ప్రాణం తీసిన సెల్ఫీ సరదా.. పాముతో వీడియో చేస్తూ..

పాముతో చెలగాటం ఆడి ఓ యువకుడు ప్రాణాలు కోల్పోయాడు. చేతిలో కూడా కాదు నోట్లో పెట్టుకున్నాడు పాముని. వాడి పిచ్చికి దానికి తిక్క పుట్టింది. కాటు వేసి ప్రాణాలు తీసింది. ఈ విషాదకర సంఘటన తెలంగాణ లోని కామారెడ్డి జిల్లా బాన్సువాడ మండలం దేశాయి పేట గ్రామంలో చోటు చేసుకుంది.

స్థానికంగా నివసించే మోచి శివరాజ్ అనే యువకుడు పాములను పడుతూ జీవనం సాగిస్తుంటాడు. ఈ క్రమంలో అతడు రెండు అడుగుల పొడవున్న నాగు పామును పట్టుకున్నాడు. దాన్ని తీసుకెళ్లి అటవీ శాఖ అధికారులకు అప్పచెబితే బాగుండేది. దానితో సెల్ఫీ దిగాలని ముచ్చటపడ్డాడు.

విషనాగుని నోట్లో పెట్టుకుని సెల్ఫీ వీడియో కోసం ప్రయత్నించాడు. దాంతో ఆ పాము యువకుడి నోట్లో విషం చిమ్మింది. కొద్దిసేపటికే శివరాజ్ ప్రాణాలు కోల్పోయాడు. నాగు పాము విషం క్షణాల్లో శరీరం అంతా పాకి పోయి వెంటనే మృతి చెందాడు. ఈ సంఘటన స్థానికులను కలచి వేసింది.