CONGRESS: జూబ్లీహిల్స్ పోరు.. కాంగ్రెస్‌లో తీవ్ర పోటీ..!
తెలంగాణలో మరో ఉప ఎన్నిక రాజకీయ వేడి రాజేస్తోంది. జూబ్లీహిల్స్ ఎమ్మెల్యే మాగంటి గోపీనాథ్ మరణంతో హైదరాబాద్‌లో బై పోల్ అనివార్యంగా మారింది. ఆర్నెళ్లలోపు ఎన్నికలు జరిగే అవకాశం ఉండగా... ఈ ఉప ఎన్నిక ఏకగ్రీవం కాబోతుందా? సిట్టింగ్ స్థానాన్ని కాపాడుకునేందుకు బీఆర్ఎస్ ఎలాంటి ఎత్తులు వేయబోతుంది..? కంటోన్మెంట్ మాదిరిగా కాంగ్రెస్ కైవసం చేసుకోనుందా?, బీజేపీ, ఎంఐఎం వ్యూహాలేంటనేది ఆసక్తిగా మారింది. అయితే జూబ్లీహిల్స్ ఎమ్మెల్యే మృతితో ఖాళీ అయిన స్థానాన్ని మళ్లీ వారి కుటుంబానికే ఇచ్చే అవకాశం ఉంది. అయితే ఈ ఉప ఎన్నికల్లో ప్రధాన పార్టీలు పోటీ చేస్తాయా లేదా అన్నది మరింత ఉత్కంఠగా మారింది. అయితే ఒకవేళ ప్రధాన పార్టీలో బరిలోకి దిగితే... అభ్యర్థులుగా ఎవరిని పోటీలో నిలుపుతారనే దానిపైనా చర్చ జరుగుతోంది. ఆశావహులకు టికెట్లు దక్కకపోతే వాళ్లు ఏ మేరకు సహకరిస్తారనే చర్చ కూడా అప్పుడే మొదలైంది. జూబ్లీహిల్స్‌లో MIM ఓటు బ్యాంక్ బలంగా ఉంది. MIMతో స్నేహపూర్వక ఒప్పందం ఉన్న నేపథ్యంలో ఈ సారి వాళ్ల మద్దతుతో గెలవాలన్న ఆలోచనలో కాంగ్రెస్ పార్టీ ఉంది. ఇలాంటి చోట ఎలాగైనా గెలిచి BRSను ప్రజలు నమ్మడం లేదని ప్రూవ్ చేయాలని సీఎం రేవంత్ భావిస్తున్నట్లు సమాచారం.
ప్రతిష్టాత్మకంగా తీసుకున్న కాంగ్రెస్
జూబ్లీహిల్స్ ఉపఎన్నికను కాంగ్రెస్ పార్టీ ఎంతో ప్రతిష్టాత్మకంగా తీసుకుంటోంది. గ్రేటర్ పరిధిలోని సీటు కావడంతో ఈ ఎన్నిక ప్రాధాన్యత సంతరించుకుంది. 2023 ఎన్నికల్లో గ్రేటర్ హైదరాబాద్‌లో కాంగ్రెస్ ఒక్క సీటు కూడా గెలవకపోవడం ఆ పార్టీని ఇబ్బంది పెట్టింది. ఇప్పుడు ఆ లోటును తీర్చుకోవాలన్న పట్టుదలతో సీఎం రేవంత్ రెడ్డి సారథ్యంలోని కాంగ్రెస్ పార్టీ జూబ్లీహిల్స్ ఉపఎన్నికపై స్పెషల్ ఫోకస్ పెట్టింది. ఉపఎన్నికల్లో కాంగ్రెస్ అభ్యర్థిగా ఎవరు బరిలో దిగుతారన్న దానిపై ఆసక్తికర చర్చ సాగుతోంది. ప్రస్తుతం పార్టీ లోపల మూడు పేర్లు ప్రముఖంగా వినిపిస్తున్నాయి. మొదటి పేరు మహ్మద్ అజారుద్దీన్.. గత ఎన్నికల్లో కాంగ్రెస్ తరఫున అదే స్థానం నుంచి పోటీ చేసి ఓటమిపాలయ్యారు. ఇప్పుడు మళ్లీ అవకాశం ఇవ్వాలని కోరుతున్నట్లు సమాచారం. తనకు హైకమాండ్ సపోర్ట్ కూడా ఉందని ఆయన ప్రచారం చేసుకుంటున్నారు. రెండొవ పేరు నవీన్ యాదవ్.. గతంలో MIM తరఫున జూబ్లిహిల్స్ నుంచి పోటీ చేసి.. ఎన్నికలకు ముందు కాంగ్రెస్‌లోకి వచ్చిన నేత. మూడో పేరు విజయారెడ్డి.. ఖైరతాబాద్ కార్పోరేటర్, పీజేఆర్ కుమార్తె అయిన ఆమె కూడా రేసులో ఉన్నారు. వీళ్లతో పాటు మేయర్ విజయలక్ష్మి కూడా జూబ్లీహిల్స్ సీటుపై ఆసక్తి చూపుతున్నట్టు సమాచారం.