Iran: హర్మూజ్ జలసంధిని మూసేసిన ఇరాన్..
పశ్చిమాసియాలో ఉద్రిక్త పరిస్థితులు మరింత ఉధృతమవుతున్నాయి. అమెరికా – ఇజ్రాయెల్లతో పెరుగుతున్న ఘర్షణల నేపథ్యంలో ఇరాన్ కీలక నిర్ణయం తీసుకున్నట్టు ప్రకటించింది. ప్రపంచ చమురు వాణిజ్యానికి అత్యంత కీలక మార్గమైన హోర్ముజ్ జలసంధిని మూసివేస్తున్నట్టు అధికారిక ప్రకటన వెలువడటంతో అంతర్జాతీయ వాణిజ్య రంగంలో తీవ్ర ఆందోళనలు వ్యక్తమవుతున్నాయి.
‘దాటితే తగలబెడతాం’ – ఇరాన్ హెచ్చరిక
ఇరాన్ ఇస్లామిక్ రివల్యూషనరీ గార్డ్ కార్ప్స్కు చెందిన Islamic Revolutionary Guard Corps (IRGC) సీనియర్ వర్గాల నుంచి వచ్చిన ప్రకటన ప్రకారం, జలసంధి గుండా ప్రయాణించేందుకు ప్రయత్నించే ఏ నౌకనైనా లక్ష్యంగా చేసుకుంటామని హెచ్చరించారు. IRGC కమాండర్-ఇన్-చీఫ్కు సీనియర్ సలహాదారుగా వ్యవహరిస్తున్న బ్రిగేడియర్ జనరల్ సర్దార్ ఇబ్రహీం జబారీ, ప్రభుత్వ మీడియా ద్వారా ఈ హెచ్చరికను జారీ చేసినట్లు సమాచారం.
అయితే, ఈ ప్రకటనను United States Central Command (CENTCOM) ఖండించింది. జలసంధి యథావిధిగా తెరిచి ఉందని, అంతర్జాతీయ రవాణా కొనసాగుతోందని అమెరికా వర్గాలు స్పష్టం చేశాయి.
క్షేత్రస్థాయిలో గందరగోళం
రెండు దేశాల నుంచి విరుద్ధ ప్రకటనలు వచ్చినప్పటికీ, సముద్ర మార్గాల్లో ఉద్రిక్త పరిస్థితి నెలకొన్నట్టు తెలుస్తోంది. ఇటీవల వాణిజ్య నౌకలపై జరిగిన దాడులు, ఇరాన్ హెచ్చరికల నేపథ్యంలో అనేక అంతర్జాతీయ షిప్పింగ్ సంస్థలు తమ సర్వీసులను తాత్కాలికంగా నిలిపివేశాయి. యుద్ధ నష్ట బీమా కవరేజీని కొన్ని ఇన్సూరెన్స్ సంస్థలు రద్దు చేయడంతో నౌకల రాకపోకలు దాదాపు స్తంభించిపోయాయి.సమాచారం ప్రకారం, 150కు పైగా వాణిజ్య నౌకలు హోర్ముజ్ జలసంధి వెలుపల నిలిచిపోయిన పరిస్థితి ఏర్పడింది.
‘ఆపరేషన్ ఎపిక్ ఫ్యూరీ’ ప్రభావం
ఫిబ్రవరి 28న అమెరికా–ఇజ్రాయెల్ సంయుక్తంగా “ఆపరేషన్ ఎపిక్ ఫ్యూరీ” పేరుతో ఇరాన్పై సైనిక చర్యలు ప్రారంభించినట్లు నివేదికలు సూచిస్తున్నాయి. ఈ దాడుల్లో ఇరాన్ సుప్రీం లీడర్గా ఉన్న అయతొల్లా అలీ ఖమేనీ మరణించినట్టు అధికారిక ప్రకటన వెలువడిన విషయం తెలిసిందే. దీనికి ప్రతీకారంగానే ఇరాన్ హోర్ముజ్ జలసంధిని మూసివేసినట్టు విశ్లేషకులు భావిస్తున్నారు.
ప్రపంచ ఆర్థిక వ్యవస్థపై ప్రభావం?
ప్రపంచ రోజువారీ చమురు సరఫరాలో దాదాపు 20 శాతం ఈ మార్గం గుండా రవాణా అవుతుంది. హోర్ముజ్ జలసంధి మూసివేత కొనసాగితే అంతర్జాతీయ చమురు ధరలు భారీగా పెరిగే అవకాశం ఉంది. ఇది గ్లోబల్ ఆర్థిక వ్యవస్థపై తీవ్ర ప్రభావం చూపే ప్రమాదం ఉందని ఆర్థిక నిపుణులు హెచ్చరిస్తున్నారు. ప్రస్తుతం పరిస్థితులు వేగంగా మారుతున్నందున, తదుపరి పరిణామాలపై ప్రపంచ దేశాలు ఆందోళనతో ఎదురుచూస్తున్నాయి.