Haridwar: మారువేషంలో తిరుగుతున్న అత్యాచార నిందితుడు.. అరెస్ట్ చేసిన పోలీసులు..

'ఆపరేషన్ కాలనేమి' కింద, ఉత్తరాఖండ్‌లోని హరిద్వార్ పోలీసులు బాలికపై అత్యాచారానికి పాల్పడిన నిందితుడిని అరెస్టు చేశారు. అతను నుదిటిపై త్రిపుండ్, మెడలో దండ, చేతిలో త్రిశూలం, నడుము చుట్టూ పులి చర్మం చుట్టుకుని తిరుగుతున్నాడు. ఇవి మాత్రమే కాకుండా అతను తన తలపై కృత్రిమ చంద్రుడిని కూడా ధరించి తనని తాను ఓ మంచి వ్యక్తిగా చాటుకునే ప్రయత్నం చేశాడు.  

కోరికలు తీరుస్తానని చెప్పి ఒక కుటుంబాన్ని ఆకర్షించి వారి ఇంటికి పిలిపించుకునేలా చేశాడు. ఆ సమయంలో, ఆ కుటుంబంలోని ఓ ఆడపిల్ల అతని లైంగిక వాంఛకు బలైంది. పోలీసులు అతన్ని పట్టుకునేలోపే పారిపోయాడు. కానీ పోలీసులు తమ ప్రయత్నాలను ముమ్మరం చేసి ఎట్టకేలకు మారువేషంలో తిరుగుతున్న అతడిని అరెస్ట్ చేసి కటకటాల వెనక్కు పంపించారు.

బాలికపై అత్యాచారం చేసిన నిందితుడి పేరు దీపక్ సైనీ. అతనికి సుదీర్ఘ నేర చరిత్ర ఉందని దర్యాప్తులో తేలింది. గతంలో అతనిపై ఎఫ్‌ఐఆర్ కూడా నమోదైంది. దీపక్ ఇతర బాధితుల కోసం కూడా పోలీసులు వెతుకుతున్నారు.  

పోలీసు వర్గాల సమాచారం ప్రకారం, పట్టుబడిన దీపక్ సైనీ, బాలికలు మరియు మహిళలకు శివుని ఆశీర్వాదాలు/ప్రసాదాలు ఇవ్వడం ద్వారా వారి కోరికలు నెరవేరుతాయని హామీ ఇచ్చేవాడు. ఆపై వారిని తన కామవాంఛలకు బలి చేసేవాడు. విచారణ సమయంలో, నిందితుడు తనను తాను పరమ జ్ఞాని అని, భూత, వర్తమాన మరియు భవిష్యత్తును చూడగల శివ భక్తుడినని చెప్పుకున్నాడు. ఈ వేషంతోనే మహిళలు మరియు బాలికలను ఆకర్షించేవాడినని  ఒప్పుకున్నాడు. పోలీసులు అతన్ని విచారిస్తున్నారు. నిందితుడు జ్వాలాపూర్‌లోని సుభాష్ నగర్ నివాసి.