Putin: కాల్పుల విరమణకు పుతిన్ సూత్రప్రాయ అంగీకారం
అమెరికా అధ్యక్షుడు డొనాల్డ్‌ ట్రంప్‌ ప్రతిపాదించిన 30 రోజుల కాల్పుల విరమణ ప్రతిపాదనకు సూత్రప్రాయంగా అంగీకరిస్తున్నట్లు రష్యా అధ్యక్షుడు వ్లాదిమిర్‌ పుతిన్ పేర్కొన్నారు. అయితే ఇందుకు సంబంధించిన విధివిధానాలపై ఇంకా కసరత్తు జరగాల్సిన అవసరం ఉందని అభిప్రాయపడ్డారు.
‘‘ట్రంప్‌ ఆలోచన సరైందే. కచ్చితంగా మేం మద్దతిస్తాం’’ అని మాస్కోలో గురువారం జరిగిన విలేకరుల సమావేశంలో పుతిన్ ప్రకటించారు. ‘‘అయితే కొన్ని సమస్యలు ఉన్నాయి. వాటిని మా అమెరికా మిత్రులతో ఇతర భాగస్వాములతో చర్చిస్తాం. ఒప్పందం ఉల్లంఘన కాకుండా.. సరైన యంత్రాంగాన్ని అభివృద్ధి చేయాల్సి ఉంది. యుద్ధం ఆపాలన్న ప్రతిపాదనకు మేం అంగీకరిస్తున్నాం. అయితే కాల్పుల విరమణ.. శాశ్వత శాంతి దిశగా సాగుతుందన్న ఆశాభావంతో అందరం ముందుకు వెళ్లాలి. సమస్య మూలాలను తొలగించాలి’’ అని పుతిన్ చెప్పారు. ఉక్రెయిన్‌ను అమెరికా ఒప్పించినట్లు కనిపిస్తున్నా.. యుద్ధక్షేత్రంలో పరిస్థితిని అంచనా వేసుకొనే కీవ్‌ కాల్పుల విరమణకు అంగీకరించిందని రష్యా అధ్యక్షుడు పేర్కొనడం గమనార్హం. ఉక్రెయిన్‌ సమస్యను పరిష్కరించడానికి కృషి చేస్తున్న ట్రంప్‌నకు పుతిన్ ధన్యవాదాలు తెలిపారు.భారత్, చైనా, దక్షిణాఫ్రికా నేతలకూ కృతజ్ఞతలు చెప్పారు. దీంతో కాల్పుల విరమణ ఒప్పందంలో ఈ మూడు దేశాలు కూడా కీలక పాత్ర పోషించాయన్న సంకేతం ఇచ్చారు.
ఒప్పందాన్ని ఉల్లంఘించడాన్ని నియంత్రించే యంత్రాంగం ఉండాలన్నారు. కాల్పుల విరమణ పాటించే 30 రోజులను ఉక్రెయిన్‌ తన సైన్యాల మోహరింపు, ఆయుధాల సేకరణల కోసం ఉపయోగించుకుంటుందా అనేది ఓ సమస్య అన్నారు. కాల్పుల విరమణ శాశ్వత శాంతికి దారి తీయాలన్నారు. సంక్షోభానికి మూల కారణాలను నిర్మూలించాలని చెప్పారు.
ఉక్రెయిన్‌కు అమెరికా నచ్చజెప్పినట్లు కనిపిస్తున్నప్పటికీ, యుద్ధ క్షేత్రంలో పరిస్థితుల వల్ల ఉక్రెయిన్‌ ఆసక్తి చూపుతున్నదన్నారు. రష్యాలోని కుర్‌స్క్‌ ప్రాంతంలోకి చొచ్చుకొచ్చిన ఉక్రెయిన్‌ సేనలను రానున్న రోజుల్లో దిగ్బంధిస్తామని చెప్పారు. ఈ పరిస్థితుల్లో కనీసం 30 రోజుల కాల్పుల విరమణ ఉక్రెయిన్‌కు శ్రేయస్కరమని తెలిపారు. ఈ సందర్భంగా అమెరికా అధ్యక్షుడు డొనాల్డ్‌ ట్రంప్‌, భారత్, చైనా, బ్రెజిల్‌, దక్షిణాఫ్రికా దేశాల నేతలకు ధన్యవాదాలు తెలిపారు.