TG: పీసీబీతో కలిసి రంగంలోకి హైడ్రా

తెలంగాణలో హైడ్రా దూకుడు మరింత పెరగనుంది. హైదరాబాద్ లో చెరువుల పరిరక్షణ, కాలుష్య నియంత్రణకు హైడ్రా, పొల్యూషన్ కంట్రోల్ బోర్డు (PCB) కలిసి పని చేయాలని నిర్ణయించాయి. చెరువులు ఆక్రమణ, కాలుష్యానికి గురికాకుండా హైడ్రా చర్యలు ముమ్మరం చేసింది. వాటిని పరిరక్షిస్తూ పర్యావరణ హితంగా మార్చాలనే ప్రభుత్వ లక్ష్యానికి అనుగుణంగా హైడ్రా ముందడుగు వేసింది. ఈ మేరకు పొల్యూషన్ కంట్రోల్ బోర్డు కార్యాలయంలో పీసీబీ సెక్రటరీ రవితో హైడ్రా కమిషనర్ ఏవీ రంగనాథ్ సమావేశం అయ్యారు. ఈ సందర్భంగా పలు అంశాలపై కీలక చర్చలు జరిపి, వివిధ అంశాలపై కలిసి ముందుకెళ్లాలని నిర్ణయం తీసుకున్నారు. హైదరాబాద్ లోని కాలువలు, చెరువుల్లోకి మురుగు నీటితోపాటు పారిశ్రామిక వ్యర్థాలు రాకుండా తీసుకోవాల్సిన చర్యలపై రవి, ఏపీ రంగనాథ్ చర్చించారు. పారిశ్రామిక వ్యర్థాలు డంప్ చేయకుండా ఇరు విభాగాల సిబ్బందితో గట్టి నిఘా పెట్టాలని నిర్ణయించారు.

కీలక అంశాలు ప్రస్తావించిన రంగనాథ్

చెరువుల పరిరక్షణ, ప్రభుత్వ స్థలాలు ఆక్రమణలకు గురికాకుండా కాపాడడం, వరదనీరు, కాలువలు, ప్రజావసరాల కోసం కేటాయించిన స్థలాల పరిరక్షణ వంటి హైడ్రా లక్ష్యాలను రంగనాథ్.. పీసీబీతో జరిగిన సమావేశంలో ప్రస్తావించారు. చెరువుల్లోకి మురుగునీరు, పారిశ్రామిక వ్యర్థాలు, కాలుష్య కారకాలు చేరకుండా తీసుకోవాల్సిన చర్యలపై ఇరుపక్షాలు చర్చించాయి. ముఖ్యంగా కాలువల్లో పారిశ్రామిక వ్యర్థాలు డంప్ చేయకుండా ఇరు విభాగాల అధికారులతో నిఘా వ్యవస్థ ఏర్పాటు చేయాలని సమావేశంలో నిర్ణయించారు. చెరువులు, కాలువల్లో పారిశ్రామిక వ్యర్థాలు కలుస్తున్నాయా, లేదా? అనే విషయంలో ఆ నీటిని పరీక్షించాలని అధికారులు తీర్మానించారు. ఒకవేళ రసాయనాలు కలిస్తే అవి ఏ కంపెనీవో తెలుసుకునే వ్యవస్థనూ అభివృద్ధి చేయాలని నిర్ణయించారు.తద్వారా వారిపై చర్యలు తీసుకునే అవకాశం ఉంటుందని అధికారులు రంగనాథ్, రవి భావిస్తున్నారు. పారిశ్రామిక వర్గాలతో సమావేశం ఏర్పాటు చేసి పీసీబీ నిబంధనలు తూ.చ. తప్పకుండా పాటించేలా అవగాహన కల్పించాలని తీర్మానించారు. ఆ తర్వాత కూడా వారు వ్యర్థాలను కాలువల్లో కలిపితే ఆయా కంపెనీలపై కఠిన చర్యలు తీసుకోవాలని డిసైడ్ చేశారు. స్థానిక నివాసితులు, పర్యావరణ వేత్తలు, విద్యార్థులతో చెరువుల పరిరక్షణ కమిటీలు నియమించి, వారి భాగస్వామ్యంతో కాలుష్యానికి చెక్ పెట్టాలని అధికారులు భావిస్తున్నారు. ఇప్పటికే నమోదైన కేసులు, ఫిర్యాదుల ఆధారంగా లోతుగా విచారించి నిందితులను కట్టడి చేయాలని నిర్ణయం తీసుకున్నారు. పర్యావరణాన్ని కాపాడి భవిష్యత్ తరాలకు మెరుగైన జీవనాన్ని అందించాలన్న ముఖ్యమంత్రి రేవంత్ రెడ్డి దిశానిర్దేశం మేరకు ఇరు విభాగాలూ సమన్వయంతో కలసి పని చేయాలని నిర్ణయం తీసుకున్నాయి.

అమీన్ పూర్ మున్సిపాలిటీ పరిధిలో...

అమీన్ పూర్ మున్సిపాలిటీ పరిధిలో హైడ్రా అధికారులు కూల్చివేతలు చేపట్టారు. వందనపురి కాలనీలో 848 సర్వే నంబర్‌లో అక్రమ నిర్మాణంపై కొరడా ఝుళిపించారు.కొంతమంది రోడ్డును ఆక్రమించి ఇంటి నిర్మాణం చేపట్టారు. భారీ యంత్రాలతో రంగంలోకి దిగిన హైడ్రా అధికారులు వాటిని కూల్చివేశారు. అమీన్ పూర్‌లోని వందనపురి కాలనీలో అక్రమ భవనాన్ని హైడ్రా అధికారులు నేలమట్టం చేశారు. ఉద్రిక్త పరిస్థితులు తలెత్తకుండా పెద్ద ఎత్తున పోలీసులను మోహరించారు.