PAWAN:కొండగట్టు అంజన్న సన్నిధిలో పవన్ కల్యాణ్

ఆంధ్రప్రదేశ్ ఉప ముఖ్యమంత్రి, జనసేనాని పవన్ కల్యాణ్ శనివారం ఉదయం తెలంగాణలోని ప్రముఖ పుణ్యక్షేత్రం కొండగట్టు అంజన్న స్వామిని దర్శించుకున్నారు. ఉప ముఖ్యమంత్రి హోదాలో తొలిసారి ఆలయానికి విచ్చేసిన ఆయనకు అర్చకులు పూర్ణకుంభంతో, సాంప్రదాయబద్ధంగా ఘనస్వాగతం పలికారు. స్వామివారికి ప్రత్యేక పూజలు నిర్వహించిన అనంతరం పవన్ కల్యాణ్ ఆలయ అభివృద్ధి పనుల్లో భాగంగా కీలక ఘట్టానికి శ్రీకారం చుట్టారు. అభివృద్ధి పనులకు భూమిపూజ: పవన్ కల్యాణ్ ప్రత్యేక చొరవతో తిరుమల తిరుపతి దేవస్థానం (TTD) మంజూరు చేసిన రూ. 35.19 కోట్ల నిధులతో నిర్మించనున్న ధర్మశాల, దీక్ష విరమణ మండపానికి ఆయన భూమిపూజ నిర్వహించారు. భక్తుల సౌకర్యార్థం ఇక్కడ 96 గదులతో భారీ ధర్మశాలను నిర్మించనున్నారు. కొండగట్టు క్షేత్రానికి వచ్చే భక్తులకు మెరుగైన వసతులు కల్పించాలనే ఉద్దేశంతో ఈ నిధులను కేటాయించేలా పవన్ కల్యాణ్ కృషి చేశారు. భారీ భద్రత - కార్యకర్తల భేటీ: డిప్యూటీ సీఎం పర్యటన నేపథ్యంలో పోలీసులు కొండగట్టు పరిసరాల్లో భారీ భద్రతా ఏర్పాట్లు చేశారు. భూమిపూజ అనంతరం నాచుపల్లి శివారులోని ఒక రిసార్ట్‌లో జనసేన పార్టీ కార్యకర్తలతో పవన్ కల్యాణ్ సమావేశమై, వారికి దిశానిర్దేశం చేయనున్నారు. ఈ కార్యక్రమం ముగిసిన తర్వాత శనివారం మధ్యాహ్నం ఆయన తిరిగి హైదరాబాద్‌కు ప్రయాణమవుతారు. అంజన్నపై తనకున్న భక్తిని చాటుకుంటూనే, రెండు రాష్ట్రాల ఆధ్యాత్మిక సంబంధాలను బలోపేతం చేసే దిశగా పవన్ అడుగులు వేయడం విశేషం.

సావిత్రిబాయి ఆధునిక మహిళా శక్తికి పునాది: సీఎం

దేశంలోనే తొలి మహిళా ఉపాధ్యాయురాలిగా చరిత్ర సృష్టించిన సావిత్రిబాయి పూలే జయంతి సందర్భంగా ఆంధ్రప్రదేశ్ ముఖ్యమంత్రి నారా చంద్రబాబు నాయుడు ఆమెకు ఘన నివాళులర్పించారు. ఈ మేరకు 'ఎక్స్' (ట్విట్టర్) వేదికగా ఆయన స్పందిస్తూ.. మహిళా విద్య కోసం ఆనాడు సావిత్రిబాయి చేసిన పోరాటాన్ని కొనియాడారు. మహిళలను విద్యావంతులుగా చేయాలనే సంకల్పంతో, సమాజ కట్టుబాట్లను ధిక్కరించి ఆమె చేసిన సాహసం నేటి ఆధునిక మహిళా శక్తికి బలమైన పునాదిగా నిలిచిందని సీఎం పేర్కొన్నారు. ఆమె పోరాటం కేవలం అక్షరాస్యతకే పరిమితం కాకుండా, పురుషులతో సమానంగా, అంతకంటే మిన్నగా మహిళలు అవకాశాలను అందుకునే స్థాయికి చేర్చిందన్నారు.