Zero Shadow Day : హైదరాబాద్ లో 'నీడ పడని రోజు'

హైదరాబాద్ లో నీడలేని రోజు (Zero Shadow Day 2023) సంభవించింది. అంటే... సూర్యకిరణాలు వస్తువుపైగాని, మనుషులపైగాని పడ్డప్పుడు భూమిపై నీడ ఏర్పడుతుంది. అందుకు వ్యతిరేకంగా ఈ రోజు 12.12 గంటలకు నీడ ఏర్పడలేదు. సూర్యుడు ఆకాశంలో ఎత్తైన ప్రదేశానికి చేరుకున్నప్పుడు సంభవించే అరుదైన ఖగోళ సంఘటన ఈరోజు ( మే 9, 2023న ) జరిగింది. మధ్యాహ్నం 12.12 గంటలకు నీడ పూర్తిగా కనిపించకుండా పోయింది. బిర్లా ప్లానిటోరియంలో ఈ విషయంపై అవగాహన కార్యక్రమాన్ని నిర్వహించారు.

'జీరో షాడో డే' అనేది సూర్యుడు ఆకాశంలో ఎత్తైన ప్రదేశానికి చేరుకున్నప్పుడు సంభవించే అరుదైన ఖగోళ సంఘటన. ఈ సమయంలో నిలువు వస్తువుల నీడలు నేలపై పడవు. ఈ ఘటన సంవత్సరంలో రెండు సార్లు జరుగనున్నట్లు శాస్త్రవేత్తలు తెలిపారు. ఈ ఏడాది మే 9, ఆగస్టు 3వ తేదీల్లో 'జీరో షాడో డే' ఏర్పడనుంది. ఒకసారి ఉత్తరార్ధగోళంలో, మరొకటి దక్షిణార్ధగోళంలో జరుగుతుందని చెప్పారు. ఖగోళ శాస్త్రవేత్తలు సూర్యుని కదలికలను అధ్యయనం చేయడానికి ఈ సందర్భాన్ని ఉపయోగించుకుంటారు. సూర్య గ్రహణం, చంద్ర గ్రహణం ఏర్పడినప్పడు ప్రజలు ఆసక్తిని కనబరుస్తారు. ఇటీవల చంద్ర గ్రహణం ఏర్పడింది. చంద్ర గ్రహణం సమయంలో, చంద్రుడు భూమి యొక్క వెలుపలి భాగంలోకి ప్రవేశిస్తాడు. ఫలితంగా చంద్రుని ఉపరితలం సూక్ష్మంగా చీకటిగా మారుతుంది.