Israeli Kills Houthis PM: హూతీల ప్రధానమంత్రిని హతమార్చిన ఇజ్రాయెల్
యెమెన్‌లోని హూతీ తిరుగుబాటుదారుల స్థావరాలపై ఇజ్రాయెల్ వైమానిక దాడులు నిర్వహించగా, ఈ దాడిలో హూతీ ముఖ్య నేత అహ్మద్ అల్-రహావీ మృతి చెందారు. హూతీల నియంత్రిత ప్రాంతానికి ప్రధానిగా వ్యవహరిస్తున్న అహ్మద్ అల్-రహావీతో పాటు పలువురు మంత్రులు కూడా ఈ దాడుల్లో ప్రాణాలు కోల్పోయారని హూతీలు ధ్రువీకరించారు.
ఇజ్రాయెల్ వైమానిక దాడులు ఈ వారం మొదట్లో రాజధాని సనా ప్రాంతంలో జరిగాయి. ఈ దాడుల్లో దాదాపు 10 మంది మరణించారని, 100 మందికి పైగా గాయపడ్డారని హూతీలు వెల్లడించారు. యెమెన్ రాజధాని సనాలో హూతీ పాలకుల సైనిక స్థావరమే లక్ష్యంగా దాడులు చేసినట్లు ఇజ్రాయెల్ సైన్యం ప్రకటించింది. ఈ దాడుల్లో కీలక వ్యక్తులను హతం చేసినట్లు తెలిపింది. ఈ దాడుల్లో ప్రధాని అహ్మద్ అల్ రహావీతో పాటు పలువురు మంత్రులు మృతి చెందినట్లు హూతీలు ఒక ప్రకటనలో తెలిపారు. హూతీ ప్రభుత్వ సభ్యులు, మంత్రులతో ప్రధాని సమావేశం జరుపుకుంటున్న సమయంలో ఈ దాడులు జరిగాయని వారు వెల్లడించారు.
2024 ఆగస్టు నుంచి రహవీ హూతీల నియంత్రిత ప్రాంతానికి ప్రధానిగా వ్యవహరిస్తున్నారు. ఇరాన్‌ మద్దతుతో యెమెన్‌లో కీలక పాత్ర పోషిస్తున్న హూతీలు గాజా యుద్ధం నేపథ్యంలో పాలస్తీనీయన్లకు మద్దతుగా ఇజ్రాయెల్‌పై దాడులకు పాల్పడుతున్న విషయం తెలిసిందే. ఈ తరుణంలో రహావీ హతమవ్వడం హూతీ ఉద్యమానికి మరో పెద్ద ఎదురుదెబ్బగా భావించవచ్చు.