Israel-Hamas War : ఇజ్రాయెల్ దాడులతో సగం గాజా ఖాళీ...

ఇజ్రాయెల్- హమాస్ మధ్య యుద్ధం కొనసాగుతోంది. రెండు వైపుల నుంచి వైమానిక దాడులు కొనసాగుతున్నాయి. యుద్ధంలో ఇప్పటికే వేలాది మంది ప్రాణాలు ఇంకొన్ని వేల సంఖ్యలో గాయపడ్డారు. భీకర దాడులతో ఇజ్రాయెల్-హమాస్‌లో పెద్ద పెద్ద భవనాలు, ఇళ్లు ధ్వంసమయ్యాయి. రెండు దేశాల్లోని హృదయ విదారక ఘటనలు మనసును కలిచివేస్తున్నాయి. పాలస్తీనా గ్రూప్ హమాస్‌పై ఇజ్రాయెల్ బాంబు దాడులు ప్రారంభించినప్పటిని నుంచి ఉత్తర గాజా స్ట్రిప్‌లో ఒక మిలియన్ ప్రజలు తమ ఇళ్లను విడిచిపెట్టి వెళ్లిపోయారు. ఇజ్రాయెల్ హెచ్చరికలతో వారంతా సురక్షిత మార్గాల ద్వారా తప్పించుకున్నారు. ప్రాణాలు అరచేతిలో పెట్టుకుని కట్టుబట్టలతో వెళ్లిపోయారు. ఈ విషయాన్ని ఐక్యరాజ్యసమితి అధికారికంగా ప్రకటించింది. కాగా గాజా మొత్తంలో నివసించే జనాభాలో ఉత్తర గాజాలోనే దాదాపు సగం మంది నివసిస్తున్నారు. గాజా మొత్తంలో 2.4 మిలియన్ల జనాభా ఉండగా.. ఉత్తర గాజాలోనే 1.1 మిలియన్ల మంది నివసిస్తున్నారు.

ఉత్తర గాజాను ఖాళీ చేయాలని అల్టీమేటం జారీ చేసిన ఇజ్రాయెల్‌ తాజాగా దక్షిణ గాజా ప్రాంతంపై కూడా వైమానిక దాడులు చేస్తోంది. ఈ దాడుల్లో వందల భవనాలు, కట్టడాలు నేలమట్టమయ్యాయి. కూలిన శిథిలాల కింద వందల సంఖ్యలో చిక్కుకొని ఆర్తనాదాలు చేస్తున్నారు. ఈ దాడుల్లో పెద్దఎత్తున ప్రాణనష్టం జరిగినట్లు తెలుస్తోంది. ఖాన్‌యూనిస్‌ అనే ప్రాంతంలో క్షతగాత్రులు, సాధారణ రోగులతో గత ఎనిమిది రోజులుగా ఆసుపత్రులు కిటకిటలాడుతున్నాయి. ఆసుపత్రుల్లో ఔషధాలు., ఆక్సిజన్‌, రక్తం కొరతతో బాధితులు ఇబ్బందులు పడుతున్నారు. కొంతమంది స్థానికులు స్వచ్ఛందంగా రక్తం ఇస్తున్నారు. విద్యుత్‌ లేక యూనిస్‌ ఆసుపత్రుల్లో జనరేటర్ల సాయంతో రోగులకు వైద్యం అందిస్తున్నారు. అయినప్పటికీ తీవ్రమైన వైద్యుల కొరత., ఇంధనం లేక వేలాది మరణాలు సంభవించనున్నట్లు ప్రపంచ ఆరోగ్య సంస్థ ఆందోళన వ్యక్తం చేసింది.

మరోవైపు ఇజ్రాయెల్‌ దాడుల్లో గాజా దక్షిణ ప్రాంతంలోని పౌరుల ఇళ్లు పెద్దఎత్తున ధ్వంసమవుతున్నాయి. ఓ భవన సముదాయంపై బాంబులు పడి నేలకూలగా... అందులో చాలమంది చిన్నారులు, మహిళలు చిక్కుకున్నారు. వారిని రక్షించడానికి స్థానికులు తీవ్రంగా శ్రమించిన వీడియోలు వెలుగులోకి వచ్చాయి.బుల్‌డోజర్ల సాయంతో శిథిలాలను తొలగించి భాదితులను ఆసుపత్రులకు తరలించారు. యుద్ధం వల్ల సామాన్యుల పరిస్థితి హృదయవిదారకంగా ఉంది. ప్రాణాలను అరచేతిలో పెట్టుకొని దక్షిణ ప్రాంతానికి వేలాదిమంది వలస వెళుతుండగా....తీవ్రమైన రద్దీ నెలకొంది. నీరు, ఆహారం దొరక్క వలసవచ్చిన వారు ఇబ్బందులు ఎదుర్కొంటున్నారు. కనీస వసతులు లేక రహదారులపైనే పడిగాపులు గాస్తున్నారు.