Hungary: కొంప ముంచిన క్షమాభిక్ష.. హంగేరి అధ్యక్షురాలి రాజీనామా
చిన్నారిపై లైంగిక దాడి జరిగిన కేసులో నిందితుడికి సహకరించిన ఓ వ్యక్తికీ హంగరీ ప్రభుత్వం క్షమాభిక్ష ప్రసాదించడం వివాదానికి దారి తీసింది. ప్రతిపక్షాల నుంచి విమర్శలు వెల్లువెత్తడంతో శనివారం దేశ అధ్యక్షురాలు కటాలిన్ నోవాక్ తన పదవికి రాజీనామా చేశారు. ప్రజలను నొప్పించాలన్నది తన ఉద్దేశం కాదని ఈ సందర్భంగా ప్రకటించారు.
సమాజంలో జరిగే నేరాలను ఉపేక్షిస్తే అది తీవ్ర పరిణామాలకు దారి తీస్తుంది. అందుకే హత్యలు, దోపిడీలు, లైంగిక దాడుల కేసుల్లో శిక్షలు చాలా కఠినంగా ఉంటాయి. ఇక చిన్నారులపై లైంగిక దాడి జరిగిందంటే మరింత కఠినంగా వ్యవహరించాల్సి ఉంటుంది. చట్టం ముందు అందరూ సమానమేనని అన్ని దేశాలు తీర్మానించుకున్నాయి. కానీ.. ఓ నేరం పట్ల ఉదాసీనంగా వ్యవహరించడం మొదటికే మోసం వచ్చింది. ఏకంగా దేశ అధ్యక్ష పదవినే వదులుకోవాల్సిన పరిస్థితి వచ్చింది.
కొంతకాలం క్రితం ఓ బాలల సంరక్షణాలయ ప్రధాన అధికారి అక్కడి చిన్నారిపై లైంగిక దాడికి పాల్పడ్డాడన్న ఆరోపణలు వెలువెత్తాయి. ఈ దారుణాన్ని కప్పిపుచ్చేందుకు అధికారికి సహకరించిన మరో ఉద్యోగికి అధ్యక్షురాలు ప్రభుత్వ సూచన మేరకు క్షమాభిక్ష ప్రసాదించారు. ఇటీవలే ఓ వెబ్‌సైట్ ఈ విషయాన్ని బయటపెట్టడంతో దేశంలో ఒక్కసారిగా కలకలం రేగింది. ప్రతిపక్షాలు ప్రధాని రాజీనామాకు పట్టుబట్టాయి. దేశవ్యాప్తంగా నిరసనలు మొదలయ్యాయి. శుక్రవారం నిరసనకారులు ప్రెసిడెంట్ నివాసం ముందు ధర్నాకు దిగారు. ప్రధానితో పాటూ అధికార పక్షం మొత్తం ఈ ఘటనకు బాధ్యత వహించాలని డిమాండ్ చేశారు.
హంగరీ ప్రభుత్వాధికారం ప్రధాని చేతుల్లో ఉంటుంది. అధ్యక్షులకు నామమాత్రపు అధికారాలు ఉంటాయి. మార్చి 2022లో కటాలిన్ అధ్యక్ష బాధ్యతలు చేపట్టారు. ఓ మహిళకు ఈ బాధ్యతలు దక్కడం చరిత్రలో ఇదే తొలిసారి. వరల్డ్ పోలో ఛాంపియన్‌షిప్స్‌లో భాగంగా హంగరీ మ్యాచ్‌ వీక్షించేందుకు ఖతర్‌లో ఉన్న అధ్యక్షురాలు, నిరసనల విషయం తెలియగానే హుటాహుటిన స్వదేశానికి చేరుకున్నారు. విమానం దిగిన వెంటనే తాను రాజీనామా చేస్తున్నట్టు ప్రకటించారు. తన నిర్ణయంతో బాధపడ్డ వారందికీ క్షమాపణలు చెబుతున్నానని వ్యాఖ్యానించారు. అయితే, ప్రధాని కూడా గద్దెదిగాలంటూ ప్రతిపక్షాలు నిరసనలు కొనసాగిస్తున్నాయి.