Britan Minister: భార్యను ఎప్పుడూ మత్తులో ఉంచండి.
బ్రిటన్ మంత్రివర్గంలో ఏదో ఒక వివాదం చెలరేగడం గత కొంత కాలంగా సర్వసాధారణంగా మారింది. ఇప్పటికే పాలస్తీనాకు అనుకూలంగా వ్యాఖ్యలు చేశారని తీవ్ర ఆరోపణలు చెలరేగిన వేళ బ్రిటన్ హోం మంత్రి సువెల్లా బ్రేవర్మన్‌కు కేబినెట్ నుంచి ఉద్వాసన పలికారు. అయితే ఆ స్థానంలో వచ్చిన జేమ్స్ క్లెవర్లీ చేసిన వ్యాఖ్యలు ప్రస్తుతం తీవ్ర వివాదానికి కారణం అయ్యాయి. దీంతో ఆయనను మంత్రివర్గం నుంచి తొలగించాలని డిమాండ్లు వెల్లువెత్తుతున్నాయి. అయితే ఈ వ్యాఖ్యలు తీవ్ర వివాదానికి కారణం కావడంతో ఎట్టకేలకు జేమ్స్ క్లెవర్లీ ప్రతినిధి క్షమాపణలు చెప్పినట్టు వెల్లడించారు.
ఇద్దరు భార్యాభర్తల మధ్య వివాహ బంధం ఎక్కువ కాలం ఉండాలంటే ఎప్పుడూ భార్యను కొంత మత్తులో ఉంచాలని బ్రిటన్ హోం మంత్రి జేమ్స్ క్లెవర్లీ చేసిన వివాదాస్పద వ్యాఖ్య తీవ్ర విమర్శలకు కారణం అయింది. వెంటనే జేమ్స్ క్లెవర్లీని మంత్రివర్గం నుంచి తొలగించాలని ప్రతిపక్షాలు పెద్ద ఎత్తున డిమాండ్లు చేస్తున్నాయి. ఈ నెల 18 వ తేదీన బ్రిటన్ ప్రధాని రిషి సునాక్‌ నివాసంలో జరిగిన విందులో మహిళా అతిథులతో మాట్లాడిన మంత్రి జేమ్స్ క్లెవర్లీ ఈ తరహా వ్యాఖ్యలు చేశారు. తన భర్తకంటే మెరుగైనవారు ఎంతోమంది ఉన్నారన్న విషయాన్ని ఎప్పటికీ గుర్తించనీయకుండా ఉంచాలని సూచించారు. అందుకోసం భార్యకు ఎప్పటికప్పుడు కొద్ది మోతాదులో మత్తు ఇచ్చి జో కొట్టాలని జేమ్స్ క్లెవర్లీ వ్యాఖ్యలు చేశారు. ఇలా కొద్దిగా భార్యకు మత్తు ఇవ్వడం చట్ట విరుద్ధమేమీ కాదని ఆయన పేర్కొన్నారు.
దీంతో జేమ్స్ క్లెవర్లీ చేసిన వ్యాఖ్యలపై తీవ్ర దుమారం రేగింది. ఈ క్రమంలోనే తాను చేసిన వ్యాఖ్యలను కప్పిపుచ్చుకునే ప్రయత్నం జేమ్స్ క్లెవర్లీ చేశారు. తాను ఆ మాటలు జోక్‌గా అన్నానని సర్దిచెప్పుకొనే ప్రయత్నం చేశారు. అయితే ఆ వివరణతో సంతృప్తి చెందని విపక్షాలు ఆయన వైఖరిపై తీవ్ర విమర్శలు చేస్తున్నారు. ప్రైవేటు సంభాషణలో చేసిన వ్యాఖ్యలు కేవలం జోక్ అని.. దానికి ఆయన క్షమాపణలు చెబుతున్నారని జేమ్స్ క్లెవర్లీ ప్రతినిధి ఒకరు వెల్లడించారు. ఈ క్రమంలోనే మంత్రి పదవికి జేమ్స్ క్లెవర్లీ రాజీనామా చేయాలని మహిళా సంఘాలు డిమాండ్ చేస్తున్నాయి. ఇక ఆయనను కేబినెట్ నుంచి తొలగించాలని ప్రధాని రిషి సునాక్‌కు కూడా ఒత్తిడి పెరుగుతోంది.మహిళలు తాగే పానీయాల్లో మత్తుమందు కలుపుతున్న ఘటనలు పెరుగుతున్న నేపథ్యంలో చట్టాలు కఠినతరం చేస్తామని ఇటీవలే ప్రకటించిన మంత్రి ఇలాంటి వ్యాఖ్యలు చేయడం బ్రిటన్‌లో సంచలనంగా మారింది. మంత్రి రాజీనామా చేయాలంటూ మహిళా సంఘాలు డిమాండ్ చేశాయి. అయితే, క్లెవర్లీ వ్యాఖ్యలు కేవలం జోక్ మాత్రమేనని, ఇందుకు ఆయన క్షమాపణలు కూడా చెప్పారని మంత్రి ప్రతినిధి మీడియాకు తెలిపారు.
