నా భార్యకు బాత్ రూమ్ క్లీనర్ కలిపిన ఆహారం ఇచ్చారు: జైల్లో ఉన్న ఇమ్రాన్ ఖాన్ ఆరోపణ
జైల్లో ఉన్న పాకిస్థాన్ మాజీ ప్రధాని ఇమ్రాన్ ఖాన్ తన భార్య బుష్రా బీబీకి ‘టాయిలెట్ క్లీనర్’తో కూడిన ఆహారం ఇచ్చారని శుక్రవారం ఆరోపించారు. "విషపూరితమైన ఆహారం" తిన్న తర్వాత ఆమె కడుపు ఇన్ఫెక్షన్‌తో బాధపడుతోంది. దాంతో ఆమె ఆరోగ్యం క్షీణించిందని అతను పేర్కొన్నాడు.
బుష్రా బీబీ, 49, ఇటీవల అవినీతి కేసులో అలాగే ఇమ్రాన్ ఖాన్ (71)తో అక్రమ వివాహం చేసుకున్న కేసులో దోషిగా నిర్ధారించబడింది. ప్రస్తుతం ఇస్లామాబాద్ శివారులోని వారి బని గాలా నివాసంలో నిర్బంధంలో ఉంది . రావల్పిండిలోని అడియాలా జైలులో అవినీతి కేసు విచారణ సందర్భంగా పాకిస్థాన్ తెహ్రీక్-ఏ-ఇన్సాఫ్ (పీటీఐ) చీఫ్ కూడా అయిన ఇమ్రాన్ ఖాన్ ఈ ఆరోపణలు చేశారని పాక్ మీడియా నివేదించింది.
ఇస్లామాబాద్‌లోని షిఫా ఇంటర్నేషనల్ హాస్పిటల్‌లో బుష్రా బీబీకి పరీక్షలు నిర్వహించాలని షౌకత్ ఖానుమ్ హాస్పిటల్ చీఫ్ మెడికల్ ఆఫీసర్ డాక్టర్ అసిమ్ యూసఫ్ సిఫార్సు చేశారని మాజీ క్రికెటర్ ఇమ్రాన్ ఖాన్ తెలిపారు.
పాకిస్తాన్ ఇన్‌స్టిట్యూట్ ఆఫ్ మెడికల్ సైన్సెస్ (పిమ్స్) ఆసుపత్రిలో పరీక్షలు నిర్వహించడంపై జైలు అధికారులు మొండిగా వ్యవహరిస్తున్నారని ఆయన ఆరోపిస్తున్నారు. విచారణ సందర్భంగా, కస్టడీలో ఉన్నప్పుడు విలేకరుల సమావేశాలు నిర్వహించకుండా ఉండాలని న్యాయమూర్తి ఇమ్రాన్‌ను కోరారు. దీనికి ప్రతిస్పందనగా, మాజీ ప్రధాని తన ప్రకటనలు తప్పుగా ఉటంకించబడినందున జర్నలిస్టులతో క్రమం తప్పకుండా మాట్లాడాల్సి వస్తోందని తెలిపారు.
పలు కేసుల్లో దోషిగా తేలిన ఇమ్రాన్ ఖాన్ విచారణ అనంతరం మీడియాతో 10 నిమిషాల ఇంటరాక్షన్‌కు అనుమతించాలని అభ్యర్థించారు. ఏప్రిల్ 17న బుష్రా బీబీని జైలులో పెట్టడానికి పాకిస్థాన్ ఆర్మీ చీఫ్ జనరల్ అసిమ్ మునీర్ నేరుగా కారణమని ఇమ్రాన్ ఖాన్ ఆరోపించారు. తన భార్యకు ఏదైనా జరిగితే జనరల్ మునీర్ బాధ్యత వహించాల్సి ఉంటుందని అన్నాడు.
"నా భార్యకు విధించిన శిక్షలో జనరల్ అసిమ్ మునీర్ ప్రత్యక్ష ప్రమేయం ఉంది," అని అతను చెప్పాడు."నా భార్యకు ఏదైనా జరిగితే, నేను అసిమ్ మునీర్‌ను విడిచిపెట్టను, నేను జీవించి ఉన్నంత వరకు అసిమ్ మునీర్‌ను వదలను. అతని రాజ్యాంగ విరుద్ధమైన మరియు చట్టవిరుద్ధమైన చర్యలను బహిర్గతం చేస్తాను" అని చెప్పాడు.
