మటన్ కర్రీలో బోన్ మ్యారో లేదట.. పెళ్లి క్యాన్సిల్

సంబంధం కలుపుకోవాలంటే చాలా కారణాలు కావాలి కానీ, వద్దంటే ఒక్క కారణం కూడా చాలు కదా.. సర్ధుకుపోయే సన్నివేశాలు అరుదుగా కనిపిస్తున్న ఈ రోజుల్లో ఓ విచిత్ర కేసు వెలుగు చూసింది. తెలంగాణలోని రెండు కుటుంబాల మధ్య జరిగిన ఓ వింత సంఘటన పెళ్లి క్యాన్సిల్ కు దారి తీసింది.

ఇరుకుటుంబాల వారు అన్నీ మాట్లాడుకున్నారు.. నిశ్చితార్ధ వేడుక కూడా నిర్వహించారు. అంతా బాగానే ఉంది కదా అని అనుకునే సమయానికి మగ పెళ్లి వారికి మెదడులో ఏదో పురుగు తొలిచినట్టుంది భోజనాల్లో బోన్ మ్యారో వడ్డించలేదని గొడవ చేశారు. అది కాస్తా పెద్దదయింది. పెళ్లి క్యాన్సిల్ చేసుకునే వరకు వెళ్లింది.

ఈ విచిత్ర గొడవ ఇటీవల విడుదలైన చిత్రం 'బలగం'లోని ఓ సన్నివేశాన్ని గుర్తు చేసింది. మటన్ డిష్‌లో బోన్ మ్యారో లేదనే వివాదంతో తెలంగాణలోని కుటుంబాల మధ్య వివాహాన్ని రద్దు చేశారు. వధువు నిజామాబాద్‌కు చెందినవారు కాగా, వరుడు జగిత్యాలకు చెందినవారు. నవంబర్‌లో వధువు నివాసంలో నిశ్చితార్థం వేడుక జరిగింది.

అనంతరం అతిధులందరూ భోజనాలకు సిద్ధమయ్యారు. వధువు కుటుంబం - మటన్ కర్రీలో బోన్ మ్యారో వడ్డించలేదని గొడవ చేశారు వరుడి కుటుంబసభ్యులు. ఆ గొడవ పోలీస్ స్టేషన్ వరకు వెళ్లింది. ఎముక మజ్జ సమస్యకు సంబంధించి వరుడి తరఫు వారిని ఒప్పించేందుకు అధికారులు ప్రయత్నించారు. అయితే మాంసాహార వంటల్లో బోన్ మ్యారో వడ్డించకుండా వధువు కుటుంబీకులు తమను అవమానించారని వారు వాదించారు.

బోన్ మ్యారో మెనూలో లేదన్న విషయాన్ని వధువు కుటుంబసభ్యులు ఉద్దేశపూర్వకంగా తమకు తెలియకుండా చేశారని వారు వాదించారు. చివరికి, వరుడి కుటుంబం పెళ్లిని రద్దు చేయడంతో ఎంగేజ్‌మెంట్ పార్టీ ముగిసింది. 2021లో జరిగిన ఇలాంటి సంఘటనలో, వధువు కుటుంబం పెళ్లికి వచ్చిన అతిథులకు మటన్ కూర వడ్డించలేదని ఒడిశాలోని ఒక వరుడు కూడా ఇలాగే పెళ్లి పీటల మీద నుంచి వెళ్లిపోయాడు.