Chinese Teenage Girl : కోటిన్నర బంగారం కేవలం రూ.680కే అమ్మిన టీనేజర్‌
ఓ బాలికకు తన స్నేహితుల్లో ధరించిన లిప్ స్టడ్స్ నచ్చాయి. వెంటనే వాటిని కొనుగోలు చేయాలని అనుకుంది. కానీ చేతిలో డబ్బులు లేవు. ఇంట్లో అమ్మను అడిగితే తిట్టింది. అందుకే ఏదో ఒకటి చేసివాటిని కొనుగోలు చేయాలని అనుకుంది. ఇందుకోసం తన తల్లి ధరించే రూ.1.16 కోట్ల బంగారాన్ని కేవలం రూ.680కే అమ్మేసింది.తన కూతురు చేసిన పనికి ఆ తల్లి ఒక్కసారిగా షాకైంది. ఈ సంఘటన చైనాలోని షాంఘైలోని వాన్లీ పోలీస్ స్టేషన్ పరిధిలో జరిగింది.
సౌత్ చైనా మార్నింగ్ పోస్ట్ ప్రకారం.. చైనాలోని షాంఘైలో ఒక టీనేజ్ అమ్మాయి తన తల్లికి చెందిన ఒక మిలియన్ యువాన్ల ( రూ. 1.16 కోట్లు) విలువైన ఆభరణాలను దొంగిలించి కేవలం 60 యువాన్లకు ( రూ. 680) అమ్మేసి లిప్ స్టడ్స్ (పోగులు) కొనుక్కుంది.
వాంగ్ అనే బాలిక తల్లి, పుటువో పబ్లిక్ సెక్యూరిటీ బ్యూరోలోని వాన్లి పోలీస్ స్టేషన్‌లో దొంగతనం జరిగినట్లు ఫిర్యాదు చేయడంతో ఈ ఘటన వెలుగులోకి వచ్చింది. వాంగ్ తన కుమార్తె, లి వాంగ్ తనకు తెలియకుండానే జేడ్ బ్రాస్‌లెట్‌లు, నెక్లెస్‌లు, జెమ్ స్టోన్ సహా అధిక విలువైన ఆభరణాలను దొంగిలించి ఆపై విక్రయించిందని తెలిపింది.
“ఆమె ఎందుకు అభరణాలను అమ్మాలనుకుంటుందో నాకు అర్థం కాలేదు” అని తల్లి వాంగ్ పోలీసులకు చెప్పింది. “ఆ రోజు తనకు డబ్బు అవసరమని నన్ను అడిగింది. నేను ఎంత అని అడిగినప్పుడు.. ఆమె నాకు ’60 యువాన్లు’ అని చెప్పింది. నేను ఎందుకు అని అడిగాను.. నేను లిప్ స్టడ్లు ఉన్న ఒకరిని చూశాను. చాలా బాగున్నాయి. నాకు కూడా అలాంటిది ఒకటి కావాలి’ అని చెప్పింది. ఆ లిప్ స్టడ్ ధర 30 యువాన్లు ( రూ. 340) అని లీ చెప్పింది. ఆమె 30 యువాన్ల ధర గల మరో జత లిప్ స్టడ్స్ కావాలని అడిగింది. దాంతో మొత్తం 60 యువాన్లు కావాల్సి వచ్చింది. అయితే, అందుకు తల్లి అంగీకరించలేదు. ఎలాగైన వాటిని కొనాలని నిర్ణయించుకున్న యువతి తల్లి లేని సమయంలో ఇంట్లోని విలువైన ఆభరణాలను దొంగిలించి విక్రయించింది.
చిన్నపిల్ల కావడంతో ఈ బంగారు ఆభరణాలను ఎక్కడ అమ్మాలో తనకు తెలియలేదు. వాస్తవానికి తాను దొంగిలించింది నిజమైన బంగారు నగలు అని కూడా ఆమెకు తెలియదు. అది రోల్డ్ గోల్డ్ అని తెలుసుకుని రీసైక్లింగ్ షాపులో అమ్మేసింది. తల్లి ఫిర్యాదుతో దర్యాప్తు చేపట్టిన పోలీసులు సీసీ ఫుటేజీ ఆధారంగా దొంగతనం చేసింది ఎవరో గుర్తించారు. ఆ రీసైక్లింగ్ షాపును ట్రాక్ చేసి అమ్మేసిన అన్ని ఆభరణాలను స్వాధీనం చేసుకున్నారు.