US FIRE: కిడ్నాప్‌ అయ్యాననుకుని డ్రైవర్‌పై కాల్పులు
ఓ మహిళ చేసిన పొరపాటు మరో వ్యక్తి ప్రాణాల మీదకు తెచ్చింది. తనకు ఏదో జరగబోతుందన్న అనుమానంతో మహిళ జరిపిన కాల్పులతో ఓ వ్యక్తి ప్రాణాల కోసం పోరాడుతున్నాడు. అమెరికా టెక్సాస్‌కు చెందిన క్యాబ్‌లో ప్రయాణిస్తున్న డ్రైవర్‌ కిడ్నాప్‌ చేస్తున్నాడనే అనుమానంతో అతడిపై కాల్పులు జరిపింది. దీంతో డ్రైవర్‌ ప్రాణాపాయ స్థితిలో కొట్టుమిట్టాడాల్సిన పరిస్థితి ఏర్పడింది. టెక్సాస్‌కు చెందిన ఓ మహిళ.. ఎల్‌ పాసో కౌంటీలో ఉన్న మిత్రుడిని కలిసేందుకు ఉబర్ క్యాబ్‌ ఎక్కింది. కొంత దూరం వెళ్లిన తర్వాత హైవేపై ఉన్న బోర్డులను చూసిన ఆమె.. క్యాబ్‌ వేరే మార్గంలో వెళ్తోందని ఆందోళనకు గురయ్యింది. డ్రైవర్‌ తనను కిడ్నాప్‌ చేసి మెక్సికో వైపు తీసుకెళ్తున్నట్లు అనుమానించింది. వెంటనే బ్యాగులో ఉన్న తుపాకీని తీసి అతడిపై కాల్పులు జరిపింది. దీంతో డ్రైవర్‌ మెడకు, చేతికి తీవ్ర గాయాలవడంతో పాటు కారు అదుపుతప్పి ఆగిపోయింది. ఈ విషయాన్ని ఆమె పోలీసులకు చేరవేసింది. అదే సమయంలో రక్తపుమడుగులో ఉన్న డ్రైవర్‌ ఫొటోలను తన బాయ్‌ఫ్రెండ్‌కు కూడా పంపించింది. ఈ ఘటనపై కేసు నమోదు చేసిన పోలీసులు దర్యాప్తు చేపట్టారు. అయితే, ఉబర్ డ్రైవర్‌ ప్రయాణికురాలిని కిడ్నాప్‌ చేసేందుకు ప్రయత్నించాడని చెప్పడానికి ఎటువంటి ఆధారాలు లేవని.. కేవలం అనుమానంతోనే ఆమె కాల్పులు జరిపి ఉంటుందని ప్రాథమికంగా నిర్ధారించారు. డ్రైవర్‌ ఉబర్ యాప్‌లో ఉన్న మ్యాప్‌ని బట్టి లొకేషన్‌కి వెళ్తున్నాడని, ఆ మహిళే తప్పుగా అర్థం చేసుకుని కాల్చిందని వెల్లడించారు.
అనంతరం ఆమెపై హత్యాయత్నం అభియోగాలు నమోదు చేశారు. పోలీసులు ఆమెపై నేరపూరిత దాడికి పాల్పడిన అభియోగాలు నమోదు చేశారు. సదరు మహిళను అరెస్ట్ చేసి... 1.5 మిలియన్ డాలర్ల బాండ్‌పై విడుదల చేశారు. ఆసుపత్రిలో చికిత్స పొందుతున్న డ్రైవర్‌కు లైఫ్ సపోర్ట్ తొలగించినట్టు ఆయన కుటుంబ సభ్యులు తెలిపారు. ఈ ఘటనపై ఉబర్ యాజమాన్యం కూడా స్పందించింది. ప్రయాణికురాలి తీరును తీవ్రంగా తప్పపట్టింది. ఇదో భయంకరమైన చర్యగా అభివర్ణించింది. తమ సర్వీసుల్లో ఇటువంటి హింసను సహించేది లేదని.. సదురు మహిళపై ఉబర్ సేవలను వినియోగించకుండా నిషేధం విధిస్తున్నట్లు ప్రకటించింది.