సుశాంత్ కేసు పెండింగ్‌.. సిబిఐ విచారణను పరిశీలించాలని ప్రధానిని కోరిన సోదరి
బాలీవుడ్ నటుడు సుశాంత్ సింగ్ రాజ్‌పుత్ ముంబైలోని సబర్బన్ బాంద్రాలోని తన అపార్ట్‌మెంట్‌లో శవమై కనిపించి నేటికి 45 నెలలు. ఈ కేసును సెంట్రల్ బ్యూరో ఆఫ్ ఇన్వెస్టిగేషన్ (సిబిఐ) విచారిస్తోంది. కానీ ఇన్వెస్టిగేషన్ వివరాలు ఇంతవరకు అప్‌డేట్‌ను పంచుకోలేదు. దాంతో సుశాంత్ సోదరి ప్రధాని నరేంద్ర మోడీని జోక్యం చేసుకోవాలని అభ్యర్థిస్తూ వీడియో సందేశాన్ని పంచుకున్నారు.
జూన్ 14, 2020న బాలీవుడ్ నటుడు సుశాంత్ సింగ్ రాజ్‌పుత్ అకాల మరణం దేశవ్యాప్తంగా సంచలనం సృష్టించింది. ముంబైలోని బాంద్రా ప్రాంతంలోని తన నివాసంలో ఉరివేసుకుని మరణించాడు. ఇది మొదట ఆత్మహత్యగా నివేదించబడినప్పటికీ, తరువాత అతనిని ఆత్మహత్యకు ప్రేరేపించినందుకు అతని స్నేహితురాలు రియా చక్రవర్తి, ఆమె కుటుంబ సభ్యులపై కేసు నమోదు చేయబడింది. రెండు నెలల తర్వాత ఈ కేసును సెంట్రల్ బ్యూరో ఆఫ్ ఇన్వెస్టిగేషన్ (సీబీఐ)కి బదిలీ చేశారు. కానీ ఇంకా విచారణ పూర్తికాలేదు.
సుశాంత్ సింగ్ రాజ్‌పుత్ సోదరి ప్రధాని మోదీకి విజ్ఞప్తి చేశారు. సుశాంత్ సోదరి శ్వేతా సింగ్ కీర్తి ఈ రోజు ఉదయం తన ఇన్‌స్టాగ్రామ్ హ్యాండిల్‌లో వీడియో సందేశాన్ని పంచుకున్నారు.
ప్రధాని నరేంద్ర మోడీని ట్యాగ్ చేస్తూ “నమస్తే.. నేను శ్వేతా సింగ్ కీర్తిని. సుశాంత్ సింగ్ రాజ్‌పుత్ సోదరిని. ప్రధాని మోదీ జీ కోసం ఈ సందేశాన్ని రికార్డ్ చేస్తున్నాను. సోదరుడు మరణించి నాలుగేళ్లు కావస్తోంది. సిబిఐ నిర్వహిస్తున్న దర్యాప్తుపై మాకు ఇంకా ఎలాంటి అప్‌డేట్‌లు తెలియవు. ఈ విషయాన్ని మీ దృష్టికి తీసుకురావాలనుకుంటున్నాను. నేను ఈ విషయంలో మీ జోక్యాన్ని ఎక్కువగా అభ్యర్థిస్తున్నాను. ఎందుకంటే ఒక కుటుంబంగా మేము చాలా ప్రశ్నలతో పోరాడుతున్నాము.
“సిబిఐ తన దర్యాప్తులో ఎక్కడికి చేరుకుందో తెలుసుకోవడానికి మీరు కల్పించుకుంటే నిజంగా మాకు సహాయపడుతుంది. ఇది మన న్యాయవ్యవస్థలో విశ్వాసాన్ని పెంపొందించడానికి కూడా సహాయపడుతుంది. జూన్ 14వ తేదీన ఏం జరిగిందో, నిజం తెలుసుకోవాలనుకునే వారికి కొంత ఉపశమనం, సమాధానాల కోసం ఎదురుచూస్తున్న చాలా మంది గుండెలకు ఇది నిజంగా శాంతినిస్తుంది. ధన్యవాదాలు, ”ఆమె క్లిప్‌లో జోడించారు.
దాన్ని షేర్ చేస్తూ, శ్వేత క్యాప్షన్‌లో ఇలా రాశారు: "నా సోదరుడు సుశాంత్ సింగ్ రాజ్‌పుత్ మరణించి 45 నెలలు కావస్తున్నా ఇంకా సమాధానాలు వెతుకుతున్నాం. ప్రధాని మోదీ జీ, సీబీఐ దర్యాప్తు పురోగతిని తెలుసుకోవడానికి దయచేసి మాకు సహాయం చేయండి. సుశాంత్‌కు న్యాయం చేయాలన్నది మా విజ్ఞప్తి. @narendramodi #JusticeForSSRPending". SSR అభిమానులు కీర్తి పోస్టుకు మద్దతు తెలిపారు.
