Pakistan : చర్చిలపై అల్లరిమూకల దాడి
ఖురాన్ను అవమానించారన్న ఆరోపణలతో పాకిస్తాన్లోని ఫైసలాబాద్లో స్థానిక క్రైస్తవులపై నిరసనకారులు దాడులు చేశారు. చర్చి పరిసర ప్రాంతాల్లోని క్రైస్తవులు నివసించే ప్రాంతాల్లో లూటీలకు తెగబడ్డారు. ఒక క్రైస్తవ మతస్తుడు ఇస్లాం దైవదూషణకు పాల్పడ్డారనే నెపంతో గుర్తుతెలియని వ్యక్తులు ఈ విధ్వంసానికి పూనుకున్నారని తెలుస్తోంది. అక్కడ పరిస్థితిని నియంత్రించడానికి పాకిస్తాన్ రేంజర్లు రంగంలోకి దిగాయి.
ఒక క్రైస్తవ వ్యక్తి, అతని సోదరి ఖురాన్ను అపవిత్రం చేసి అభ్యంతరకర వ్యాఖ్యలు చేయడంతో ఈ దాడులకు పాల్పడినట్లు ప్రాథమిక విచారణలో తేలింది. ఫైసలాబాద్లో జరిగిన ఈ సంఘటనలో ఒక ముస్లిం వర్గం చర్చి ఆస్తులకు నిప్పు పెట్టారు. జరన్వాలాలో ఐదు చర్చిలను ధ్వంసం చేశారు. ఈ ఘటనా నేపథ్యంలో ఎటువంటి అవాంఛనీయ ఘటనలు జరగకుండా ఉండేందుకు పారామిలటరీ బలగాలు మోహరించాయి. ప్రాంతీయ రాజధాని లాహోర్కు 130 కి.మీ దూరంలో పంజాబ్ ప్రావిన్స్లోని ఫైసలాబాద్ జిల్లాకు చెందిన చమ్రా మండి జరన్వాలాలో నివసిస్తున్న క్రైస్తవులను రక్షించడానికి పరిస్థితిని నియంత్రించడానికి పాకిస్తాన్ రేంజర్లను పిలిపించారు.
జరన్వాలాలోని ఐదు చర్చిలను గుర్తుతెలియని వర్గం తగులబెట్టింది. వాటిలో సాల్వేషన్ ఆర్మీ చర్చి, యునైటెడ్ ప్రెస్బిటేరియన్ చర్చి, అలైడ్ ఫౌండేషన్ చర్చి, ఇసా నగ్రిలో ఉన్న షెహ్రూన్వాలాలోని రెండు చర్చిలు ఉన్నాయి.అలాగే జరన్వాలా ప్రాంతంలో దైవదూషణకు పాల్పడిన క్రైస్తవ క్లీనర్ ఇంటిని కూడా కూల్చివేశారు ఫర్నిచర్, బైబిల్ కాపీలు, క్రాస్ మొదలైన వాటికి నిప్పు పెట్టడంతో భారీగా పోలీసు బృందం సంఘటనా స్థలానికి చేరుకున్నారు.
ఒక క్రిస్టియన్ వ్యక్తి వేరే వర్గం యొక్క పవిత్ర గ్రంథాన్ని అపవిత్రం చేశాడని మసీదుల నుంచి ప్రకటన రావడంతో పెద్ద సంఖ్యలో ప్రజలు అక్కడికి చేరుకొని చర్చిలపై దాడి చేసినట్లు ప్రత్యక్ష సాక్షులు చెబుతున్నారు. ముఖ్యంగా చామ్ర మండిలోని క్రైస్తవ సంఘం వైపు ఆగ్రహించిన గుంపును చూసి, క్రైస్తవులు ప్రాణాల కోసం పరుగులు తీశారు. కొందరు ఆ ప్రాంతాన్ని విడిచిపెట్టగా, మరికొందరు తమ ఇళ్లకు తాళాలు వేసుకున్నారు.
చట్టాన్ని ఉల్లంఘించి మైనారిటీలను టార్గెట్ చేసే వారిపై కఠిన చర్యలు తీసుకుంటామని తాత్కాలిక ప్రధాని అన్వర్ ఉల్ హక్ కకర్ అన్నారు. 295C కింద, ప్రవక్తను అపవిత్రం చేసినందుకు నిందితులు మరణశిక్ష లేదా జీవిత ఖైదును ఎదుర్కొంటారు. అలాగే సెక్షన్ 295 B ప్రకారం, ఎవరైనా ఖురాన్ కాపీని లేదా దానిలోని సారాన్ని అపవిత్రం చేసినా లేదా ఏదైనా అవమానకరమైన రీతిలో లేదా ఏదైనా చట్టవిరుద్ధమైన పని కోసం ఉపయోగించినట్లయితే జీవితాంతం జైలు శిక్ష విధించబడుతుంది.