Swiss Bank Account List: స్విస్‌ బ్యాంకులో భారతీయుల ఖాతాలు.. తాజా జాబితా విడుదల
Swiss Bank Account List: స్విస్‌ బ్యాంకుల్లో భారతీయ పౌరులు, సంస్థలకు చెందిన అకౌంట్ల వివరాలకు సంబంధించిన నాలుగో జాబితా భారత్‌కు చేరింది. ఇందులో బిజినెస్‌మెన్లతో పాటు కార్పొరేట్‌లు, ట్రస్టులకు చెందిన వందల అకౌంట్ల వివరాలున్నట్లు అధికారులు వెల్లడించారు. స్విట్జర్లాండ్‌తో జరిగిన సమాచార మార్పిడి ఒప్పందంలో భాగంగా బ్యాంకు అకౌంట్లకు సంబంధించి తాజా జాబితాను అందించింది.
అటోమేటిక్‌ ఇన్ఫర్మేషన్‌ ఎక్ఛేంజ్‌లో భాగంగా ఏటా ఈ జాబితా స్విట్జర్లాండ్‌ అందిస్తుండగా..తాజాగా 101 దేశాలకు చెందిన 34లక్షల అకౌంట్ల వివరాలను విడుదల చేసింది. ఈ జాబితాలో కొత్తగా నైజీరియా, పెరూ, టర్కీ, అల్బేనియా, బ్రూనీ దేశాలు చేరినట్లు ఫెడరల్‌ టాక్స్‌ అడ్మినిస్ట్రేషన్‌ తెలిపింది. దీంతో దాదాపు లక్ష అకౌంట్ల పెరిగినట్లు వెల్లడించింది. ఐతే 101 దేశాల పేర్లు, వాటి అకౌంట్ల వివరాలు బహిరంగంగా చెప్పనప్పటికీ ఆ జాబితాలో భారత్‌ ఉందని FTA చెప్పింది. ఆ వివరాలను ఈ ఏడాది సెప్టెంబర్‌లోనే భారత ప్రభుత్వానికి అందించినట్లు వెల్లడించింది.
అటోమేటిక్‌ ఇన్ఫర్మేషన్‌ ఎక్ఛేంజ్‌లో భాగంగా స్విట్జర్లాండ్‌లో మన దేశస్థుల అకౌంట్ల వివరాలతో కూడిన తొలి జాబితా 2019లో భారత ప్రభుత్వానికి అందింది. ఆ ఏడాది మొత్తం 75 దేశాలకు చెందిన అకౌంట్ల జాబితాను స్విట్జర్లాండ్‌ ప్రభుత్వం విడుదల చేసింది. తర్వాత 2020 సెప్టెంబర్‌లో రెండో జాబితా, 2021 మూడో జాబితాలో 86 దేశాల వివరాలను వెల్లడించింది.
ఐడీ, పేరు, అడ్రస్‌, నివాస దేశం, టాక్స్‌ ఐడీ, సంస్థకు చెందిన వివరాలు, అకౌంట్లో నగదు, మూలధనం వంటి అకౌంట్‌ వివరాలు ఆయా ప్రభుత్వాలకు అందించిన నివేదికలో ఉంటాయని ఎఫ్‌టీఏ తెలిపింది. అయితే, 2018 ఆ తర్వాత క్రియాశీలంగా ఉన్న అకౌంట్ల వివరాలు మాత్రమే ఎఫ్‌టీఏ వెల్లడిస్తోంది.