REVANTH: బీజేపీ లాభం కోసం దేశానికి నష్టం చేస్తారా?
దేశ రాజకీయాల్లో డీలిమిటేషన్ అంశం మళ్లీ చర్చనీయాంశంగా మారుతున్న వేళ, రాష్ట్రాల మధ్య సమతుల్యత, న్యాయం, ప్రజాస్వామ్య ప్రతినిధిత్వం వంటి కీలక అంశాలపై తెలంగాణ ముఖ్యమంత్రి రేవంత్ రెడ్డి గళమెత్తారు. జనాభా ఆధారంగా లోక్సభ నియోజకవర్గాల పునర్విభజన చేపట్టడం దేశ సమగ్రతకు దీర్ఘకాలంలో హానికరమవుతుందని ఆయన హెచ్చరించారు. తాత్కాలిక రాజకీయ లాభాల కోసం తీసుకునే నిర్ణయాలు భవిష్యత్లో తీవ్రమైన అసమానతలకు దారితీస్తాయని ఆయన అభిప్రాయపడ్డారు. డీలిమిటేషన్పై కేంద్ర ప్రభుత్వం ముందుకు తీసుకెళ్తున్న విధానంపై ఆయన తీవ్ర ఆందోళన వ్యక్తం చేశారు. ముఖ్యంగా దక్షిణాది రాష్ట్రాలు, చిన్న రాష్ట్రాలకు అన్యాయం జరిగే అవకాశం ఉందని స్పష్టం చేశారు. ఈ విషయంపై ప్రధాని నరేంద్ర మోదీకి సోషల్ మీడియా వేదికగా తన అభిప్రాయాలను తెలియజేసిన రేవంత్ రెడ్డి, మహిళా రిజర్వేషన్లు మరియు డీలిమిటేషన్ రెండూ వేర్వేరు అంశాలని గుర్తు చేశారు. మహిళలకు రాజకీయాల్లో ప్రాతినిధ్యం కల్పించడం అత్యంత అవసరమని, అయితే దాన్ని ఒక కవచంగా ఉపయోగించి జనాభా ఆధారిత డీలిమిటేషన్ను ముందుకు తేవడం సరికాదని విమర్శించారు. మహిళా రిజర్వేషన్ల విషయంలో కాంగ్రెస్ పార్టీ ఎప్పటి నుంచో మద్దతు ఇస్తోందని ఆయన పేర్కొన్నారు. స్వాతంత్ర్యం తర్వాత మహిళలకు ఓటు హక్కు కల్పించడం నుంచి ప్రారంభమైన ప్రయాణంలో రాజకీయ రిజర్వేషన్ల వరకు కాంగ్రెస్ పాత్ర కీలకమని గుర్తు చేశారు.
ప్రస్తుతం కూడా 33 శాతం మహిళా రిజర్వేషన్లను వెంటనే అమలు చేయాలని ఆయన డిమాండ్ చేశారు. దీనిని డీలిమిటేషన్తో ముడిపెట్టడం అనవసరమని, రాజకీయ ఉద్దేశంతో జరుగుతోందని ఆయన ఆరోపించారు. డీలిమిటేషన్ ప్రక్రియను 2011 జనాభా లెక్కల ఆధారంగా చేపట్టాలని కేంద్రం ఆలోచిస్తున్నదని ఆయన విమర్శించారు. అయితే 2026 జనాభా గణాంకాల ప్రకారం ఈ ప్రక్రియ జరగాలని కాంగ్రెస్ డిమాండ్ చేస్తోందని చెప్పారు. పాత లెక్కల ఆధారంగా ముందుకు వెళ్లడం వెనుక దాగి ఉన్న ఉద్దేశాలను ఆయన ప్రశ్నించారు. ఇది దేశంలోని కొన్ని ప్రాంతాలకు అనుకూలంగా, మరికొన్ని ప్రాంతాలకు ప్రతికూలంగా మారే ప్రమాదం ఉందని పేర్కొన్నారు.
దక్షిణాది రాష్ట్రాలు కుటుంబ నియంత్రణ విధానాలను సమర్థంగా అమలు చేసి జనాభా పెరుగుదలను నియంత్రించాయని ఆయన వివరించారు. దీనికి విరుద్ధంగా ఉత్తరాది రాష్ట్రాల్లో జనాభా వేగంగా పెరిగిందని చెప్పారు. ఇప్పుడు అదే జనాభాను ప్రాతిపదికగా తీసుకుని సీట్లను పెంచడం వల్ల దక్షిణాది రాష్ట్రాలకు అన్యాయం జరుగుతుందని ఆయన ఆందోళన వ్యక్తం చేశారు. ఇది దేశంలో ప్రాంతీయ అసమానతలను మరింత పెంచే అవకాశముందని హెచ్చరించారు. కేంద్రం ప్రతిపాదిస్తున్న విధంగా ప్రతి రాష్ట్రంలో 50 శాతం సీట్లను పెంచితే, పెద్ద రాష్ట్రాలకు అధిక లాభం చేకూరుతుందని ఆయన పేర్కొన్నారు. ముఖ్యంగా ఉత్తరప్రదేశ్, బిహార్, మధ్యప్రదేశ్, రాజస్థాన్ వంటి రాష్ట్రాల్లో సీట్ల సంఖ్య గణనీయంగా పెరుగుతుందని చెప్పారు.