BY POLL: తెలంగాణలో మరో ఉప ఎన్నిక తథ్యమా..?
తెలంగాణ రాజకీయాల్లో మరో కీలక పరిణామానికి తెరలేవనున్నదా అన్న చర్చ జోరుగా సాగుతోంది. ఖైరతాబాద్ ఎమ్మెల్యేగా ఉన్న దానం నాగేందర్ తన పదవికి రాజీనామా చేయనున్నారన్న ఊహాగానాలు రాజకీయ వర్గాల్లో హాట్టాపిక్గా మారాయి. సీనియర్ నేతగా, నగర రాజకీయాల్లో బలమైన పట్టున్న నాయకుడిగా గుర్తింపు పొందిన దానం నాగేందర్ నిర్ణయం ఏదైనా రాష్ట్ర రాజకీయ సమీకరణాలపై ప్రభావం చూపుతుందన్న అభిప్రాయం వ్యక్తమవుతోంది. పార్టీ అంతర్గత పరిణామాలు, తాజా రాజకీయ కదలికల నేపథ్యంలో ఈ ప్రచారానికి మరింత బలం చేకూరుతోంది. ఈ వార్తలు నిజమైతే, ఖైరతాబాద్ రాజకీయ ముఖచిత్రమే కాకుండా తెలంగాణ రాజకీయాల్లోనూ కొత్త చర్చలకు దారితీయనున్నాయి. ఇటీవల నాగేందర్ చేసిన వ్యాఖ్యలు కూడా కలకలం రేపాయి. ఖైరతాబాద్ ఎమ్మెల్యే దానం నాగేందర్, రాజీనామా చేసి ఉపఎన్నికలకు వెళ్లే ధైర్యం తనకుందని, కార్యకర్తల అండతో ఆరుసార్లు గెలిచిన తాను మళ్లీ గెలిచి చూపిస్తానని సవాల్ విసిరారు. బీఆర్ఎస్ నాయకత్వంపై విమర్శలు గుప్పిస్తూ.. రేవంత్ రెడ్డి నాయకత్వంలో జరుగుతున్న అభివృద్ధిని చూసి ఓర్వలేకనే విపక్షాలు బురదజల్లుతున్నాయని ఆరోపించారు.
కీలక నిర్ణయం తీసుకునే దిశగా....
దానం నాగేందర్ రాజకీయ ప్రస్థానం గత కొంతకాలంగా అనేక మలుపులు తిరుగుతోంది. గత అసెంబ్లీ ఎన్నికల్లో బీఆర్ఎస్ గుర్తుపై ఖైరతాబాద్ నుండి విజయం సాధించిన ఆయన.. రాష్ట్రంలో మారిన రాజకీయ పరిణామాల నేపథ్యంలో ముఖ్యమంత్రి రేవంత్ రెడ్డి సమక్షంలో కాంగ్రెస్ పార్టీలో చేరారు. పార్టీ మారడమే కాకుండా.. ఆ తర్వాత జరిగిన పార్లమెంట్ ఎన్నికల్లో కాంగ్రెస్ అభ్యర్థిగా సికింద్రాబాద్ ఎంపీ స్థానానికి పోటీ చేశారు. అయితే.. అసెంబ్లీ సభ్యత్వానికి రాజీనామా చేయకుండానే మరో పార్టీలో చేరడంపై బీఆర్ఎస్ తీవ్ర అభ్యంతరం వ్యక్తం చేస్తూ, ఆయనపై అనర్హత వేటు వేయాలని స్పీకర్కు ఫిర్యాదు చేసింది. ఈ 'అనర్హత పిటిషన్' వ్యవహారం ప్రస్తుతం న్యాయస్థానంలో ఉండటంతో ఏ క్షణమైనా ఉపఎన్నికలు రావచ్చనే ప్రచారం సాగుతోంది.
రాజీనామాకు కారణం వాళ్లే
తన ఈ నిర్ణయం వెనుక గల కారణాలను దానం మీడియాతో పంచుకున్నారు. రాజీనామా చేయడానికి, అవసరమైతే ఉపఎన్నికల్లో పోటీ చేయడానికి తనకున్న ధైర్యం పార్టీ కార్యకర్తల నుంచే వచ్చిందని అన్నారు. "రాజీనామా చేయడానికి నా ధైర్యం కార్యకర్తలే, ఉపఎన్నికల్లో పోటీ చేయడానికి కూడా కార్యకర్తలే" అని ఆయన వ్యాఖ్యానించారు. కాగా బీఆర్ఎస్ నుంచి కాంగ్రెస్లోకి మారిన మొత్తం 10 మంది ఎమ్మెల్యేలపై డిస్క్వాలిఫికేషన్ పిటిషన్లు పెండింగ్లో ఉండగా, సీఎం రేవంత్ రెడ్డి ఆదేశిస్తే తాను రాజీనామాకు సిద్ధమని దానం నాగేందర్ ఇప్పటికే ప్రకటించారు.