Mohan Babu: మోహన్ బాబుపై హత్యాయత్నం కేసు

జర్నలిస్ట్‌పై దాడి కేసులో నటుడు మోహన్ బాబుకు బిగ్ షాక్ తగిలింది. ఆయనపై BNS 109 సెక్షన్ కింద పోలీసులు హత్యాయత్నం కేసు నమోదు చేశారు. బుధవారం మోహన్ బాబుపై 118 సెక్షన్ కింద ఎఫ్ఐఆర్ నమోదు చేసిన పోలీసులు లీగల్ ఒపీనియన్ తీసుకుని సెక్షన్‌ను మార్చారు. హైదరాబాద్‌లోని జల్‌పల్లిలో మోహన్ బాబు నివాసం వద్ద ఉద్రిక్త పరిస్థితులు నెలకొన్నాయి. ఇంట్లోకి వెళ్లేందుకు మనోజ్, మౌనిక దంపతులు ప్రయత్నించగా సెక్యూరిటీ సిబ్బంది వారిని అడ్డుకున్నారు. అనంతరం సెక్యూరిటీతో మనోజ్ వాగ్వాదానికి దిగి గేట్లు తోసుకుని మరీ లోపలికి వెళ్లారు. ఈ క్రమంలోనే కవరేజీ కోసం లోనికి వెళ్లిన మీడియా ప్రతినిధులను మోహన్ బాబు దుర్భాషలాడుతూ.. ఓ జర్నలిస్టుపై అమానుషంగా దాడికి పాల్పడ్డారు. ఈ ఘటనపై తెలంగాణ జర్నలిస్ట్ సంఘాలు, రాజకీయ, సినీ ప్రముఖులు తీవ్ర ఆగ్రహం వ్యక్తం చేశారు. జర్నలిస్ట్‌పై దాడి ఘటనలో మోహన్‌బాబుపై పహాడీ షరీఫ్ పోలీసులు 118 బీఎన్ఎస్ సెక్షన్ కింద కేసు నమోదు చేశారు. కాగా, ప్రస్తుతం లీగల్ ఒపీనియన్ తీసుకుని తాజాగా ఆయనపై BNS 109 సెక్షన్ కింద హత్యాయత్న కేసు నమోదు చేశారు.

మోహన్‌బాబుకు హైకోర్టులో ఊరట

సినీనటుడు మోహన్‌బాబు హైకోర్టులో ఊరట లభించింది. రాచకొండ పోలీసులు ఇచ్చిన నోటీసులపై స్టే ఇవ్వాలని కోరుతూ ఆయన పిటిషన్‌ వేశారు. మోహన్‌బాబు పిటిషన్‌పై విచారణ చేపట్టిన ధర్మాసనం పోలీసులు జారీ చేసిన నోటీసులపై స్టే ఇచ్చింది. రాచకొండ పోలీసుల ముందు విచారణకు హాజరయ్యేందుకు ఈనెల 24 వరకు మినహాయింపు ఇచ్చింది. తదుపరి విచారణను ఈనెల 24కు వాయిదా వేసింది.

మా నాన్న దేవుడు: మంచు మనోజ్

ప్రేమించిన అమ్మాయి కోసమే తాను పోరాడుతున్నానని మంచు మనోజ్ స్పష్టం చేశారు. మా నాన్న, అన్న కంపెనీల కోసం గొడ్డులా కష్టపడ్డానని తెలిపాడు. మీడియా మిత్రులకు అండగా ఉంటానని తెలిపాడు. మానాన్న దేవుడని మంచు మనోజ్ అన్నారు. మా నాన్న భుజంపై తుపాకీ పెట్టి తనను కాలుస్తున్నారని మనోజ్ ఆరోపించారు. మరో వైపు సాయంత్రం మనోజ్ పెట్టే ప్రెస్ మీట్‌పై సర్వత్రా ఆసక్తి నెలకొంది.