CPI: ఖమ్మం వేదికగా సీపీఐ వందేళ్ల పండుగ

వందేళ్ల చరిత్రను గుండెల్లో దాచుకున్న భారత కమ్యూనిస్టు పార్టీ శతాబ్ది ఉత్సవాలకు తెలంగాణలోని ఖమ్మం జిల్లా కేంద్రం వేదికగా నిలవనుంది. దేశ రాజకీయాల్లో వామపక్షాల పాత్ర, ప్రజా ఉద్యమాల ప్రాధాన్యం, సమకాలీన రాజకీయ సవాళ్లపై విస్తృత చర్చకు దారితీసే ఈ కార్యక్రమాలు నాలుగు రోజులపాటు ఘనంగా నిర్వహించనున్నారు. పార్టీ చరిత్రను తలుచుకుంటూనే భవిష్యత్ వ్యూహాలపై దృష్టి సారించే ఈ శతాబ్ది ఉత్సవాలు జాతీయ స్థాయిలో రాజకీయ ఆసక్తిని రేకెత్తిస్తున్నాయి. భారత కమ్యూనిస్టు పార్టీ వందేళ్ల పండుగ ముగింపు కార్యక్రమాలను ఈ నెల 18వ తేదీ నుంచి నాలుగు రోజులపాటు ఖమ్మంలో నిర్వహించనున్నారు. వామపక్ష రాజకీయాలకు బలమైన నేలగా గుర్తింపు పొందిన ఈ ప్రాంతంలో శతాబ్ది ఉత్సవాలను నిర్వహించడం పార్టీ శ్రేణుల్లో ఉత్సాహాన్ని నింపుతోంది. దేశవ్యాప్తంగా ఉన్న పార్టీ నాయకులు, కార్యకర్తలు, అనుబంధ సంఘాల ప్రతినిధులు ఖమ్మానికి తరలిరానున్నారు.

మొదటి రోజు భారీ కవాతు

ఉత్సవాల తొలి రోజు ఆదివారం ఖమ్మం నగరంలో పార్టీ శ్రేణుల భారీ కవాతు నిర్వహించనున్నారు. ఎర్రజెండాలతో, విప్లవ గీతాలతో సాగనున్న ఈ కవాతు వామపక్ష ఉద్యమాల చరిత్రను ప్రతిబింబించేలా ఉండనుంది. అనంతరం ఎస్‌ఆర్‌బీజీఎన్‌ఆర్ డిగ్రీ కళాశాల మైదానంలో భారీ బహిరంగ సభ జరగనుంది. ఈ బహిరంగ సభకు ముఖ్య అతిథిగా తెలంగాణ ముఖ్యమంత్రి రేవంత్ రెడ్డి హాజరుకానున్నారు. కమ్యూనిస్టు పార్టీతో తనకున్న అనుబంధాన్ని ఈ సందర్భంగా ఆయన పంచుకోనున్నారు. అలాగే పార్టీ ప్రధాన కార్యదర్శి డి. రాజా పార్టీ శ్రేణులకు మార్గనిర్దేశం చేయనున్నారు. జాతీయ కార్యదర్శులు, సీనియర్ నేతలు కూడా ఈ సభలో ప్రసంగించనున్నారు.

అంతర్జాతీయ అతిథుల హాజరు

సీపీఐ శతాబ్ది ఉత్సవాలకు అంతర్జాతీయ ప్రాధాన్యం కూడా లభిస్తోంది. చైనా, క్యూబా, వెనెజువెలా, వియత్నాం తదితర దేశాల నుంచి కమ్యూనిస్టు, వామపక్ష పార్టీల ప్రతినిధులు ఈ కార్యక్రమాలకు హాజరవుతారు. వివిధ దేశాల్లో వామపక్ష ఉద్యమాల అనుభవాలు, ప్రపంచ రాజకీయ పరిస్థితులపై వారి అభిప్రాయాలు ఈ వేదికపై వినిపించనున్నాయి. ఇది భారత వామపక్షాలకు అంతర్జాతీయ ఐక్యతను మరింత బలపరచే అవకాశంగా పార్టీ నేతలు భావిస్తున్నారు. ఉత్సవాల్లో భాగంగా సోమవారం జాతీయ సమితి (కౌన్సిల్) సమావేశాన్ని నిర్వహించనున్నారు. త్వరలో జరగనున్న కేరళ, తమిళనాడు, పశ్చిమ బెంగాల్, పుదుచ్చేరి శాసనసభ ఎన్నికల్లో పార్టీ అనుసరించాల్సిన వ్యూహాలపై ఈ సమావేశంలో విస్తృతంగా చర్చించనున్నారు. ప్రధాన కార్యదర్శి డి. రాజాతో పాటు జాతీయ కార్యదర్శులు, కార్యవర్గ సభ్యులు, సీనియర్ నాయకులు ఈ సమావేశంలో పాల్గొంటారు. ఎన్నికల రాజకీయాలు, కూటముల అవసరం, ప్రజా సమస్యలపై పోరాటాల రూపురేఖలు ఈ సమావేశంలో ఖరారు కానున్నాయి.