CRIME: సంగారెడ్డి జిల్లాలో పరువు హత్య
సంగారెడ్డి జిల్లాలో పరువు హత్య చోటుచేసుకుంది. కుమార్తెను ప్రేమిస్తున్నాడని దశరథ్‌(26) అనే యువకుడిని ఆమె తండ్రి గోపాల్ దారుణంగా హతమార్చి నిప్పుపెట్టాడు. ఐదు రోజుల తర్వాత దశరథ్‌ మృతదేహం లభ్యమైంది. నిజాంపేట మండలం ఈదుల తండా శివారులో మృతదేహాన్ని పోలీసులు గుర్తించారు. అనంతరం నారాయణఖేడ్ ప్రభుత్వాస్పత్రికి మృతదేహాన్ని తరలించారు. కాగా ఈ కేసులో నిందితుడు పోలీస్‌ స్టేషన్‌లో లొంగిపోయాడు. గోపాల్‌తో కలిసి స్పాట్‌కు వెళ్లిన పోలీసులు.. మృతదేహాన్ని స్వాధీనం చేసుకుని నారాయణఖేడ్ ప్రభుత్వాస్పత్రికి తరలించారు. సంగారెడ్డి జిల్లా నిజాంపేట మండలం ఈదులతండా శివారులో ఈ ఘటన చోటుచేసుకుంది. కేసు నమోదు చేసుకున్న పోలీసులు దర్యాప్తు ప్రారంభించారు.
ఇటీవలే సూర్యపేటలో ఘాతుకం
సూర్యాపేటలోనూ ఇటీవల ఓ పరువు హత్య జరిగింది. కులాంతర వివాహం చేసుకున్న యువకుడు దారుణ హత్యకు గురైన విషయం తెలిసిందే. సూర్యాపేట జిల్లా కేంద్రంలోని మామిళ్లగడ్డకు చెందిన వడ్లకొండ కృష్ణ(30)కు సూర్యాపేట పట్టణంలోని పిల్లలమర్రి ప్రాంతానికి చెందిన కోట్ల నవీన్ అనే వ్యక్తి చెల్లెలు భార్గవితో పరిచయం ఏర్పడింది. క్రమంగా అది ప్రేమగా మారింది. అనంతరం ఇద్దరూ వివాహం చేసుకున్నారు. దీనిని తట్టుకోలేకపోయిన నవీన్.. సినిమా స్టైళ్లో ప్లాన్ వేసి.. కృష్ణను హతమార్చాడు. ఈ ఘటనను ఇంకా మరువకముందే సంగారెడ్డిలో ప్రేమ పేరుతో యువకుడ్ని దారుణంగా హత్య చేయడం కలకలం రేపుతోంది.