Saif al-Islam: గడాఫీ కుమారుడు అంతం.. ఇంట్లోకి చొరబడి కాల్చివేత!
లిబియా మాజీ నియంత మౌమ్మర్ గడాఫీ కుమారుడు, ఒకప్పుడు ఆ దేశానికి కాబోయే పాలకుడిగా భావించిన సైఫ్ అల్-ఇస్లాం గడాఫీ (53) దారుణ హత్యకు గురయ్యారు. పశ్చిమ లిబియాలోని జింతాన్ నగరంలో ఉన్న ఆయన నివాసంలోకి నలుగురు సాయుధులు చొరబడి జరిపిన కాల్పుల్లో సైఫ్ మరణించినట్లు ఆయన రాజకీయ కార్యాలయం మంగళవారం ధ్రువీకరించింది.
సైఫ్ అల్-ఇస్లాం న్యాయవాది ఏఎఫ్పీ వార్తా సంస్థతో మాట్లాడుతూ.. ఇదొక ప్రణాళికాబద్ధమైన 'అసాసినేషన్' అని పేర్కొన్నారు. ఒక కమాండో యూనిట్ తరహాలో వచ్చిన నలుగురు వ్యక్తులు నేరుగా ఇంట్లోకి చొరబడి కాల్పులు జరిపారన్నారు. అయితే, ఈ దాడికి ఆదేశాలు ఇచ్చింది ఎవరు? దీని వెనుక ఉన్న రాజకీయ శక్తులు ఏవి? అనే విషయాలు ఇంకా బయటకు రాలేదు. మరోవైపు, సైఫ్ సోదరి స్పందిస్తూ ఆయన అల్జీరియా సరిహద్దుల్లో మరణించారని చెప్పడం పలు అనుమానాలకు తావిస్తోంది.
గడాఫీ 40 ఏళ్ల పాలనలో సైఫ్ అత్యంత ప్రభావవంతమైన వ్యక్తిగా ఉండేవారు. 2011 ప్రజా తిరుగుబాటులో గడాఫీ పతనం తర్వాత సైఫ్ అజ్ఞాతంలోకి వెళ్లారు. అదే ఏడాది పట్టుబడిన ఆయన దాదాపు పదేళ్ల పాటు బందీగా గడిపారు. విడుదలైన తర్వాత తిరిగి రాజకీయాల్లోకి వచ్చి అధ్యక్ష పదవికి పోటీ చేస్తానని ప్రకటించడం ద్వారా లిబియా రాజకీయాల్లో మళ్లీ సంచలనం సృష్టించారు.
గతంలో లిబియా తన సామూహిక విధ్వంసక ఆయుధాల ప్రోగ్రామ్ను వదులుకోవడంలో సైఫ్ కీలక పాత్ర పోషించారు. అలాగే 'లాకర్బీ' విమాన పేలుడు బాధితులకు పరిహారం అందించే చర్చల్లోనూ ఆయన ముందున్నారు. లిబియాకు కొత్త రాజ్యాంగం కావాలని, మానవ హక్కులను గౌరవించాలని కోరుతూ ఒక సంస్కర్తగా తనను తాను ప్రపంచానికి పరిచయం చేసుకునే ప్రయత్నం చేశారు.
సైఫ్ అల్-ఇస్లాం మృతితో లిబియాలో జరగాల్సిన ఎన్నికల ప్రక్రియ మరింత సందిగ్ధంలో పడింది. ఆయన మద్దతుదారులు దేశవ్యాప్తంగా ఆందోళనలకు దిగే అవకాశం ఉందని భద్రతా దళాలు హెచ్చరిస్తున్నాయి.