KCR: ఫోన్ ట్యాపింగ్ కేసులో కొత్త మలుపు… సిట్కు కేసీఆర్ లేఖ
ఫోన్ ట్యాపింగ్ కేసులో విచారణకు హాజరుకావాలంటూ సిట్ జారీ చేసిన నోటీసులపై భారత రాష్ట్ర సమితి అధ్యక్షుడు, మాజీ ముఖ్యమంత్రి కేసీఆర్ స్పందించారు. సిట్కు అధికారికంగా ప్రత్యుత్తరం పంపిన కేసీఆర్, శుక్రవారం జరగనున్న విచారణకు తాను హాజరుకాలేనని స్పష్టం చేశారు. ప్రస్తుతం మున్సిపల్ ఎన్నికల నామినేషన్ ప్రక్రియ కీలక దశలో ఉండటంతో, విచారణకు రావడం సాధ్యం కాదని ఆయన వివరించారు. నామినేషన్లకు గడువు ముగియనున్న నేపథ్యంలో పార్టీ అధ్యక్షుడిగా తనకు కీలక బాధ్యతలు ఉన్నాయని కేసీఆర్ పేర్కొన్నారు. ఈ కారణంగానే విచారణకు హాజరుకాలేకపోతున్నానని, అయితే భవిష్యత్తులో విచారణకు పూర్తిగా సహకరిస్తానని సిట్కు స్పష్టం చేశారు. మాజీ ముఖ్యమంత్రిగా, ప్రతిపక్ష నేతగా చట్టపరమైన ప్రక్రియలకు తాను గౌరవం ఇస్తానని తన ప్రత్యుత్తరంలో పేర్కొన్నారు.
అదే సమయంలో, తనను ఎర్రవల్లిలోనే విచారించాలని కేసీఆర్ సిట్ను కోరారు. క్రిమినల్ ప్రొసీజర్ కోడ్లోని 160వ సెక్షన్ ప్రకారం విచారణను ఒకే ప్రాంతంలోనే నిర్వహించాలనే నిబంధన లేదని ఆయన గుర్తు చేశారు. ఈ నేపథ్యంలో, అవసరమైతే తన నివాస ప్రాంతమైన ఎర్రవల్లిలో విచారణ చేపట్టాలని విజ్ఞప్తి చేశారు. భవిష్యత్తులో జారీ చేసే అన్ని నోటీసులను కూడా ఎర్రవల్లికే పంపాలని కోరారు.Bకేసీఆర్ సమాధానంపై స్పందించిన సిట్, ఆయన అభ్యర్థనలను పరిగణనలోకి తీసుకుంది. శుక్రవారం విచారణకు హాజరుకాలేనన్న కేసీఆర్ విజ్ఞప్తిని సిట్ అంగీకరించింది. విచారణ తేదీ, ప్రదేశం అంశాలపై న్యాయ సలహా తీసుకున్న అనంతరం తదుపరి నోటీసు జారీ చేయనున్నట్లు స్పష్టం చేసింది.
ఎర్రవల్లిలో విచారణ నిర్వహించాలన్న కేసీఆర్ అభ్యర్థనపై కూడా సిట్ న్యాయపరమైన అంశాలను పరిశీలించనుంది. చట్టపరంగా సాధ్యాసాధ్యాలను పరిశీలించిన తర్వాతే నిర్ణయం తీసుకుంటామని సిట్ అధికారులు తెలిపారు. ఈ అంశంపై పూర్తి స్పష్టత వచ్చిన తర్వాత మరో నోటీసును కేసీఆర్కు పంపనున్నట్లు వెల్లడించారు. మొత్తంగా ఫోన్ ట్యాపింగ్ కేసులో విచారణ ప్రక్రియ కొనసాగుతూనే ఉండగా, కేసీఆర్ సహకార ధోరణి ప్రదర్శించడం రాజకీయ వర్గాల్లో చర్చనీయాంశంగా మారింది. ఒకవైపు చట్టపరమైన విచారణ కొనసాగుతుండగా, మరోవైపు ఎన్నికల నేపథ్యంలో ఈ వ్యవహారం రాజకీయంగా కూడా ప్రాధాన్యం సంతరించుకుంది. రానున్న రోజుల్లో సిట్ తీసుకునే నిర్ణయాలు, తదుపరి నోటీసులు ఈ కేసు దిశను నిర్దేశించనున్నట్లు తెలుస్తోంది.