Haval H9 SUV : బహుమతిగా గెలిచిన ఎస్యూవీని భారత్‌కు తేలేని అభిషేక్ శర్మ, కారణం ఏంటంటే?

Haval H9 SUV : ఆసియా కప్ 2025లో భారత జట్టు అద్భుత విజయాన్ని సాధించింది. ఈ విజయంలో కీలక పాత్ర పోషించిన ఆటగాళ్లలో యువ ఓపెనర్ అభిషేక్ శర్మ ఒకరు. టోర్నమెంట్ అంతా అద్భుతంగా రాణించినందుకు అతనికి ప్లేయర్ ఆఫ్ ది టోర్నమెంట్ అవార్డు దక్కింది. ఈ అవార్డుతో పాటు HAVAL H9 SUV కారును గిఫ్టుగా ఇచ్చారు. కానీ, ఇక్కడే ఒక విచిత్రమైన సమస్య ఎదురైంది. అభిషేక్ శర్మ ఈ ఖరీదైన ఎస్యూవీ కారును భారత్‌కు తీసుకురాలేకపోతున్నాడు. దీనికి కారణం మన దేశంలో ఉన్న ఒక చట్టం.

ఆసియా కప్ 2025లో అభిషేక్ శర్మ బ్యాట్ బాగా పనిచేసింది. అతను 7 ఇన్నింగ్స్‌లలో 44.86 సగటు, 200 స్ట్రైక్ రేట్‌తో ఏకంగా 314 పరుగులు చేశాడు. ఇందులో మూడు హాఫ్ సెంచరీలు, 32 ఫోర్లు, 19 సిక్స్‌లు ఉన్నాయి. అతని దూకుడు ఇన్నింగ్స్‌లు భారత్‌కు చాలా మ్యాచ్‌లలో విజయాన్ని అందించాయి. టోర్నమెంట్‌లో అత్యుత్తమ ఆటగాడిగా నిలిచినందుకు అతనికి HAVAL H9 SUV కారును బహుమతిగా ఇచ్చారు. అయితే, ఆ లగ్జరీ ఆఫ్-రోడ్ కారు ఇప్పుడు సమస్యకు కారణమైంది.

HAVAL H9 కారు చూడటానికి ఎంత స్టైలిష్‌గా ఉన్నా, భారత చట్టాలకు అనుగుణంగా లేదు. ఎందుకంటే ఆ కారు లెఫ్ట్-హ్యాండ్ డ్రైవ్ వెర్షన్‌లో ఉంది. కానీ, భారతదేశంలో రైట్-హ్యాండ్ డ్రైవ్ వాహనాలను మాత్రమే నడపడానికి అనుమతి ఉంది. భారతీయ రోడ్ సేఫ్టీ, వాహనాల రిజిస్ట్రేషన్ చట్టాల ప్రకారం, లెఫ్ట్-హ్యాండ్ డ్రైవ్ కార్లను దేశంలో రిజిస్టర్ చేయడానికి లేదా ఉపయోగించడానికి అనుమతి లేదు. అందుకే అభిషేక్ ఈ SUVని భారత్‌కు తీసుకురాలేక, ఉపయోగించలేక నిరాశ చెందారు.

HAVAL కంపెనీ తమ H9 SUVని రైట్-హ్యాండ్ డ్రైవ్ వెర్షన్‌లో నవంబర్ 2025 నాటికి భారతదేశంలో విడుదల చేయవచ్చని వార్తలు వస్తున్నాయి. ఒకవేళ అది నిజమైతే, కంపెనీ లేదా టోర్నమెంట్ నిర్వాహకులు బహుమతిగా భారత్‌లో నడపడానికి వీలైన కొత్త మోడల్‌ను అభిషేక్ శర్మకు అందించే అవకాశం ఉంది. అయితే, ఈ విషయంపై కంపెనీ నుంచి లేదా టోర్నమెంట్ నిర్వాహకుల నుంచి ఇప్పటివరకు ఎలాంటి అధికారిక ప్రకటన రాలేదు.