Lucy Guo: ప్రపంచంలో అత్యంత పిన్న వయసు బిలియనీర్ ఎవరో తెలుసా ?

ఉన్నత చదువు లేకపోయినా... పట్టుదల, వినూత్న ఆలోచనలు ఉంటే చాలని నిరూపిస్తూ, 30 ఏళ్ల లూసీ గువో టెక్ ప్రపంచంలో కొత్త చరిత్ర సృష్టించారు. కాలేజీ చదువును మధ్యలోనే వదిలేసి, స్టార్టప్ ప్రపంచంలోకి అడుగుపెట్టిన ఆమె, నేడు ప్రపంచంలోనే అత్యంత పిన్న వయస్కురాలైన స్వీయ-నిర్మిత (సెల్ఫ్ మేడ్) మహిళా బిలియనీర్‌గా ఫోర్బ్స్ జాబితాలో నిలిచారు. ప్రఖ్యాత పాప్ సింగర్ టేలర్ స్విఫ్ట్‌ను సైతం అధిగమించిన ఆమె విజయగాథ ఎంతోమందికి స్ఫూర్తినిస్తోంది. సుమారు 1.3 బిలియన్ డాలర్ల (భారత కరెన్సీలో దాదాపు రూ. 10,800 కోట్లు) నికర సంపదతో ఆమె ఈ ఘనత సాధించారు.

చైనా నుంచి అమెరికాకు వలస వచ్చిన ఎలక్ట్రికల్ ఇంజనీర్ల కుమార్తె అయిన లూసీ గువో, కాలిఫోర్నియాలోని ఫ్రెమాంట్‌లో పెరిగారు. ఆమెకు చిన్నతనం నుంచే వ్యాపారంపై ఆసక్తి ఉండేది. రెండో తరగతిలోనే పేపాల్ ఖాతా తెరిచి, ఆన్‌లైన్ గేమ్‌లలోని వర్చువల్ వస్తువులను, కరెన్సీని నిజమైన డబ్బుకు అమ్మడం ప్రారంభించారు. "నేను అరుదైన పెట్స్, వస్తువులను సేకరించి వాటిని అమ్ముకునేదాన్ని" అని ఆమె ఒక సందర్భంలో చెప్పారు. టెక్నాలజీపై పట్టు సాధించాక, గేమ్‌లలో ఉపయోగపడే బాట్‌లను తయారుచేసి విక్రయించడం మొదలుపెట్టారు. ఆ తర్వాత వెబ్‌సైట్లు రూపొందించి, గూగుల్ యాడ్‌సెన్స్ ద్వారా తన సంపాదనను గణనీయంగా పెంచుకున్నారు.

తల్లిదండ్రుల ప్రోత్సాహంతో కార్నెగీ మెలన్ యూనివర్శిటీలో కంప్యూటర్ సైన్స్ కోర్సులో చేరినప్పటికీ, లూసీ ఆలోచనలు ఎప్పుడూ సొంతంగా ఏదైనా సాధించాలనే ఉండేవి. ఈ క్రమంలో 2014లో ఆమెకు ప్రతిష్ఠాత్మకమైన 'థీల్ ఫెలోషిప్' లభించింది. యువ పారిశ్రామికవేత్తలను ప్రోత్సహించే ఈ ఫెలోషిప్, కాలేజీని వదిలేసి తమ స్టార్టప్‌లను నిర్మించుకోవడానికి 1,00,000 డాలర్ల గ్రాంట్‌ను అందిస్తుంది. ఈ అవకాశాన్ని అందిపుచ్చుకున్న లూసీ, చదువుకు స్వస్తి పలికారు. అంతకుముందు ఫేస్‌బుక్‌లో ఇంటర్న్‌గా, ఆ తర్వాత స్నాప్‌చాట్‌లో తొలి మహిళా డిజైనర్‌గా పనిచేసి అనుభవం గడించారు.

2016లో, తన 21వ ఏట, అలెక్సాండర్ వాంగ్ (19) అనే యువకుడితో కలిసి 'స్కేల్ ఏఐ' (Scale AI) అనే సంస్థను స్థాపించారు. ఆర్టిఫిషియల్ ఇంటెలిజెన్స్ అప్లికేషన్లకు అవసరమైన డేటాను లేబులింగ్ చేసే సేవలను ఈ సంస్థ అందిస్తుంది. అయితే, 2018లో వాంగ్‌తో వచ్చిన అభిప్రాయ భేదాల కారణంగా ఆమె సంస్థ నుంచి బయటకు వచ్చేశారు. కానీ, తెలివిగా తన 5 శాతం వాటాను అట్టిపెట్టుకున్నారు. ఇటీవల మెటా సంస్థతో జరిగిన ఒప్పందంతో స్కేల్ ఏఐ విలువ ఏకంగా 25 బిలియన్ డాలర్లకు చేరింది. దీంతో ఆమె వాటా విలువ అమాంతం పెరిగి, ఆమెను బిలియనీర్‌గా మార్చింది.

విజయం వెనుక విమర్శలు కూడా ఆమెను వెన్నంటాయి. స్కేల్ ఏఐ నుంచి బయటకు వచ్చాక, ఆమె 'బ్యాకెండ్ క్యాపిటల్' అనే వెంచర్ క్యాపిటల్ సంస్థను, 'పాసెస్' అనే కంటెంట్ క్రియేటర్ల ప్లాట్‌ఫామ్‌ను ప్రారంభించారు. అయితే, పాసెస్ ప్లాట్‌ఫామ్‌పై చట్టపరమైన ఆరోపణలు వచ్చాయి. మరోవైపు, ఆమె పని విధానంపై కూడా తీవ్ర విమర్శలున్నాయి. స్టార్టప్ వ్యవస్థాపకులు వారానికి 90 గంటలు పనిచేయాలని ఆమె సూచించడం మానసిక ఆరోగ్య నిపుణుల ఆగ్రహానికి కారణమైంది. "టీవీ చూడటం, సోషల్ మీడియాలో సమయం వృథా చేసే బదులు ఆ సమయాన్ని పనికి కేటాయించవచ్చు" అని ఆమె గట్టిగా వాదిస్తారు. ఏదేమైనా, ఒక సాధారణ వలస కుటుంబం నుంచి వచ్చి, సాంకేతిక ప్రపంచంలో తనకంటూ ఒక సామ్రాజ్యాన్ని నిర్మించుకున్న లూసీ గువో ప్రస్థానం నేటి యువతకు ఒక గొప్ప పాఠం.