Eunice Newton Foote: ఈరోజు గూగుల్ డూడుల్‌లో ఉ‍న్నది ఎవరంటే..
ఈరోజు గూగుల్ డూడుల్‌ లో ఒక మహిళ ఫోటో ఉంది మీరు గమనించారా. ఆమె ఎవరు.. అసలు ఏంటి విషయం తెలుసుకోవాలనుకుంటున్నారా. అయితే ఇదిగో ఈ వివరాలు మీకోసమే. ఈ రోజు గూగుల్ 11 స్లయిడ్‌లతో ఓ డూడుల్‌ని విడుదల చేసింది. ఎందుకు గూగుల్ ఈరోజునే ఆ మహిళతో ఉన్న డూడిల్‌ రూపొందించిన నివాళులర్పించిందో మీకు తెలుసా..
ఆమె తొలిసారిగా గ్రీన్‌హౌస్‌ ప్రభావాన్ని కనుగొన్న తొలి వ్యక్తి. ఆమె పేరు యూనిస్‌ న్యూటన్‌ ఫుట్‌. అమెరికన్ శాస్త్రవేత్త. గతంలో, స్త్రీలు అంతగా చదువుకోని ఆరోజుల్లో, ఆమె చదువుకోవడమేగాక ఇలాంటి పరిశోధనల వైపుకి వెళ్ళింది. అవకాశమేలేని స్థితిలో అరుదైన ప్రయోగం వైపు ఆమె అడుగులు వేసి అందరికీ ఆదర్శంగా నిలిచింది. ఇంతకీ ఆమె ఏం చేసిందంటే..
ఫుట్‌ 1856లో ఓ ప్రయోగాన్ని నిర్వహించింది. గాజు సిలండర్లలో పాదరసంతో కూడిన థర్మామీటర్లను ఉంచింది. సిలిండర్‌లో కార్బన్‌ డయాక్సైడ్‌ ఉండటం వల్లే అది సూర్యరశ్మీ ప్రభావానికి గురైందని కనుగొంది. అంటే గాల్లో ఉండే కార్బన్‌ డయాక్స్‌డ్‌ స్థాయిల వల్ల వాతావరణం చాలా సులభంగా వేడుక్కుతుందనే విషయాన్ని గ్రహించడమే కాదు నిర్ధారించింది కూడా. అప్పుడు ఆమె చేసిన ఆ పరిశోధనలే నేటి వాతావరణ మార్పుల అవగాహన సదస్సులకు మూలం అయ్యింది.
ఇలా ఫుట్‌ తన పరిశోధనలను ప్రచురించిన తర్వాత వాతావరణ స్థిర విద్యుత్‌పై మరొక అధ్యయనాన్ని రూపొందించింది. మొత్తంగా ఆమె రెండు భౌతిక శాస్త్ర అధ్యయనాలను ప్రచురించిన మొదటి మహిళ. వాటిపై జరిగిన చర్చలే తదుపరి ప్రయోగాలకు దారితీశాయి.
ఆ తర్వాత దాన్నే ఇప్పుడు మనం 'గ్రీన్‌ హౌస్‌ ఎఫెక్ట్‌గా' పిలుస్తున్నాం. ఆమె వేసిన పునాది వల్లే ప్రపంచవ్యాప్తంగా ఉన్న శాస్త్రవేత్తలు వాతావరణ శాస్త్రాన్ని అభివృద్ధి చేసేందుకు కారణమైంది. అంతేగాదు గ్రీన్‌హౌస్‌ ప్రభావాన్ని, గ్లోబల్‌ వార్మింగ్‌ దాని ప్రభావం గురించి అధ్యయనం చేసిన తొలి మహిళగా అమెరికన్ శాస్త్రవేత్త ఫుట్‌ నిలిచింది. నిజానికి ఫుట్‌ 1819లో కనెక్టికట్‌లో జన్మించింది. ఆమె ట్రాయ ఫిమేల్‌ సెమినరీ అనే పాఠశాలలో చదువుకున్నారు.
ఇది విద్యార్థులను సైన్స్‌ తరగతులకు హాజరయ్యేలా చేయడమే గాక కెమిస్ట్రీ ల్యాబ్‌లోని ప్రయోగాల్లో పాల్గొనేలా ప్రోత్సహించేది. ఫుట్‌ ఒకపక్క పరిశోధనలు చేస్తూనే మహిళా హక్కుల ప్రచారానికి కూడా సమయం కేటాయించింది. ఐతే గొప్ప శాస్త్రవేత్త అయిన ఫుట్‌ 1888లో మరణించిన తరువాత ఒక శతాబ్దానికి పైగా ఫుట్‌ విజయాలను గుర్తింపు లభించలేదు. కానీ ఇప్పుడు గూగుల్ ఆమెకి నివాళులర్పిస్తూ సోమవారం ఈ డూడుల్‌ని రూపొందించింది.