దుబాయ్ లో చదువుతున్న 18 ఏళ్ల భారతీయ విద్యార్థి.. దీపావళి రోజు గుండెపోటుతో మృతి

దీపావళి నాడు ఆ కుటుంబం ఇంట విషాదం నెలకొంది. దుబాయ్‌లో చదువుకుంటున్న18 ఏళ్ల భారతీయ యువకుడు గుండెపోటుతో మరణించాడు. గోల్డెన్ వీసా అర్హత కూడా పొందాడు. దుబాయ్‌లోని మిడిల్‌సెక్స్ యూనివర్సిటీలో బీబీఏ మార్కెటింగ్ మొదటి సంవత్సరం చదువుతున్న వైష్ణవ్ కృష్ణకుమార్ మంగళవారం దీపావళి వేడుకల్లో పాలు పంచుకుంటున్న సమయంలో కుప్పకూలిపోయాడు.

వెంటనే అతడిని ఆసుపత్రికి తరలించారు. కానీ అప్పటికే ప్రాణాలు కోల్పోయాడని వైద్యులు వెల్లడించారు. "గుండెపోటు కారణంగా అతను మరణించాడని" ప్రకటించారు. దుబాయ్ పోలీస్ ఫోరెన్సిక్ డిపార్ట్‌మెంట్ తదుపరి దర్యాప్తు నిర్వహిస్తోంది. కుటుంబసభ్యులు వైష్ణవ్‌కు ఎటువంటి గుండె సమస్యలు లేవని  తెలిపారు. 

"కేరళకు చెందిన అతని తల్లిదండ్రులు వైష్ణవ్ మృతదేహాన్ని అంతిమ సంస్కారాల కోసం తీసుకెళ్లాలని కోరుకుంటున్నారు. వైష్ణవ్ మామ దుబాయ్ నివాసి  అయిన నితీష్ ఖలీజ్ టైమ్స్‌తో మాట్లాడుతూ.. "ఏమి జరిగిందో మాకు ఇంకా స్పష్టమైన సమాచారం లేదు" అని అన్నారు.

అలప్పుజలోని చెన్నితలలోని కరాజ్మాకు చెందిన వైష్ణవ్ కుటుంబం బంధువు మరియు పొరుగువాడు అయిన గోపి కర్ణవర్ మాట్లాడుతూ..

"వారు చెన్నితలను చాలా అరుదుగా సందర్శించేవారు. రెండేళ్ల క్రితం కొత్తగా నిర్మించిన వారి ఇంటి గృహప్రవేశ వేడుక కోసం వారు చివరిసారిగా ఇక్కడికి వచ్చారు" అని కర్ణవర్ అలప్పుజలో పిటిఐకి చెప్పారు.

వైష్ణవ్ తండ్రి కృష్ణకుమార్ 20 సంవత్సరాలకు పైగా దుబాయ్‌లో పనిచేస్తున్నారని ఆయన అన్నారు. "వైష్ణవ్ మరియు అతని చెల్లెలు అక్కడే పుట్టి పెరిగారు. దుబాయ్‌లో అతని స్నేహితులు చాలా మంది ఉన్నారు, అతను తెలివైన అబ్బాయి" అని ఆయన అన్నారు.

"శుక్రవారం మృతదేహం ఇంటికి చేరుకుంటుందని మాకు సమాచారం అందింది. శనివారం వారి ఇంటి ఆవరణలో అంత్యక్రియలు నిర్వహించనున్నారు" అని కర్ణవర్ అన్నారు. ఇంతలో, మిడిల్‌సెక్స్ విశ్వవిద్యాలయం ఒక సంతాప ప్రకటనలో, వైష్ణవ్ మరణం "మా సమాజాన్ని తీవ్రంగా ప్రభావితం చేసింది" అని గల్ఫ్ న్యూస్ నివేదించింది.

అతడికి తల్లిదండ్రులు వీజీ కృష్ణకుమార్, విధు కృష్ణకుమార్, చెల్లెలు వృష్టి కృష్ణకుమార్ ఉన్నారు.