Isha Alya: దోపిడీ దొంగల చేతిలో హత్యకు గురైన నటి ఇషా ఆలియా

Isha Alya: పశ్చిమ బెంగాల్‌లో జార్ఖండ్ నటి ఇషా ఆలియాను స్నాచర్లు కాల్చి చంపారు. పశ్చిమ బెంగాల్‌లోని హౌరా వద్ద జాతీయ రహదారి 16పై బుధవారం తెల్లవారుజామున జార్ఖండ్‌కు చెందిన నటి ఇషా అలియాను స్నాచర్లు కాల్చి చంపినట్లు పోలీసులు తెలిపారు. నటి, ఆమె భర్త ప్రకాష్ కుమార్ మరియు మూడేళ్ల కుమార్తె‌తో కలిసి రాంచీ నుండి కోల్‌కతాకు వెళుతుండగా ఈ ఘటన చోటు చేసుకుంది.

కుమార్ ఫిర్యాదు మేరకు పోలీసులు దర్యాప్తు ప్రారంభించారు. క్రైమ్ స్పాట్ సమీపంలోని ఫ్యాక్టరీలో అమర్చిన సీసీటీవీ ఫుటేజీలను పోలీసులు పరిశీలిస్తున్నారు. కారులో వెళుతున్న నటి కుటుంబం ఉదయం 6 గంటల ప్రాంతంలో నిర్జన ప్రదేశంలో ఆగారు. అక్కడ కుమార్ యూరినల్స్ పాస్ చేయాలనుకున్నారు. ఇంతలో హఠాత్తుగా ముగ్గురు స్నాచర్లు వారిపై దాడి చేశారు. అలియా ప్రతిఘటించడానికి ప్రయత్నించింది. దాంతో ఆమెను దుండగులు పాయింట్ బ్లాంక్ రేంజ్ నుండి కాల్పులు జరిపారు.

"ఇషా జార్ఖండ్‌లో ప్రముఖ నటి. ఆమె అసలు పేరు రియా కుమారి. ముగ్గురు వ్యక్తులు తమపై దాడి చేశారని, అన్యాయంగా తన భార్యను చంపేశారని కుమార్ రోదిస్తూ పోలీసులకు తెలిపాడు. "నా భార్య నా కూతురుతో కలిసి కారులో కూర్చుంది. దుండగులు నా పర్సు లాక్కోవడానికి ప్రయత్నించగా, నా భార్య దిగి వారిని అడ్డుకునే ప్రయత్నం చేసింది. దాంతో వారు ఆమెను కాల్చిచంపారు" అని కుమార్ పేర్కొన్నాడు.

స్థానికులు తెలిపిన వివరాల ప్రకారం, ఆ ప్రాంతం నిర్మానుష్యంగా ఉండటంతో, సహాయం కోరేందుకు కుమార్ సుమారు రెండు కిలోమీటర్లు నడిచి వెళ్లాల్సి వచ్చింది. బాధితురాలిని ఉలుబెరియా ఆసుపత్రికి తరలించగా, అప్పటికే ఇషా మరణించినట్లు వైద్యులు నిర్ధారించారు.