SUCIDE: పరిశోధక విద్యార్థి బలవన్మరణం
హైదరాబాద్‌లో పరిశోధక విద్యార్థి బలవన్మరణానికి పాల్పడింది. పీహెచ్‌డీ చదువుతున్న విద్యార్థి దీప్తి.. నాచారం సరస్వతి కాలనీలో ఆత్మహత్య చేసుకుంది. విద్యార్థిని ఆత్మహత్యకు పోలీసుల వేధింపులే కారణమని తెలుస్తోంది. తన తండ్రిపై కేసు వ్యవహారంలో తనను ఇబ్బంది పెట్టి వేధించారని దీప్తి ఇప్పటికే ఆరోపణలు చేసినట్టు తెలిసింది. విషయం తెలుసుకున్న పోలీసులు ఘటనా స్థలాన్ని పరిశీలించారు. దీప్తి మృతదేహాన్ని పోస్టుమార్టానికి తరలించారు. ఘటనపై కేసు నమోదు చేసి దర్యాప్తు చేస్తున్నారు. అయితే విద్యార్థి దీప్తి ఆత్మహత్యతో ఆమె కుటుంబ సభ్యులు ఆగ్రహం వ్యక్తం చేస్తున్నారు. తనను వేధించడం వల్లే దీప్తి ఆత్మహత్య చేసుకున్నారని ఆరోపించారు. దీప్తి మృతి కారకులను కఠినంగా శిక్షించాలని డిమాండ్ చేస్తున్నారు.
అసలేమైందంటే..?
ఉద్యోగం ఇప్పిస్తానని తండ్రి తీసుకున్న డబ్బు తిరిగివ్వాలని ఆమెను వేధించడంతో మనస్తాపానికి గురై దీప్తి ఉరేసుకుని బలవన్మరణానికి పాల్పడినట్లు తల్లి పోలీసులకు ఫిర్యాదు చేసింది. పులివర్తి దీప్తి హబ్సిగూడలోని ఇండియన్‌ ఇన్‌స్టిట్యూట్‌ ఆఫ్‌ కెమికల్‌ టెక్నాలజీలో ప్రాజెక్టు అసిస్టెంట్‌గా పనిచేస్తున్నారు. దీప్తి తండ్రి సంగీతరావు ఐఐసీటీలో పనిచేసి పదవీ విరమణ పొందారు. సంగీతరావుకు డీజీపీ కార్యాలయంలో కానిస్టేబుల్‌గా పనిచేస్తున్న బెల్లా అనిల్‌తో పరిచయముంది. సంగీతరావు.. అనిల్ భార్య అనితకు ఐఐసీటీలో ఉద్యోగం ఇప్పిస్తానని రెండేళ్ల క్రితం రూ.15 లక్షలు తీసుకున్నాడు. ఈ ఏడాది సెప్టెంబరు వరకూ ఉద్యోగం ఇప్పించలేదు. దీంతో అనిల్ తన డబ్బు తిరిగివ్వాలని దీప్తిని అడిగేవాడు. డబ్బు తన తండ్రి తీసుకున్నాడని, ఆయన తమతో చాలా ఏళ్ల నుంచి కలిసి ఉండడం లేదని సమాధానం చెప్పింది. అనిల్ పట్టించుకోకుండా తన భార్యతో నాచారం ఠాణాలో ఫిర్యాదు చేయించాడు. దీప్తి, సంగీతరావు మీద ఛీటింగ్‌ కేసు నమోదైంది. అనిల్, అనిత న్యాయస్థానంలో సివిల్‌ దావా కూడా వేశారు. మనస్తాపానికి గురైన దీప్తి ఉరేసుకుని ఆత్మహత్య చేసుకుంది.
దీప్తి సెల్ఫీ వీడియోలో...
తన మరణానికి అనిల్, ఆయన భార్య అనిత, ఆమె తండ్రి సోమయ్య కారణమని దీప్తీ సెల్ఫీ వీడియోలో చెప్పింది. తన మీద నకిలీకేసు నమోదు చేయించి జీవితాన్ని నాశనం చేశారని చెప్పింది. తన మరణంతోనైనా కుటుంబానికి న్యాయం జరుగుతుందని... తన చావుకు కారణమైన వాళ్లకు శిక్షపడాలని దీప్తి ఆ వీడియోలో చెప్పింది.తన మృతదేహాన్ని వైద్య పరిశోధనకు ఇచ్చేయాలని కన్నీరు పెట్టుకుంటూ సెల్ఫీ వీడియో చిత్రీకరించింది.