Putin : పుతిన్ కీలక నిర్ణయం, రష్యా రక్షణ మంత్రి షోయగు తొలగింపు

ఉక్రెయిన్ తో యుద్ధం జరుగుతున్న సమయంలో రష్యాధీషుడు పుతిన్ కీలక నిర్ణయం తీసుకున్నారు. రక్షణమంత్రి సెర్గీ షోయిగును తొలగించి ఆ స్థానంలో ఆండ్రీ బెలౌసోవ్ ను నియమించారు. ఆదివారం రాత్రి క్రెమ్లిన్ ఈ నిర్ణయం తీసుకున్నట్లు అంతర్జాతీయ మీడియా వెల్లడించింది. షోయిగుకు రష్యన్ ఫెడరేషన్ భద్రతా మండలి కార్యదర్శి బాధ్యతలు అప్పగించారు. రష్యన్ ఫెడరేషన్ మిలిటరీ-ఇండస్ట్రియల్ కమిషన్ లో పుతిన్ కు ఆయన డిప్యూటీగా ఉండనున్నారు. ఆండ్రీ బెలౌసోవ్ ను రక్షణమంత్రిని చేయడమనేది భద్రతా కూటమి ఆర్థిక వ్యవస్థను దేశ ఆర్థిక వ్యవస్థలో ఏకీకృతం చేయాల్సిన అవసరంతో ముడిపడి ఉందని క్రెమ్లిన్ ప్రతినిథి చెప్పారు. బెలూసోవ్ గతంలో రష్యా ఉప ప్రధానిగా, ఆర్థిక సమస్యలపై దేశాధినేత సలహాదారుడిగా, రష్యన్ ఫెడరేషన్ ఆర్థిక అభివృద్ధి మంత్రి, రష్యన్ ఫెడరేషన్ ప్రభుత్వ ఆర్థిక శాఖ డైరెక్టర్ గా బాధ్యతలు నిర్వహించారు. గత ఏడాది సెప్టెంబరులో ఉక్రెయిన్ అధ్యక్షుడు జెలెన్ స్కీ కూడా రక్షణ మంత్రిగా ఒలెక్సీ రెజ్నికోవ్ ను తొలగించి.. రుస్టెమ్ ఉమెరోవ్ కు ఆ బాధ్యతలు అప్పగించారు. అలాగే యుక్రెయిన్ ఆర్మీ చీఫ్ జనరల్ వాలెరి జలుజ్నీ స్థానంలో ఒలెక్సాండర్ సిర్ స్కీని నియమించారు.

ఇదిలా ఉండగా, రష్యా సరిహద్దు నగరం బెల్గోరోడ్‌లో ఉక్రెయిన్‌ జరిపిన దాడిలో 8మంది ప్రాణాలు కోల్పోయారు. కీవ్‌ సైన్యాలు ప్రయోగించిన మోర్టార్‌షెల్స్‌ కారణంగా 10 అంతస్తుల ఒక అపార్ట్‌మెంట్‌ను పాక్షికంగా కూలిపోయింది. 20 మంది పౌరులు గాయపడ్డారు. భవన పైకప్పు కూలిపోయింది. వెంటనే అక్కడకు చేరుకున్న రష్యా అత్యవసర ప్రతిస్పందనా దళం సహాయక చర్యలు చేపట్టింది. శిథిలాల కింద చిక్కుకున్న పలువురిని రక్షించింది. బెల్గోరోడ్ గగనతలంలో ఉక్రెయిన్‌ ప్రయోగించిన కొన్ని క్షిపణులను, 2 డ్రోన్లను తమ రక్షణ దళాలు కూల్చివేశాయని, రష్యా ప్రకటించింది. దాడికి ప్రతీకారం తీర్చుకుంటామని స్పష్టం చేసింది. కాగా పశ్చిమ రష్యా నగరాలను కొంతకాలంగా ఉక్రెయిన్‌ లక్ష్యంగా చేసుకుంటోంది.