అదృష్టం తెచ్చిపెట్టే రేఖల్ని కృత్రిమంగా సృష్టిస్తోన్న థాయ్‌ కంపెనీ..
హస్తరేఖలను బట్టి జీవితం ఎలా ఉంటుందో తెలియజేసే శాస్త్రమే హస్తసాముద్రికం. ఈ శాస్త్రం భారత్‌తోపాటు అనేక దేశాల్లో బాగా ప్రాచుర్యం పొందింది. వ్యక్తి జీవితం చేతిరేఖలపై ఆధారపడి ఉందని చాలా మంది అంటుంటారు.. ఇప్పటికీ ఈ విషయాన్ని నమ్ముతారు. అరచేతిలో ఉండే రేఖలలో ఒక్కో రేఖ ఒక్కో అంశాన్ని సూచిస్తాయని చెబుతారు. వివాహం, సంతానం, అదృష్టం, ఆర్థికం, ఆరోగ్యం, ఆయుష్షు ఇలా ప్రతి అంశం చేతిరేకలపైనే ఆధారపడి ఉంటాయని నమ్ముతారు. ఈ శాస్త్రంపై థాయ్లాండ్ ప్రజలు ఎక్కువగా ఆసక్తి కనబరుస్తారు. వారి నమ్మకాన్ని థాయ్లాండ్ కు చెందిన ఓ కంపెనీ సొమ్ము చేసుకుంటోంది. అదృష్టం తెచ్చిపెట్టే రేఖల్ని కృత్రిమంగా సృష్టిస్తోంది ఈ కంపెనీ.
థాయ్‌లాండ్‌కి చెందిన 'ప్లీ' అనే వ్యక్తి ఒకప్పుడు బీచ్ లు, జనసాంద్రత ఎక్కువగా ఉండే ప్రాంతాల్లో టాటూలు వేసేవారు. అయితే ఇటీవల నొంతాబురి ప్రాంతంలో 'మహాహెంగ్‌999' పేరుతో ఓ కంపెనీ ప్రారంభించారు.. ప్రజలు తమ మెరుగైన జీవితం పొందడం కోసం వారి చేతిలోని రేఖలను మారుస్తామని ప్రకటించారు. దాంతో చాలా మంది వ్యక్తులు తమ భవిష్యత్తుకోసం ఆ కంపెనీ ముందు క్యూ కట్టారు.. వారికి ఏ అంశంలో మెరుగైన స్థితి కావాలో అడిగి హస్తరేఖల్ని ఎలా మార్చుకుంటే మంచిదనే విధంగా వివరిస్తారు ప్లీ. ఆ తరువాత కంపెనీ సిబ్బంది చేత వ్యక్తులకు తగురీతిలో హస్తరేఖల్ని మార్చడం.. కొత్తవి గీయడం వంటివి చేయిస్తున్నారు.
టాటూలు వేసే విధంగానే అరచేతిలో రంగులు లేకుండా బలవంతంగా గీతల్ని గీస్తున్నారు. అయితే ఇలా గీయడం వలన మొదట్లో చర్మం బాగా కందిపోతుంది. ఆ తర్వాత కొద్దిరోజులకు సహజరేఖల్లానే కనిపిస్తున్నాయట. ఇది తెలిసిన చాలా మంది వ్యక్తులు తమ చేతిరేఖలను మార్చుకోవడం కోసం కంపెనీ ముందు క్యూ కడుతున్నారట. దీంతో ఈ కంపెనీ గురించి దేశవ్యాప్తంగా ప్రచారం జరిగింది. ప్లీ బిజినెస్‌ ఊహించినదానికంటే ఎక్కువ జరుగుతోంది. దాంతో మరొక బ్రాంచ్ ను ఓపెన్ చేసి ఆశావహులకు చేతిరేఖలను మారుస్తున్నారు. అయితే ఇలా మార్చుకున్న వ్యక్తులు తమ జీవితాలు బాగుపడ్డాయని చెప్పడం కూడా జరుగుతోంది.
