MOHANBABU: మనోజ్.. నా గుండెల మీద తన్నావ్‌ రా: మోహన్‌బాబు
తన కుటుంబంలో చోటు చేసుకున్న పరిణామాలపై సినీనటుడు మోహన్‌బాబు తీవ్ర ఆవేదన వ్యక్తం చేస్తూ ఓ ఆడియో సందేషం విడుదల చేశారు. ఈ ఆడియోలో మంచు మనోజ్‌పై తీవ్ర ఆరోపణలు గుప్పించారు. "మనోజ్.. నిన్ను అల్లారుముద్దుగా పెంచాను. చదువు కోసం చాలా ఖర్చు పెట్టాను. భార్య మాటలు విని నా గుండెలపై తన్నావ్‌" అని ఆడియోలో మోహన్ బాబు ఆవేదన వ్యక్తం చేశారు. తాగుడుకు అలవాటుకు పడి చెడు మార్గంలో వెళ్తున్నావని.. కొన్ని కారణాల వల్ల ఇద్దరు ఘర్షణ పడ్డామన్నారు. ప్రతి ఇంట్లో గొడవలు ఉంటాయని మోహన్‌బాబు తెలిపారు. ఇంట్లో ఉన్న అందరినీ ఎందుకు కొడుతున్నావని మోహన్ బాబు ప్రశ్నించారు.
ఆడియో సందేశంలో ఆవేదన
‘మనోజ్.. నువ్వు నా బిడ్డవి. లక్ష్మీప్రసన్న, విష్ణువర్ధన్‌బాబు, మనోజ్ కుమార్‌ మిమ్మల్ని ఎలా పెంచాను? అందరికంటే నిన్నే గారాబంగా పెంచాను. నీకే ఎక్కువ ఖర్చుపెట్టి చదివించాలని ప్రయత్నించాను. నువ్వు ఏది అడిగినా నీకు ఇచ్చాను. ప్రతి కుటుంబంలోనూ ఘర్షణలు ఉంటాయి. జల్‌పల్లి ఇల్లు నా కష్టార్జితం.. నీకు సంబంధం లేదు. మంచు మనోజ్ మద్యానికి బానిసగా మారాడు. మద్యం మత్తులో ఎలాగో ప్రవర్తిస్తున్నాడు. ఇంట్లో పనిచేస్తున్న వారిపై దాడికి దిగడం మనోజ్‌కు సరికాదు. ఇక చాలు నా పరువు ప్రఖ్యాతలు మంటగలిపావు. నన్ను ఎవరూ మోసగాడు అనలేదు. నీకు జన్మనివ్వడమే నేను చేసిన పాపమా? ఆస్తులు ముగ్గురికీ సమానంగా రాయాలా? వద్దా? అనేది నా ఇష్టం. ఆస్తులు ఇస్తానా.. లేదా.. దాన ధర్మాలు చేస్తానా? అనేది నా ఇష్టం నా ఇంట్లో అడుగు పెట్టడానికి నీకు అధికారం లేదు.” అని ఆ ఆడియో సందేశంలో మోహన్ బాబు స్పష్టం చేశారు.
నీ వల్లే మీ అమ్మ ఆస్పత్రిలో చేరింది
మనోజ్ నీ వల్లే మీ అమ్మ ఆసుపత్రిలో చేరిందని మోహన్ బాబు అన్నారు. భార్య మాటలు విని తాగుడుకు అలవాటు పడ్డావని... తప్పు చేయనని చెప్పి మళ్లీ ఇంట్లోకి వచ్చావని మోహన్‌బాబు అన్నారు. మోహన్ బాబు కొడతాడు, తిడతాడు అనేది సినిమా షూటింగ్‌ల్లో తప్ప ఇంట్లో కాదని.. మోహన్‌బాబు ఆ ఆడియో సందేశంలో స్పష్టం చేశారు. తన ఫిర్యాదుపై పోలీసులు స్పందించ లేదు. తన ఇంట్లోకి ఎవరినీ రానివ్వకుండా అడ్డుకోవాల్సిన పోలీసులు చూస్తూ ఊరుకున్నారన్నారు. పోలీసు శాఖ అంటే నాకెంతో గౌరవం ఉందని.. న్యాయం, ధర్మంగా నడుచుకోవాలన్నారు. మనోజ్ వచ్చి తన బిడ్డను తీసుకెళ్లొచ్చని... రాకపోతే ఆ బిడ్డను జాగ్రత్తగా పెంచుతాన్నారు. ఆసుపత్రి నుంచి మీ అమ్మ డిశ్చార్జ్‌ అయిన తర్వాత .. పోలీసుల సమక్షంలో నీకు అప్పగించమని చెబుతానున్నారు. ఇక చాలు.. ఇంతటితో గొడవకు ముగింపు పలుకుదామని మనోజ్‌కు పంపిన ఆడియో సందేశంలో పేర్కొన్నారు.