MUNICPAL POLL: ముగిసిన నామినేషన్ల పర్వం.. పార్టీలకు తప్పని రెబల్ పోరు
రాష్ట్రవ్యాప్తంగా మున్సిపాలిటీలు, కార్పొరేషన్లలో నామినేషన్ల ఉపసంహరణ సందర్భంగా అలకలు, బుజ్జగింపులు, బెదిరింపులు, తోపులాటలు, ధిక్కరణలు చోటు చేసుకున్నాయి. అన్ని ప్రధాన పార్టీలకూ తిరుగుబాట్ల బెడద తాకగా, చివరి క్షణం వరకూ రాజకీయ ఉత్కంఠ నెలకొంది. అగ్రనాయకుల జోక్యంతో ఎక్కువమందిని ఉపసంహరణకు ఒప్పించినప్పటికీ, కొద్దిమంది స్వతంత్రులుగా బరిలో నిలిచారు. నామినేషన్ల ఉపసంహరణ గడువు మంగళవారం మధ్యాహ్నం 3 గంటలకు ముగియడంతో రాష్ట్రంలోని 2,996 వార్డులకు మొత్తం 12,993 మంది అభ్యర్థులు తుది పోటీలో నిలిచారు. ఈ దశలో 6,701 మంది తమ నామినేషన్లను ఉపసంహరించుకున్నారు. ఈ నెల 11న జరగనున్న మున్సిపల్ ఎన్నికలకు సంబంధించి ఒకే పార్టీ నుంచి ఒకే వార్డుకు నలుగురైదుగురు పోటీ పడటంతో అనేక చోట్ల నాటకీయ పరిణామాలు చోటు చేసుకున్నాయి. గద్వాలలో ఎమ్మెల్యే కృష్ణమోహన్రెడ్డి, కాంగ్రెస్ నాయకురాలు సరిత వర్గాల మధ్య విభేదాలు తలెత్తాయి. మంగళవారం ఉదయమే కృష్ణమోహన్రెడ్డి కాంగ్రెస్ అభ్యర్థులకు బీఫాంలు ఇవ్వగా, సరిత వర్గీయులు ఏడుగురు తామూ పోటీలో కొనసాగుతామని ప్రకటించారు. నిజామాబాద్ జిల్లా ఆర్మూర్లో కాంగ్రెస్ టికెట్ దక్కని నలుగురు ఆశావహులు విలేకర్ల సమావేశం ఏర్పాటు చేసి, తమకు అన్యాయం జరిగిందని, నామినేషన్లు ఉపసంహరించుకునే ప్రసక్తే లేదని స్పష్టం చేశారు. మిర్యాలగూడలో కాంగ్రెస్ ఎమ్మెల్యే లక్ష్మారెడ్డి తన ఇద్దరు కుమారులు, భార్యతో నామినేషన్లు దాఖలు చేయించడం చర్చనీయాంశమైంది.
మిర్యాలగూడలో కాంగ్రెస్ ఎమ్మెల్యే లక్ష్మారెడ్డి తన ఇద్దరు కుమారులు, భార్యతో నామినేషన్లు దాఖలు చేయించడం రాజకీయంగా చర్చనీయాంశమైంది. బుధవారం అక్కడ ముఖ్యమంత్రి రేవంత్రెడ్డి పర్యటన నేపథ్యంలో ఈ వివాదం ముదరకుండా మంగళవారం ముగ్గురితోనూ నామినేషన్లు ఉపసంహరింపజేశారు. ఇలాంటి కొన్ని చిన్నపాటి ఘటనలు మినహా నామినేషన్ల ఉపసంహరణ ప్రక్రియ మొత్తంగా ప్రశాంతంగా ముగిసినట్లు ఎన్నికల అధికారులు తెలిపారు. పెద్ద సంఖ్యలో అభ్యర్థులు బరిలో ఉండటంతో వారిని సర్దిచెప్పడం అగ్రనాయకులకు తలనొప్పిగా మారింది. ఈ నేపథ్యంలో అన్ని ప్రధాన పార్టీల నాయకులు హైదరాబాద్లోని తమ పార్టీ కార్యాలయాల నుంచే ఉపసంహరణల తతంగాన్ని పర్యవేక్షించారు.
నామినేషన్ల ఉపసంహరణల ప్రక్రియ పూర్తవడంతో రాష్ట్రవ్యాప్తంగా మున్సిపల్ ఎన్నికల బరిలో రాజకీయ సమరం స్పష్టంగా కనిపిస్తోంది. తిరుగుబాట్లు, అసంతృప్తులు కొంతమేర ఉన్నప్పటికీ, చివరికి అన్ని ప్రధాన పార్టీలు తమ అధికారిక అభ్యర్థులతో పోటీలోకి దిగాయి. కొద్దిమంది స్వతంత్రులు మినహా, ఎక్కువశాతం వార్డుల్లో ప్రధాన పార్టీల మధ్య నేరుగా పోటీ నెలకొంది. ముఖ్యంగా అధికార కాంగ్రెస్, ప్రతిపక్ష బీఆర్ఎస్, బీజేపీ మధ్య పట్టణ ప్రాంతాల్లో హోరాహోరీ పోరు తప్పదన్న సంకేతాలు కనిపిస్తున్నాయి. అధికారంలో ఉన్న కాంగ్రెస్ ప్రభుత్వంపై ప్రజాభిప్రాయం ఎలా ఉందన్నదే ఈ ఎన్నికల్లో కీలకంగా మారనుంది. అదే సమయంలో బీఆర్ఎస్ తమ గత పాలనలో చేపట్టిన అభివృద్ధి కార్యక్రమాలను ప్రస్తావిస్తూ ఓటర్లను ఆకర్షించేందుకు సిద్ధమైంది.