక్తి చూపుతున్నాయి. విద్యుత్, ఇంధన రంగాల్లో గిరాకీ 50 శాతం పెరగడం ప్రత్యేకంగా కనిపిస్తోంది. నైపుణ్యాలే విజయానికి కీలకమనే సందేశం ఈ నివేదికలు స్పష్టం చేస్తున్నాయి. విశ్లేషకుల అభిప్రాయం ప్రకారం, రాబోయే రెండేళ్లలో జనరేటివ్ ఏఐ, మెషిన్ లెర్నింగ్, రోబోటిక్ ప్రాసెస్ ఆటోమేషన్ వంటి రంగాల్లో మరింత విస్తరణ కనిపించే అవకాశం ఉంది. స్టార్టప్లు మాత్రమే కాకుండా సంప్రదాయ పరిశ్రమలూ డిజిటల్ మార్పు దిశగా అడుగులు వేస్తుండటంతో మధ్యస్థాయి మరియు ప్రవేశ స్థాయి ఉద్యోగాల సంఖ్య కూడా పెరిగే సూచనలు కనిపిస్తున్నాయి.