Bhopal: స్నేహితురాలి ఇంట్లో మహిళా డీఎస్పీ చోరీ.. సీసీటీవీ కెమెరాలో రికార్డ్!

రక్షించాల్సిన పోలీస్ అధికారే దొంగగా మారిన ఘటన మధ్యప్రదేశ్ పోలీస్ శాఖలో తీవ్ర కలకలం రేపుతోంది. ఓ సీనియర్ మహిళా అధికారి తన స్నేహితురాలి ఇంట్లోనే చోరీకి పాల్పడినట్లు ఆరోపణలు రావడంతో ఉన్నతాధికారులు దిగ్భ్రాంతికి గురయ్యారు. పోలీస్ హెడ్‌క్వార్టర్స్‌లో డిప్యూటీ సూపరింటెండెంట్ ఆఫ్ పోలీస్ (డీఎస్పీ)గా పనిచేస్తున్న కల్పన రఘువంశీపై ఈ మేరకు కేసు నమోదైంది. ఆమె తన స్నేహితురాలి ఇంటి నుంచి రూ. 2 లక్షల నగదు, ఒక మొబైల్ ఫోన్ దొంగిలించినట్లు పోలీసులు ఎఫ్‌ఐఆర్‌లో పేర్కొన్నారు.

భోపాల్‌లోని జహంగీరాబాద్ పోలీస్ స్టేషన్ పరిధిలో ఈ ఘటన చోటుచేసుకుంది. బాధితురాలు ఇచ్చిన ఫిర్యాదు ప్రకారం, ఆమె తన మొబైల్ ఫోన్‌ను ఛార్జింగ్ పెట్టి స్నానం చేయడానికి వెళ్లారు. అదే సమయంలో ఇంట్లోకి ప్రవేశించిన డీఎస్పీ కల్పన, హ్యాండ్‌బ్యాగ్‌లో ఉన్న రూ. 2 లక్షల నగదుతో పాటు మరో సెల్‌ఫోన్‌ను తీసుకుని వెళ్లిపోయారు. బాధితురాలు తిరిగి వచ్చి చూడగా, డబ్బు, ఫోన్ కనిపించకపోవడంతో అనుమానం వచ్చి వెంటనే సీసీటీవీ ఫుటేజీని పరిశీలించారు.

ఆ ఫుటేజీలో డీఎస్పీ కల్పన ఇంట్లోకి రావడం, బయటకు వెళ్లడం స్పష్టంగా రికార్డయింది. ఆమె బయటకు వెళ్తున్నప్పుడు చేతిలో కరెన్సీ నోట్ల కట్ట పట్టుకుని ఉన్న దృశ్యాలు కూడా కనిపించాయి. దీంతో షాక్‌కు గురైన బాధితురాలు వెంటనే పోలీసులకు ఫిర్యాదు చేశారు.

సీసీటీవీ ఫుటేజీని కీలక ఆధారంగా తీసుకుని పోలీసులు డీఎస్పీ కల్పనపై దొంగతనం కేసు నమోదు చేశారు. కేసు నమోదైనప్పటి నుంచి ఆమె పరారీలో ఉన్నారు. ఆమెను పట్టుకోవడానికి పోలీసులు ప్రత్యేక బృందాలతో గాలింపు చర్యలు ముమ్మరం చేశారు.

ఈ ఘటనపై అడిషనల్ సూపరింటెండెంట్ ఆఫ్ పోలీస్ బిట్టు శర్మ మాట్లాడుతూ, "ఫిర్యాదుదారు మొబైల్ ఫోన్‌ను నిందితురాలి ఇంటి నుంచి స్వాధీనం చేసుకున్నాం. సీసీటీవీ ఫుటేజీలో ఆమె స్పష్టంగా కనిపిస్తున్నారు" అని తెలిపారు. అయితే, చోరీకి గురైన రూ. 2 లక్షల నగదు ఇంకా లభ్యం కాలేదని పోలీస్ వర్గాలు వెల్లడించాయి.

ఈ వ్యవహారంపై పోలీస్ ఉన్నతాధికారులు తీవ్రంగా స్పందించారు. నిందితురాలైన డీఎస్పీకి శాఖాపరమైన నోటీసు జారీ చేసి, క్రమశిక్షణా చర్యలకు సిద్ధమవుతున్నారు. ఒక ఉన్నతస్థాయి అధికారి ఇలాంటి నేరానికి పాల్పడటం పోలీస్ శాఖ ప్రతిష్ఠకు మచ్చ తెచ్చిందని, ఈ కేసులో పూర్తి పారదర్శకంగా విచారణ జరిపి బాధ్యులెవరినీ వదిలిపెట్టబోమని సీనియర్ అధికారులు స్పష్టం చేశారు.