Putin: చైనాలో పర్యటించనున్న పుతిన్‌
రష్యా అధ్యక్షుడు పుతిన్‌ ఎట్టకేలకు విదేశీ పర్యటనకు సిద్ధమయ్యారు. ఈ ఏడాది అక్టోబరులో ఆయన చైనాలో పర్యటించనున్నట్లు తెలుస్తోంది. బీజింగ్‌లో జరిగే బెల్ట్‌ అండ్‌ రోడ్‌ సదస్సుకు ఆయన హాజరుకానున్నట్లు అంతర్జాతీయ మీడియా కథనాలు వెల్లడించాయి. ఇప్పటికే పుతిన్‌..... చైనా పర్యటన కోసం క్రెమ్లిన్‌ షెడ్యూల్‌ను సిద్ధం చేస్తున్నట్లు తెలుస్తోంది. ఉక్రెయిన్‌లోని పిల్లలను రష్యా అపహరించుకుపోయిందన్న ఆరోపణలపై ఈ ఏడాది మార్చిలో అంతర్జాతీయ క్రిమినల్‌ కోర్టు-ఐసీసీ పుతిన్‌పై అరెస్టు వారెంట్‌ జారీ చేసింది. అరెస్ట్‌ ముప్పు నేపథ్యంలో అప్పటి నుంచి పుతిన్‌ అంతర్జాతీయ పర్యటనలకు గానీ సదస్సులకు గానీ వెళ్లడం లేదు. ఐసీసీ నిబంధనలను భారత్‌ అమలు చేయాల్సిన అవసరం లేనప్పటికీ.. పుతిన్‌ జీ-20 సదస్సుకు వచ్చేందుకు విముఖత చూపారు. కానీ అక్టోబరులో చైనాకు వెళ్లేందుకు పుతిన్‌ సిద్ధమవడం అంతర్జాతీయంగా ప్రాధాన్యత సంతరించుకుంది.
ఉక్రెయిన్‌లో చిన్న పిల్లలను కిడ్నాప్‌ చేసిన యుద్ధ నేరాలతో సంబంధం ఉన్న ఘటనల నేపథ్యంలో ఆయనపై వారెంట్‌ ఇష్యూ అయినట్లు బ్లూమ్‌బర్గ్‌ వెల్లడించింది. ఈ అరెస్ట్‌ వారెంట్‌ వచ్చినప్పటి నుంచి పుతిన్‌ రష్యా దాటి బయటకు రాలేదు. ఎలాంటి విదేశీ పర్యటనకు కూడా వెళ్లలేదు. ఇటీవల దక్షిణాఫ్రికాలో జరిగిన బ్రిక్స్‌ సమావేశాలకు కూడా పుతిన్‌ హాజరుకాలేదు. ఇప్పుడు భారత్‌లో జరగనున్న జీ 20 సమావేశాలకు కూడా తాను రావడం లేదని ముందుగానే ప్రధాని మోదీకి ఫోన్‌ కాల్‌ ద్వారా స్పష్టంచేశారు. తనకు బదులుగా తమ విదేశాంగ మంత్రి సెర్గీ లావ్రోవ్‌ సదస్సుకు హాజరవుతారని చెప్పారు.
ఐసీసీ అరెస్ట్‌ వారెంట్‌ కారణంగా ఐసీసీలో సభ్యత్వం ఉన్న దేశాల్లో పుతిన్‌ కనిపిస్తే అరెస్ట్‌ చేయాల్సి ఉంటుంది. ఈ కారణంగానే పుతిన్‌ రష్యా దాటి బయటకు రావడం లేదు. అంతర్జాతీయ క్రిమినల్‌ కోర్టులో సుమారు 120 సభ్య దేశాలు ఉన్నాయి. అయితే ఈ అక్టోబరులో చైనాలో జరిగే బెల్ట్‌ అండ్‌ రోడ్‌ సదస్సుకు హాజరుకావాలని చైనా అధ్యక్షుడు షీ జిన్‌పింగ్‌ పుతిన్‌ను ఆహ్వానించారు. ఇందుకు పుతిన్‌ కూడా అంగీకరించినట్లు మీడియా కథనాలు చెప్తున్నాయి. పుతిన్‌ చైనా వెళ్లనున్నట్లు వచ్చిన బ్లూమ్‌ బర్గ్‌ రిపోర్ట్‌పై మీడియా వర్గాలు పుతిన్‌ అధికార ప్రతినిధి డిమిత్రి పెస్కోవ్‌ను అడగగా.. రష్యా, చైనా ద్వైపాక్షిక చర్చల గురించి అత్యున్నత స్థాయిలో షెడ్యూల్‌ సిద్ధం అవుతోందని, పూర్తి వివరాలు ఈవెంట్‌ల గురించి సమయానుగుణంగా వెల్లడిస్తామని తెలిపారు. ఉక్రెయిన్‌పై సైనిక చర్య నేపథ్యంలో పలు దేశాలు రష్యాపై ఆంక్షలు విధించడంతో.. చైనాతో బంధం పెరుగుతోంది.̣