Russia: పుతిన్‌ని అరెస్ట్ చేస్తే ఏ దేశంలోనైనా బాంబులు వేస్తుంది: డిమిత్రి మెద్వెదేవ్
Russia: రష్యా అధ్యక్షుడు పుతిన్‌పై ఐసీసీ- అంతర్జాతీయ క్రిమినల్ కోర్టు అరెస్ట్ వారెంట్ జారీ చేయడంతో పుతిన్ ముఖ్య అనుచరుడు డిమిత్రి మెద్వెదేవ్ తీవ్రంగా స్పందించారు. పుతిన్‌ను అరెస్టు చేయడం అంటే రష్యాపై యుద్ధం ప్రకటించినట్లేనని అన్నారు. అధ్యక్షుడు పుతిన్‌ను అరెస్టు చేసేందుకు ప్రయత్నిస్తే, రష్యా ఏ దేశం పైన అయినా బాంబు వేయగలదని హెచ్చరించారు. పుతిన్ యుద్ధ నేరాలకు పాల్పడుతున్నారని, ఉక్రెయిన్ నుంచి వందలాది మంది చిన్నారులను అక్రమంగా రవాణా చేస్తున్నారని ఐసీసీ వ్యాఖ్యానించింది. డిమిత్రి మెద్వెదేవ్ వీటిని ఖండించారు. మరోవైపు రష్యాపై మరిన్ని ఆంక్షలు విధించాలని, తమకు ఆయుధాల సరఫరాను వేగవంతం చేయాలని ఉక్రెయిన్ అధ్యక్షుడు జెలెన్స్కీ యూరప్‌ను కోరారు. ఇంతలో, EU నాయకులు రాబోయే పన్నెండు నెలల్లో ఒక మిలియన్ రౌండ్ల ఫిరంగి మందుగుండు సామగ్రిని ఉక్రెయిన్‌కు పంపే ప్రణాళికను ఆమోదించారు. రష్యా అధ్యక్షుడిని అరెస్టు చేసేందుకు ప్రయత్నిస్తే ఏ దేశంలోనైనా బాంబులు వేస్తామని పుతిన్ మిత్రుడు డిమిత్రి మెద్వెదేవ్ హెచ్చరించారు.