Rajamouli: ఆస్కార్ విజయం.. ఆనందంతో వదినమ్మకు హగ్

Rajamouli: ఆయన్నుంచి ఏ చిత్రం వచ్చినా అందరూ కలిసి చేస్తారు. ఆయన విజయాల్లో అత్యధిక స్థానం కుటుంబసభ్యులకే చెందుతుంది. అందుకే రాజమౌళి అంత మంచి చిత్రాలు తీయగలుగుతున్నారేమో.. ఏ పనికైనా కుటుంబసభ్యుల సహకారం కూడా తోడైతే విజయం దానంతట అదే వరిస్తుంది అని జక్కన్న చిత్రాలు చెప్పకనే చెబుతాయి. SS రాజమౌళి అన్ని చిత్రాలకు, అతని భార్య రమ కాస్ట్యూమ్ డిజైనర్‌గా ఉండగా, అతని భార్య సోదరి ( MM కీరవాణి భార్య కూడా) శ్రీవల్లి లైన్ ప్రొడ్యూసర్. శ్రీవల్లి కుటుంబంలో అందరికీ తల్లిలాంటిదని, అన్ని విషయాల్లో జాగ్రత్తలు తీసుకుంటుందని దిగ్గజ దర్శకుడు చాలాసార్లు వెల్లడించారు. ఈ రోజు లాస్ ఏంజెల్స్‌లోని డాల్బీ థియేటర్‌లో జరిగిన ఆస్కార్ ఈవెంట్‌లో ఓ అపురూప దృశ్యం కెమెరా కంట చిక్కింది.

"ఉత్తమ ఒరిజినల్ సాంగ్" అవార్డును ఆర్‌ఆర్‌ఆర్ అని హోస్ట్‌లు ప్రకటించడంతో, రాజమౌళి పట్టలేని ఆనందానికి గురయ్యారు. అతని చుట్టూ ఉన్నవారు లేచి నిలబడి చప్పట్లు కొట్టడం ప్రారంభించారు. కీరవాణి వేదికపైకి చేరుకుని ప్రసంగం ప్రారంభించడానికి ముందే, శ్రీవల్లి రాజమౌళి వద్దకు పరుగెత్తుకుంటూ వచ్చి కౌగిలించుకుంది. ఆపై రమా రాజమౌళి కూడా వారితో పాటు చేరారు. ముగ్గురి కళ్లలో ఆనంద భాష్పాలు. ఆ అపురూప క్షణాలను సంబరాలు చేసుకున్నారు. ఇక చరణ్ కూడా శ్రీవల్లిని కౌగిలించుకుని అభినందనలు తెలిపాడు. ఇది ఖచ్చితంగా గర్వించదగిన విజయం. ఈ వీడియోను రామ్ చరణ్ భార్య ఉపాసన కామినేని షేర్ చేశారు.