Mark Zuckerberg: ట్రంప్ సీక్రెట్‌ మిలిటరీ మీటింగ్‌లోకి జుకర్బర్గ్..
అమెరికా మాజీ అధ్యక్షుడు డొనాల్డ్ ట్రంప్ అత్యంత కీలకమైన సమావేశంలో ఉండగా మెటా సీఈవో మార్క్ జుకర్బర్గ్ అనూహ్యంగా ప్రత్యక్షం కావడం, ఆయన్ను బయటకు పంపించారంటూ వస్తున్న వార్తలు తీవ్ర చర్చనీయాంశమయ్యాయి. ట్రంప్ అధ్యక్షుడిగా ఉన్న సమయంలో వైట్‌హౌస్‌లోని ఓవల్ ఆఫీస్‌లో ఈ ఘటన జరిగినట్టు తెలుస్తోంది. అయితే, ఈ ఆరోపణలను అప్పటి వైట్‌హౌస్ వర్గాలు తోసిపుచ్చడంతో అసలు ఏం జరిగిందనే దానిపై భిన్న వాదనలు వినిపిస్తున్నాయి.
ఓవల్ ఆఫీస్‌లో డొనాల్డ్ ట్రంప్ అమెరికా వైమానిక దళానికి చెందిన ఉన్నతాధికారులతో తర్వాతి తరం యుద్ధ విమానాల గురించి అత్యంత రహస్యంగా చర్చిస్తున్నారు. ఆ సమయంలో మార్క్ జుకర్బర్గ్ హఠాత్తుగా సమావేశంలోకి వచ్చారని ఎన్‌బీసీ న్యూస్ ఒక కథనంలో పేర్కొంది. అత్యంత కీలకమైన ఈ భేటీలో పాల్గొనేందుకు జుకర్‌బర్గ్‌కు ఎలాంటి భద్రతా అనుమతులు లేవు. దీంతో ఆయన్ను అక్కడ చూసిన సైనిక అధికారులు తీవ్ర దిగ్భ్రాంతికి గురయ్యారని ఆ కథనం తెలిపింది.
పరిస్థితిని అర్థం చేసుకున్న అధికారులు, సమావేశం కొనసాగించడానికి వీలుగా జుకర్‌బర్గ్‌ను గదిలో నుంచి బయటకు వెళ్లి వేచి ఉండాల్సిందిగా కోరినట్టు సమాచారం. ఓవల్ ఆఫీస్‌లో గోప్యత కొరవడటంపై అధికారులు ఆశ్చర్యపోయారని ఒక అధికారి ఈ పరిస్థితిని ‘వింత ప్రపంచంలా ఉంది’ అని వ్యాఖ్యానించినట్టు ఎన్‌బీసీ నివేదించింది. అయితే ఈ సంఘటన కచ్చితంగా ఎప్పుడు జరిగిందనే దానిపై స్పష్టత లేదు.
మరోవైపు, ఎన్‌బీసీ కథనంలో వస్తున్న ఆరోపణలను ఓ సీనియర్ వైట్‌హౌస్ అధికారి ఖండించినట్టు డైలీ మెయిల్ పత్రిక నివేదించింది. సమావేశం నుంచి జుకర్‌బర్గ్‌ను బయటకు పంపించారనే వార్తల్లో వాస్తవం లేదని, అసలు విషయాన్ని తప్పుగా చిత్రీకరిస్తున్నారని ఆయన తెలిపారు.
అధ్యక్షుడు ట్రంప్ అభ్యర్థన మేరకే జుకర్బర్గ్ కేవలం పలకరించడానికి మాత్రమే లోపలికి వచ్చారని ఆ అధికారి వివరించారు. సైనిక అధికారులతో సమావేశం ముగిసిన తర్వాత జుకర్‌బర్గ్‌తో ట్రంప్‌కు వేరే భేటీ ఖరారైందని, అందుకే పలకరించి బయటకు వెళ్లి తన మీటింగ్ కోసం వేచి ఉన్నారని స్పష్టం చేశారు.
గతంలో డెమొక్రటిక్ పార్టీకి, వలస విధానాలకు మద్దతుగా నిలిచిన జుకర్బర్గ్.. ట్రంప్ హయాంలో ఆయనకు అనుకూలంగా మారినట్టు విశ్లేషణలు ఉన్నాయి. ట్రంప్ ప్రమాణ స్వీకార కార్యక్రమానికి కూడా జెఫ్ బెజోస్, ఎలాన్ మస్క్ వంటి ఇతర బిలియనీర్లతో పాటు జుకర్బర్గ్ కూడా హాజరైన విషయం తెలిసిందే.