దేశానికే వ‌న్నె తెచ్చేలా సెక్రటేరియట్ నిర్మాణం ఉండాలి : సీఎం కేసీఆర్‌
తెలంగాణ సచివాలయ నిర్మాణ కౌశలం దేశానికే వన్నెతెచ్చే విధంగా, అలంకృత రూపంతో అద్భుతంగా వుండాలని.. పదికాలాల పాటు నిలిచివుండే తెలంగాణ సెక్రటేరియట్ ను పటిష్టమైన రీతిలో నిర్మించాలని సీఎం కేసీఆర్‌ అధికారులకు సూచించారు. నూతనంగా నిర్మిస్తున్న సచివాలయ పనుల పురోగతిని ముఖ్యమంత్రి పరిశీలించారు. సచివాయ నిర్మాణంలో, సుందరీకరణ కోసం, వినియోగించేందుకు రాజస్థాన్ నుంచి తెప్పించిన రెడ్ శాండ్ స్టోన్ తోపాటు ఇతర రాళ్ల నమూనాలను పరిశీలించారు.
సచివాలయ నైరుతి ప్రాంతాన్ని కాలినడకన పరిశీలించారు. నిర్మాణంలో వున్న పిల్లర్లను, బీమ్‌ల నాణ్యత, పనితీరును సమీక్షించారు. ఈ సందర్భంగా రోడ్లు భవనాల శాఖ మంత్రి ప్రశాంత్ రెడ్డి, అధికారులు సహా వర్క్ ఏజెన్సీ ప్రతినిధులకు నిర్మాణాల్లో చేపట్టవలసిన చర్యలకు సంబంధించి పలు సూచనలు చేశారు.ఆ తర్వాత ప్రగతి భవన్‌లో సెక్రటేరియట్ నిర్మాణంపై సీఎం కేసీఆర్‌ సమీక్షించారు. సాధించుకున్న తెలంగాణ రాష్ట్రం, అనతికాలంలోనే అభివృద్ది సంక్షేమ రంగాల్లో దేశానికే మార్గదర్శిగా పాలన సాగుతోందన్నారు. తెలంగాణ ఆత్మగౌరవం మరింత ఇనుమడించేలా, తెలంగాణ రాష్ట్ర పాలనా కేంద్రమైన సచివాలయాన్ని మనం నిర్మించుకోవాలన్నారు.
దేశం గర్వించే విధంగా పలు రాష్ట్రాలకు ఆదర్శంగా మన సచివాలయం నిలవాలన్నారు. ఉద్యోగులకు సందర్శకులకు ఆహ్లాదాన్ని పంచే విధంగా వాతావరణాన్ని నెలకొల్పాలని అధికారులకు సూచించారు. విశాలమైన అంతర్గత రోడ్లు, పలురకాల పూల మొక్కలతో విశాలమైన పచ్చిక బయళ్లను ఏర్పాటు చేసుకోవాలన్నారు. పార్లమెంటు రాష్ట్రపతి భవన్ సమీపంలో వున్న మాదిరి ధోల్ పూర్ స్టోన్ తో తీర్చిదిద్దిన ఫౌంటేన్లను నిర్మించుకోవాలన్నారు. అన్ని హంగులతో తెలంగాణ సచివాలయాన్ని గొప్పగా తీర్చిదిద్దాలని సీఎం కేసీఆర్‌ అన్నారు.