SUCIDES: విద్యార్థులూ.. చదువొక్కటే మార్గం కాదు
తెలంగాణలో ఇంటర్మీడియట్ ఫలితాల విడుదల తర్వాత నెలకొన్న పరిస్థితులు సమాజాన్ని కలచివేస్తున్నాయి. విద్యార్థుల భవిష్యత్తుకు దారి చూపాల్సిన పరీక్షలు, కొందరి ప్రాణాలను బలి తీసుకుంటున్నాయన్న వాస్తవం ఆందోళన కలిగిస్తోంది. ఫలితాలు ఆశించిన విధంగా రాకపోవడంతో తీవ్ర మనస్తాపానికి గురవుతున్న విద్యార్థులు ఆత్మహత్యలకు పాల్పడుతున్న ఘటనలు వరుసగా వెలుగులోకి వస్తున్నాయి. గత మూడు రోజుల్లోనే రాష్ట్రవ్యాప్తంగా మొత్తం 13 మంది విద్యార్థులు ప్రాణాలు తీసుకోవడం పరిస్థితి ఎంత విషమంగా మారిందో సూచిస్తోంది. తాజాగా సంగారెడ్డి జిల్లాకు చెందిన రమేష్, నందిని, నిర్మల్ జిల్లాలోని మణివర్ధన్, భూక్యా ఆకాష్, అలాగే సిద్దిపేట జిల్లాకు చెందిన పొట్ల ప్రత్యూషలు ఆత్మహత్యలకు పాల్పడిన ఘటనలు తీవ్ర విషాదాన్ని మిగిల్చాయి. చదువులో వెనుకబడ్డామనే భావన, ఫలితాల కారణంగా సమాజానికి ఎలా ఎదురవుదామన్న ఆందోళన వీరిని ఈ దారుణ నిర్ణయానికి దారితీసినట్లు తెలుస్తోంది. ఈ సంఘటనలతో ఆయా ప్రాంతాల్లో విషాద వాతావరణం నెలకొంది.
ఇదే తరహా ఘటనలు ఇటీవల మరికొన్ని చోట్ల కూడా చోటుచేసుకున్నాయి. హైదరాబాద్లోని వారసిగూడకు చెందిన కళ్యాణి, నాచారానికి చెందిన లక్ష్య, మెదక్ జిల్లాకు చెందిన సాయిరాం, ఉట్నూర్ ప్రాంతానికి చెందిన సౌజన్య, భూత్పూర్ మండలానికి చెందిన శ్రావణి, సూర్యాపేట జిల్లాకు చెందిన మరో సౌజన్య, రంగారెడ్డి జిల్లాకు చెందిన అభియాదవ్ వంటి విద్యార్థులు కూడా ఇదే కారణాలతో తమ ప్రాణాలను తీసుకున్నారు. ఒక్కో కుటుంబం తమ పిల్లలను కోల్పోయి తీవ్ర విషాదంలో మునిగిపోగా, గ్రామాలు, కాలనీలు దుఃఖసాగరంలో మునిగిపోయాయి. ఈ పరిణామాలపై విద్యావేత్తలు, మనోవైద్య నిపుణులు తీవ్ర ఆందోళన వ్యక్తం చేస్తున్నారు. పరీక్షల ఫలితాలు జీవితాన్ని నిర్ణయించే ఏకైక ప్రమాణం కాదని వారు స్పష్టం చేస్తున్నారు. ఒకసారి విఫలమైతే అంతే అన్న భావనను విద్యార్థులు విడిచిపెట్టాలని, భవిష్యత్తులో మరిన్ని అవకాశాలు ఉన్నాయని గుర్తుచేస్తున్నారు. సప్లిమెంటరీ పరీక్షలు, ఇతర మార్గాల ద్వారా తిరిగి విజయాన్ని సాధించే అవకాశం ఎల్లప్పుడూ ఉంటుందని వారు చెబుతున్నారు. ఇలాంటి సందర్భాల్లో తల్లిదండ్రుల పాత్ర కీలకమని నిపుణులు అభిప్రాయపడుతున్నారు. పిల్లలపై అధిక ఒత్తిడి తీసుకురాకుండా, వారికి మానసిక ధైర్యం నూరిపోసే విధంగా ప్రోత్సహించాల్సిన అవసరం ఉందని సూచిస్తున్నారు. విఫలం అనేది అంతిమం కాదని హితవు పలుకుతున్నారు.