భూమిక అలా చేయడం వల్ల నలబై రోజులు బయటకి కూడా రాలేకపోయాను : రవిబాబు

చేసింది తక్కువ సినిమాలే అయినప్పటికీ ఇండస్ట్రీలో దర్శకుడిగా రవిబాబుకి మంచి పేరుంది. విలక్షణ నటుడు చలపతిరావు కుమారుడిగా సినిమాల్లోకి ఎంట్రీ ఇచ్చాడు రవిబాబు.. ముందుగా విలన్ పాత్రలతో కెరీర్‌‌ని రాణించిన రవిబాబు.. ఆ తర్వాత దర్శకుడిగా మారాడు. 'అల్లరి' సినిమాతో దర్శకుడిగా మారి.. నువ్వీలా, అనసూయ, అవును మొదలగు విభిన్నమైన చిత్రాలను తీశాడు.

రవిబాబు నుంచి ఏమైనా సినిమా వస్తుందంటే చాలు ఆడియన్స్‌‌లో ఓ ఇంట్రెస్ట్ కలిగేలా చేశాడు. ఇదిలా ఉంటే 'అనసూయ' సినిమా షూటింగ్ సమయంలో జరిగిన ఓ సన్నివేశాన్ని ఓ యూట్యూబ్ ఛానల్‌‌తో పంచుకున్నారు రవిబాబు. 2007లో వచ్చిన ఈ సినిమాలో రవిబాబుతో పాటుగా నటి భూమిక కూడా కీ రోల్ ప్లే చేసింది. అయితే ఈ సినిమా షూటింగ్ సమయంలో భూమిక కారణంగా రవిబాబు చాలా ఇబ్బందులు పడ్డారట.

"సినిమా కోసం నేను గడ్డం, జట్టుతో పాటు కనుబొమ్మలను కూడా గీయించుకున్నాను .. అలా భూమికతో కలిసి ఓ సన్నివేశాన్ని తెరకెక్కించాను. ఆ తర్వాత షాట్ సమయానికి భూమిక తనకి హెల్త్ బాలేదని వెళ్ళిపోయింది. ఇక మరుసటి రోజు కూడా హెల్త్ బాలేదని చెప్పి దాదాపుగా నలబై రోజుల పాటు షూటింగ్‌‌కి రాలేదు. అప్పటికే గుండు, కనుబొమ్మలు లేకుండా నేను బయట తిరగలేకపోయాను. ఆ సమయంలో చాలా ఇబ్బంది పడ్డాను" అని రవిబాబు చెప్పుకొచ్చాడు.

కాగా రవిబాబు తాజాగా క్రష్ అనే సినిమాతో ప్రేక్షకుల ముందుకు వచ్చాడు. ఒటీటీ వేదికగా రిలిజైన ఈ చిత్రం యూత్‌‌ని బాగానే ఆకట్టుకుంటుంది.