REVANTH: ఒలింపిక్స్ లక్ష్యంగా తెలంగాణ: సీఎం
తెలంగాణలో క్రీడల అభివృద్ధికి మరింత ప్రాధాన్యం ఇవ్వాలని రాష్ట్ర ప్రభుత్వం నిర్ణయించింది. భవిష్యత్తులో ఒలింపిక్స్ వంటి అంతర్జాతీయ క్రీడల్లో తెలంగాణ క్రీడాకారులు మెరుగైన ప్రతిభ కనబర్చేలా ప్రణాళికలు రూపొందించాలని ముఖ్యమంత్రి రేవంత్రెడ్డి సూచించారు. క్రీడాకారులకు అవసరమైన అత్యాధునిక సదుపాయాలు కల్పించడంతో పాటు అంతర్జాతీయ ప్రమాణాలతో క్రీడా మౌలిక వసతులను అభివృద్ధి చేయాలని అధికారులకు ఆదేశించారు. ఈ నేపథ్యంలో సోమవారం క్రీడాశాఖ పనితీరుపై ముఖ్యమంత్రి సమీక్ష నిర్వహించి పలు కీలక నిర్ణయాలు తీసుకున్నారు.
సమావేశంలో ముఖ్యంగా యంగ్ ఇండియా స్పోర్ట్స్ యూనివర్సిటీ అభివృద్ధి అంశంపై విస్తృతంగా చర్చ జరిగింది. ఈ యూనివర్సిటీలో అంతర్జాతీయ ప్రమాణాలకు అనుగుణంగా అన్ని రకాల క్రీడలకు అవసరమైన మైదానాలు, శిక్షణ కేంద్రాలు ఏర్పాటు చేయాలని సీఎం సూచించారు. భవిష్యత్తులో ఒలింపిక్స్ లక్ష్యంగా క్రీడాకారులకు శిక్షణ అందించేందుకు అన్ని విధాలుగా సౌకర్యాలు కల్పించాల్సిన అవసరం ఉందని ఆయన అన్నారు. రాష్ట్రంలో ఉన్న ప్రతిభావంతమైన క్రీడాకారులకు ప్రపంచ స్థాయి శిక్షణ అందేలా స్పోర్ట్స్ యూనివర్సిటీ నిర్మాణాలు ఉండాలని అధికారులను ఆదేశించారు. యూనివర్సిటీ నిర్మాణాలకు సంబంధించి రూపొందించిన పలు డిజైన్లను ముఖ్యమంత్రి పరిశీలించారు. మౌలిక సదుపాయాలు, క్రీడా మైదానాలు, శిక్షణ కేంద్రాలు వంటి అంశాలపై అధికారులతో చర్చించి కొన్ని మార్పులు, సూచనలు చేశారు. క్రీడాకారులకు అవసరమైన వసతులు ఒకే ప్రాంగణంలో లభించేలా ప్రణాళికలు రూపొందించాలని చెప్పారు.
అదేవిధంగా గచ్చిబౌలి ఔట్డోర్ స్టేడియాన్ని పునరుద్ధరించే అంశంపైనా సమావేశంలో చర్చ జరిగింది. స్టేడియాన్ని ఆధునిక సదుపాయాలతో తిరిగి అభివృద్ధి చేయడంతో పాటు అక్కడ ఇండోర్ స్టేడియం, యూనివర్సిటీ కాంప్లెక్స్, హాస్టల్ భవనాలు నిర్మించాలని సీఎం సూచించారు. క్రీడాకారులు సౌకర్యవంతంగా శిక్షణ పొందేందుకు అవసరమైన అన్ని మౌలిక వసతులు ఉండేలా చర్యలు తీసుకోవాలని అధికారులను ఆదేశించారు. అలాగే వివిధ క్రీడలకు అనుగుణంగా ప్రత్యేక మైదానాలు ఏర్పాటు చేయాలని చెప్పారు. తెలంగాణ భవిష్యత్తులో ఒలింపిక్స్, కామన్వెల్త్ క్రీడలకు ఆతిథ్యం ఇవ్వగల స్థాయికి ఎదగాలని ముఖ్యమంత్రి అభిప్రాయపడ్డారు. అంతర్జాతీయ స్థాయి క్రీడా వేదికగా తెలంగాణను నిలబెట్టాలంటే ఇప్పటి నుంచే సమగ్ర ప్రణాళికలు సిద్ధం చేయాలని సూచించారు.