Nitin Gadkari: నాకు ప్రధాని అయ్యే ఛాన్స్ వచ్చింది : నితిన్ గడ్కరీ
తిరస్కరించినట్లు చెప్పిన మంత్రి;
ప్రధాన మంత్రి పదవి రేసులో తాను పాల్గొంటే తనకు మద్దతు ఇస్తానని ఓ రాజకీయ నాయకుడు చెప్పారని, అయితే తనకు అలాంటి ఆశయం లేదని కేంద్ర మంత్రి నితిన్ గడ్కరీ శనివారం పెద్ద ప్రకటన చేశారు. నాగ్‌పూర్‌లో జరిగిన ఓ కార్యక్రమంలో గడ్కరీ మాట్లాడుతూ..”నాకు ఒక సంఘటన గుర్తుంది.. నేను ఎవరి పేరునూ తీసుకోను. మీరు ప్రధానమంత్రి అవుతారంటే మేం మీకు మద్దతిస్తాం అని ఆ వ్యక్తి చెప్పాడు.” అని వ్యాఖ్యానించారు. అయితే.. ఈ సంభాషణ ఎప్పుడు జరిగిందో మాత్రం చెప్పలేదు.
నాగ్‌పూర్‌లో జర్నలిస్టుల సన్మాన కార్యక్రమానికి హాజరైన నితిన్ గడ్కరీ మాట్లాడుతూ.. ” మీరు ప్రధాని అయితే మీకు మేం మద్దతిస్తాం అని అన్నారు. మీరు నాకు ఎందుకు మద్దతిస్తారని అడిగాను. నేను మీ నుంచి ఎందుకు మద్దతు తీసుకుంటాను? ప్రధాని కావడం నా జీవిత లక్ష్యం కాదు. నేను నా విలువలకు, నా సంస్థకు విధేయుడిని… ఏ పదవి కోసం రాజీపడను. ఈ విలువ భారత ప్రజాస్వామ్యానికి పునాది.” అని మంత్రి తన అనుభవాన్ని పంచుకున్నారు. కాగా.. 2024, 2019 లోక్‌సభ ఎన్నికల సమయంలో ప్రధాని పదవికి నితిన్ గడ్కరీ పేరు చర్చకు వచ్చింది. ఈ ఏడాది జరిగిన సార్వత్రిక ఎన్నికలకు ముందు “ఇండియా టుడే మూడ్ ఆఫ్ ది నేషన్” సర్వేలో కేంద్ర హోం మంత్రి అమిత్ షా, ఉత్తరప్రదేశ్ ముఖ్యమంత్రి యోగి ఆదిత్యనాథ్ తర్వాత ప్రధానమంత్రిగా నరేంద్ర మోడీకి అత్యంత అనుకూలమైన మూడవ నాయకుడిగా గడ్కరీ నిలిచారు.
2019, 2024 సార్వత్రిక ఎన్నికల సమయంలో ప్రధాని అభ్యర్ధిత్వంపై నితిన్ గడ్కరీ పేరు ప్రముఖంగా వినిపించింది. ఈ ఏడాది లోక్‌సభ ఎన్నికలకు ముందు ఫిబ్రవరిలో నిర్వహించిన మూడ్ ఆఫ్ నేషన్ సర్వేలో ప్రధాని పదవి రేసులో తొలి రెండు స్థానాల్లో నరేంద్ర మోదీ, అమిత్ షాలు ఉండగా.. గడ్కరీ మూడో స్థానంలో నిలిచారు. అయితే, 2019 ఎన్నికల సమయంలో భారత్ ప్రధాని నరేంద్ర మోదీ చేతుల్లో ఉందని వ్యాఖ్యానించారు. మేమంతా ఆయన వెనుకే ఉంటామని, ఆయన దార్శనికతను నెరవేర్చడంలో నేనూ మరో కార్యకర్తను అని పేర్కొన్నారు. నాకు ప్రధాని కావాలనే కల ఎప్పుడూ లేదని కొట్టిపారేశారు.
బీజేపీ సీనియర్ నాయకుడు నితిన్ గడ్కరీ.. వరుసగా మూడుసార్లు నాగ్‌పూర్ పార్లమెంట్ స్థానం నుంచి లోక్‌సభకు ఎన్నికయ్యారు. ఆయనకు ఆర్ఎస్ఎస్‌ అండదండలు పుష్కలంగా ఉన్నాయి. కేంద్ర ఉపరితల రవాణా మంత్రిత్వ శాఖకు సుదీర్ఘకాలం పనిచేసిన మంత్రిగా ఆయన రికార్డు నెలకొల్పారు. 2014 నుంచి ఆయన ఈ పదవిలో కొనసాగుతున్నారు. ఇక, బీజేపీ జాతీయాధ్యక్షుడిగా 2009 నుంచి 2013 వరకూ ఉన్నారు.