Ghaziabad Case: ముగ్గురు అక్కాచెల్లెళ్ళ బలవన్మరణం వెనుక అసలు కారణం వేరే ఉందా ?

ఉత్తరప్రదేశ్ ఘజియాబాద్‌లోని ఒక హైరైజ్ అపార్ట్‌మెంట్‌లో బుధవారం తెల్లవారుజామున జరిగిన ఘోర దుర్ఘటన కలకలం రేపింది. 16, 14, 12 ఏళ్ల వయసున్న ముగ్గురు అక్కాచెల్లెళ్లు తొమ్మిదవ అంతస్తు నుంచి దూకి ప్రాణాలు వదిలారు. తొలుత ఇది ఏదో 'కొరియన్ ఆన్‌లైన్ గేమ్' టాస్క్ అని తండ్రి ప్రచారం చేసినప్పటికీ, పోలీసుల విచారణలో అంతకంటే భయంకరమైన వాస్తవాలు వెలుగులోకి వచ్చాయి.

స్టాక్ ట్రేడర్ అయిన తండ్రి చేతన్ కుమార్‌కు ఇద్దరు భార్యలు. అప్పుల ఊబిలో కూరుకుపోయిన అతడు సుమారు రూ. 2 కోట్ల బాకీ ఉన్నట్లు పోలీసులు గుర్తించారు. ఆర్థిక ఇబ్బందుల వల్ల విద్యుత్ బిల్లు కట్టేందుకు తన కూతుళ్ల మొబైల్ ఫోన్లను కూడా అతను అమ్మేశాడు. అంతేకాక, కరోనా తర్వాత వారిని స్కూలుకు పంపడం మానేయడమే కాకుండా, చిన్న వయసులోనే పెళ్లిళ్లు చేస్తానని బెదిరింపులకు గురిచేసేవాడని పోలీసుల విచారణలో తేలింది.

ఆ బాలికలు తమ తలిదండ్రుల ఫోన్లలో నిరంతరం 'కొరియన్ డ్రామాలు' చూస్తూ ఉండేవారు. ఎంతలా అంటే, వారు తమ పేర్లను కూడా కొరియన్ పేర్లుగా మార్చుకుని మొబైల్ వాల్‌పేపర్‌పై రాసుకున్నారు. వారం రోజుల క్రితం తండ్రి తన ఫోన్ ఇవ్వడానికి నిరాకరించడం, వారిని అవమానించడం వంటి చర్యలు ఆ సున్నిత మనసులపై తీవ్ర ప్రభావం చూపి ఉండవచ్చని పోలీసులు అనుమానిస్తున్నారు.

పక్కింటి వ్యక్తి అరుణ్ సింగ్ తెలిపిన వివరాల ప్రకారం.. తెల్లవారుజామున 2 గంటల సమయంలో పెద్దమ్మాయి బాల్కనీ అంచుకు వెళ్లగా, మిగిలిన ఇద్దరు చెల్లెళ్లు ఆమెను వెనక్కి లాగడానికి ప్రయత్నించారు. కానీ, చివరికి ఒకరినొకరు పట్టుకుని ముగ్గురూ కిందకు దూకేశారు. పోలీసులు గది తలుపులు బద్దలు కొట్టి లోపలికి వెళ్లగా, అక్కడ గది మధ్యలో కుటుంబ సభ్యుల ఫోటోలు ఒక వృత్తాకారంలో పేర్చి ఉన్నాయి. అలాగే ఒక డైరీలో "ఇదంతా నిజం, కచ్చితంగా చదవండి" అని తల్లిదండ్రులకు రాసిన సందేశం, కొన్ని సినిమా డైలాగులు కనిపించాయి.

ఈ కేసు 2017 నాటి 'బ్లూ వేల్' సవాలును గుర్తుకు తెస్తున్నప్పటికీ, ఆర్థిక సంక్షోభం, విపరీతమైన మొబైల్ అడిక్షన్ కలిపి ఈ ముగ్గురు బాలికలను మృత్యువు ఒడిలోకి నెట్టి ఉండవచ్చని పోలీసులు ప్రాథమికంగా నిర్ధారించారు.